Mbeeñil 7 - NQAARIIT NE ROOG

Cuni teemeed we fo cuni qarɓeen nahik we fo cuni nahik we mbogna na xeet fee Isra’el

¹ Yaa kaaga a faafna, ga’aam malaaka nahik kaa ngeenooxna na xa saax xa nahaq axe no lanq ke, a pokoox qeñ nahik ke, ndax nqeñ leng wuuɗkatee took lanq ke mbaat no maag ole mbaat took ndaxar.

² Ga’aam itam malaaka fa lakas faa inoorna farna fo batand, a saq o ñaasir ole Roog fa ñoow jok fee. A falalooxa malaaka nahik ke ci’eena sañ-sañ faa da ndaaɓitna lanq ke fo o maag ole. Kaa layoogu yee:

³ «Ba nu ndaaɓ lanq ke mbaat o maag ole mbaat taxar ke boo yaa i ñaaskaa a tagid ake no we na ndagooxaa a Roog in!»

⁴ Maaga, nanaam we ñaas’eena a limeel boo no cuni teemeed fo cuni qarɓeen nahik fo cuni nahik na carind xarɓaxay fo a carind a ƭak ake Isra’el fop:

⁵ Na carind ale Yudaa cuni xarɓaxay fo cuni ƭik a ñaase, na carind ale Ruben cuni xarɓaxay fo cuni ƭik, na carind ale Gaad cuni xarɓaxay fo cuni ƭik,

⁶ na carind ale Aseer cuni xarɓaxay fo cuni ƭik, na carind ale Neftali cuni xarɓaxay fo cuni ƭik, na carind ale Manaase cuni xarɓaxay fo cuni ƭik,

⁷ na carind ale Simewon cuni xarɓaxay fo cuni ƭik, na carind ale Lewi cuni xarɓaxay fo cuni ƭik, na carind ale Isakaar cuni xarɓaxay fo cuni ƭik,

⁸ na carind ale Sabulon cuni xarɓaxay fo cuni ƭik, na carind ale Yoseef cuni xarɓaxay fo cuni ƭik, fo na carind ale Bensame cuni xarɓaxay fo cuni ƭik a ñaase itam.

Faan maak le

⁹ Cinj kaaga, ɗeetaam too ga’aam faan maak laa o leng a waag’eerna o lim. Wiin weene kaa inoor na xeet fuu refna, no tim oluu refna, no saax luu refna fo na lak fuu refna. Kaa ngeenoox’u mbaambir gamb no maad le, a njasnoor fo o Mbaal onqe, a ndokoox tikoorik tan, a ndeegoox a naaq ngeec.

¹⁰ Maaga, kaa mbalalooxoogu yee: «A muc ale in kaa inoor na Roog in, ten fee moofna no gamb no maad le, a inoor no Mbaal onqe itam.»

¹¹ Malaaka ke fop kaa ngeenoox’u, a mbid o kurul-keƥ gamb no maad le fo maak we fo pindel nahik ke fop. Kaa ngungoogu mbaambir gamb no maad le, soo a mbaɗooxaa a Roog.

¹² A laya yee: «Amiini! Yaam a simat fo o ndam fo o and fo o ngidim fo o niwel fa katil fa doole a ngela a Roog in bo na moos boo moos! Amiini!»

¹³ Naaga, o leng no maak waa a laamtaxam ee: «Ndi we ndokooxna tikoorik tan, aniin oo? Mam a inooru?»

¹⁴ Doonaanum ee: «O yaal es, mee ndax wo andun.» Maaga, a layaxam ee: «Den ndefu we inoorna no ñagadil ƭomu naa. Kaa ndap toki den, a ndan-ginit a den fo’oy le no Mbaal onqe.

¹⁵ Ten taxu da ndef mbaambir gamb no maad le Roog, a ndagooxan ñaal fo o yeng kam mbind um. Oxe moofna took gamb no maad le xan a yookaa a den.

¹⁶ Nqeexkataand, ngoɗomkataand too njeeƈ ne mbaat a sumaan ale ñaatlandkatee a den,

¹⁷ yaam o Mbaal onqe refna ndeer gamb no maad le na refkaa o Kaynaak den. Xan a ɗox a den na cur foofi le na ñoownaa, soo Roog a forit xa kooniit den.»