Mberaand 16 - NQAARIIT NE ROOG

O rimel ole Isma’el

¹ Saarayi fee o tew Abram jeg’ee o ƥiy o leng. A jeg’a koy o ceefeer o Miimisira o ne’e Agaar.

² Saarayi a laya a Abram ee: «Feek o Yaal oxe kaa xañaam fa ndim, reti boog o yoon fa Agaar fee o ceefeer es. Xeƈa xam jegit no ten o ƥiy.» Abram a fi’a ke Saarayi a layuuna.

³ Maaga, Saarayi fee o tew Abram a janga a Agaar fee o Miimisira xe refna ref o ceefeer um, a cooxin a Abram fee o kor um a cinj ye da ngenna xa kiid xarɓaxay kam saax laa Kanaan.

⁴ Abram a yoona fa Agaar soo ta rok o fud. Ye Agaar a ga’na yee o fud a saqu, a dalfooxa o ɗeetataa a Saarayi fee o yaal um a ngid a pariƴ.

⁵ Maaga, Saarayi a laya a Abram ee: «Fat a naxax ake um naxooxel a yen took of. Cooxaaxoong o ceefeer es, o yoon fo ten, too ye ta ga’na yee a roka o fud a refata no ɗeetaxam a ngid a pariƴ. Yaasam o Yaal oxe a hate a ndeer es fa wo.»

⁶ Abram a doona a Saarayi yee: «Mee ndax o ceefeer of na xa ƥay of a refu. Fi’een boog naa jofooxoonga!» Maaga, Saarayi a dalfooxa o ref no ñagadilan soo Agaar a ƴuf ndax ta goƭin.

⁷ Malaaka no Yaal oxe a soƥa a Agaar paam a cur foofi kam a koƥ-a-ƥor alaa, na cur alaa refna paam a ƭat alaa jofna Suur.

⁸ A layaan ee: «Agaar fee o ceefeer Saarayi, mam inooro fo mam o jofaa?» Agaar a doonaan ee: «Saarayi fee o yaal es um ƴufaa!»

⁹ Malaaka fee no Yaal oxe a layaan ee: «Nomtooxi maa no yaal of, too neewandoox no ɓay um.»

¹⁰ Malaaka fee no Yaal oxe a layahinaan ee: «Xam mayƭand xa taan of, boo o leng waagkee o lim a den.»

¹¹ Malaaka fee no Yaal oxe a ɓaata teen ee: «Me ta refna o fud saqo. Xan o ñoot o ƥiy o ngoor, too fat o ne’in Isma’el, yaam o Yaal oxe a nana xa iin of.

¹² O ƥiy onqeene xan a nand nen o faam-a-koƥ, waagirkee fo o leng, too o leng waagirkee fo ten. Xan a siiknoor fo fog um fop.»

¹³ Agaar a laamtooxa yee: «Ndax no ndigil kaam ga meeke sax a Roog fee na ga’axam?» A ne’a o Yaal oxe lay’ina fo ten El-Ro’i ee wo refu Roog fee na ga’axam.

¹⁴ Ten taxu a ngas alaaga a ne’el Laxay-Ro’i, tekitna a ngas ale no xe na ñoowaa too a ga’aa. A ngas alaa oxe refa a ndeer Kades fa Bered.

¹⁵ Agaar a rimana a Abram o ƥiy o ngoor, soo Abram a ne o ƥiy onqe Isma’el.

¹⁶ Abram a jeg’a xa kiid qarɓeen ɓetuu tadik fo xa kiid ɓetaa fo leng ye Agaar a rimanuuna a Isma’el.