Mberaand 12 - NQAARIIT NE ROOG

ABRAHAM ( 12—25 ) Roog a xoya a Abram ndax ta xaƴ saax um

¹ O Yaal oxe a laya a Abram ee: «Inooxi no saax of, kaam ee o inoox no mbaafaap of, waas mbind faap of, too ret no saax lakas le um lalkang.

² Xam sutit na wo xeet fa maak, too xam barke’ong. Xam fi’ong o yaal gon maak, too a cur barke tigi o refkaa.

³ We na salankang paax, xam barke a den, ndaa oxuu salooxoonga, xam salooxin. Qeet ke na adna fee fop na wo a mbarke’itkeel.»

⁴ Abram a reta, ne o Yaal oxe a layit’uuna o ten, soo Lot a yoon fo ten. Abram a jeg’a xa kiid qarɓeen ɓetuu ƭik fo xa kiid xa ƥetaq ye ta inoorna Xaraan.

⁵ A xota a Saarayi fee o teem fa Lot fee o ƥiy no ndeɓ um fo kalal ke da njeg’ina fop fo faɗ we da njegit’ina Xaraan. A inooxa soo a ndet no saax le Kanaan. Ye Abramiin a mbadiidna no saax le Kanaan,

Abram kam Kanaan fo kam Misira

⁶ Abram a xaaña saax le boo no mbiñ onqaa ne’eena Sikeem, a suur boo no ngariñ naa More. Na jamaane faaga Kaakanaan we no saax le a ngenoogu.

⁷ O Yaal oxe a feeñooxa a Abram, a layin ee: «Saax leeke, xam ci’in xa taan of.» Abram a maxana o Yaal oxe o sadaxand no mbiñ onqe ta feeñoor’uuna.

⁸ Cinj kaaga, a ɗisa ƭiif ke ten, ndax ta ret na xa coong axaa no batand naa Betel. A sipa ƭiif um ndeer Betel refna no mudand fa Ay refna no batand. A maxana o Yaal oxe maaga o sadaxand, soo a ƴufginoor gon le no Yaal oxe.

⁹ Abram a dakooxa ref na ñaaƈ, a jagin no ɓemb-roog o ñamaak.

¹⁰ Biim a yena kam saax le, soo Abram a ret Misira ndax ta moof maaga, yaam biim le kaa ɗom’u lool no saax le.

¹¹ Yaa da mbaamnookna Misira, Abram a laya a Saarayi fee o teem ee: «Ga’aa koy, andaam ee o tew o mosu refo,

¹² too yaa Miimisira we a nga’kang xan a lay ee: ‹O teem oo!› Maaga, xan a mbaraam soo a nqaƴong o ñoow.

¹³ Fat o lay ee o cigeen es refo, ndax um dalnel a paax, soo o tax um muc.»

¹⁴ Ye Abram a fadiidna Misira, Miimisira we a nga’a yee o teem kaa mos bo nen liƥ.

¹⁵ A kag ake no maat ne Firawon a nga’aan itam, soo a yegnin a Firawon fee. Maaga, o tew oxe a ɓise no mbind no maad ne Firawon fee.

¹⁶ Abram o mat a dalne a paax yaam o tew oxe. A cooxe a ked fo xa siir fo xa paam fo faɗ goor fo rew fo xa paam xa tew fo keeleemb.

¹⁷ O Yaal oxe a xawta a Firawon fee fo wiin mbind um xa ƭomel xa maak yaam Saarayi fee o tew Abram.

¹⁸ Maaga, Firawon fee a xoyna a Abram, a layin ee: «Xar fi’axamo kene? Xar taxu layiraamo yee o teef oo?

¹⁹ Xar taxu o lay ee o cigeen of oo boo a tax um fi’in nen o tees? Ndiiki koy, o teef oo xeene! Jangeen too naag col ret!»

²⁰ Firawon fee a hebla dag we ten da sutin saax le, ten fo o teem fo ke ta jeg’ina fop.