Mbeeñil 9 - NQAARIIT NE ROOG

¹ Cinj kaaga, malaaka fa ƥetkandeer fee a luuƥa. Ga’aam o xoor a yentiidaa na asamaan, a waaƭiidaa a lanq. Kaa coox’el o jaafu le na ngas fiɗel alaa.

² Maaga, o xoor ole a weta a ngas fiɗel alaa, too fo suun olaa nandna nen fo suun ndoxand a sutoorta teen boo a niifaarin njeeƈ ne fo nqeñ ne.

³ Tooroog a sutoorta no fo suun ole, soo a pasaroox took lanq ke fop. Tooroog keene a ci’e doole faa nandna nen daŋat a beex.

⁴ Kaa lay’el ee ba nu ndaaɓ daaƭ le mbaat ke duufeena mbaat taxar ke took lanq ke. Toroxandyo rek wiin we njeg’eerna o ñaas ole Roog na tagid den.

⁵ Tooroog ke ci’’aand ndax da mbar wiin weene, kaa ci’’el o toroxand a den boo a qool a ƥetak. Toroxand ne da ndoonoogna wiin weene kaa nand’u nen a ƭomaand ŋat a beex.

⁶ Na pe akaaga, xan wiin we a mbaaƭaa fa nqon too nga’kiran. Xan a mbug o nqon, ndaa xan fa nqon a riƈatoox a den.

⁷ Tooroog keene kaa nandtaa pis kaa kesaneena xire, a saq o ndip onqaa nandna fa wurus na qoox den, soo mukit den a nand fo mukit no kiin.

⁸ Kaa saq’u wiil laa nandna nen wiil no tew, soo a ñiiñ den a nand fo a ñiiñ njogoy.

⁹ A saqa no kang den ƥonax kaa nandna nen toki celem, fangax le na nafir ake den a nandtaa fangax a sareet pis mayu akaa na ƈufanaa xire.

¹⁰ Kaa njeg’u a las akaa saqna xa peen nen a beex ake. Na las den akeene koy, doole fee da mbi’taa wiin we paaxeer boo a qool a ƥetak a reeƭu.

¹¹ A njeg’a koy o maad oxaa fodanna a den no xoox le. Ten reeƭu malaaka fee na ngas fiɗel ale, ne’eena na hebre Abadon soo na gerek ta ne’el Apoliyon.

¹² A ƭomaand a eetaand ale a faafa. Cinj kaaga, a ƭomaand a ƭak a lakas a mbarahina o ngar.

¹³ Cinj kaaga, malaaka ɓetuu fa lengandeer fee a luuƥa. Nanaam o ñuxur olaa inoortiidna na xa can xa nahaq axe ngeenin’eena no sadaxand wurus ole refna mbaambir Roog.

¹⁴ O ñuxur ole a hebla malaaka ɓetuu fa lengandeer fee saqna a luuƥ ale yee: «Wokti malaaka nahik ke ngumeena paam o xuluɓ ole Ofrat.»

¹⁵ Maaga, malaaka nahik ke njagandan’eena waxtu feene fa bes feene fo o nqool onqeene fo o hiid oleene a mbokte, ndax da saŋik a qaaj a tadkandeer ale no wiin we.

¹⁶ Liman’eem xiixire we ŋaay’ina pis ke, too a ndeeƭa cuni-cuni boo a caf teemeed ƭik.

¹⁷ No ga es, neeke mat ƴooktum pis ke fo ŋaaŋaay say den: Kaa saq’u toki celem kaa yaxgitna nen fiɗel, a nqiiyiiyit nen njan-ginaar, too a yaayit nen nqeen. A qoox ake no pis ke kaa nand’u nen a qoox njogoy, fiɗel fo fo suun fo nqeen a sutooraa no don den.

¹⁸ A qaaj a tadkandeer ale no wiin we a saŋkooxa no taamaala tadik keene ndeeƭna fiɗel le fo fo suun ole fo nqeen ke sutooroogna no don den.

¹⁹ Doole fee no pis ke, kam xa ton axe fo na las ake a reeƭu. A las ake den kaa nandtoogu pangool kaa njegna a qoox, too den a mbi’toogu wiin we paaxeer.

²⁰ We yoq’ina no wiin we too nqonee no taamaala keene koy, mbes’ee a cinj xa taaƴ axe da mbi’’ina Roog den. Kaa ngen’u no mbaɗooxaa cini ke fo xa taaƴ wurus fo xa taaƴ xaaliis fa nqoolu fo xa taaƴ xanjar fo xa taaƴ ɓil fo xa taaƴ a teex axaa mbaageerna a ka, mbaagee fa nan, mbaagee a ñaaƈ.

²¹ Wiin weene koy, mbes’ee a cinj barir fo pan fo ceeq fo kuuƭ.