Mbeeñil 6 - NQAARIIT NE ROOG

Xa ñaas axe

¹ Cinj kaaga, ga’aam o Mbaal onqe a ñaƥtaa o leng na xa ñaas ɓetaa ƭaq axe. Nanaam itam leng no pindel nahik ke a fangooraa nen ƭuuɗ. Kaa layoogu yee: «Gari!»

² Ɗeetaam too ga’aam pis bari, oxe ŋaay’uuna a saq a qali. Ga’aanum ta rokel o ndip. Naaga, a reta nen mbir ndax ta maaf.

³ Cinj kaaga, o Mbaal onqe a ñaƥta o ñaas o ɗikandeer ole, too nanaam mbindel ƭikandeer ne a lay ee: «Gari!»

⁴ Maaga, pis jakeer a feeña. Oxe ŋaay’uuna a coox’e sañ-sañ ndax ta fi njuumoor na adna fee, wiin we a mbarrik. Oxeene a coox’e a laƥ a maak itam.

⁵ Cinj kaaga, o Mbaal onqe a ñaƥta o ñaas o dadkandeer ole, too nanaam mbindel ndadkandeer ne a lay ee: «Gari!» Ɗeetaam too ga’aam pis ƥaal, oxe ŋaay’uuna a saq balaas no ɓay um.

⁶ Maaga, nanaam kaa nandna fo o ñuxur olaa inoorna a ndeer pindel nahik ke, a lay ee: «Ndabid calel ñaal muum fop kilo leng bele yoo mbaat kilo tadik lorso. Kaa koy, ba o fi kaa faaxeerna na diwliin fee fo na biiñ fee.»

⁷ Cinj kaaga, o Mbaal onqe a ñaƥta o ñaas o nahkandeer ole. Maaga, nanaam mbindel nahkandeer ne a lay ee: «Gari!»

⁸ Ɗeetaam too ga’aam pis bari siindiin. Oxe ŋaayuuna, fa nqon a ne’e, soo jaaniif a reefanin. A coox’e sañ-sañ na qaaj a nahkandeer ale no lanq ke, ndax ta saŋkit wiin we laƥ fo biim fa piste fo na pexey ƥaaɓaan ke no lanq ke.

⁹ Cinj kaaga, o Mbaal onqe a ñaƥta o ñaas o ɓetkandeer ole. Maaga, ga’aam yoora o sadaxand ole xa laaw axe no we mbar’eena yaam ne da yegnitoogna fa lay fee Roog fo ke da seede’anoogna a Yeesu no cofel.

¹⁰ Kaa mbalalooxoogu a maak ee: «O Yaal o tedu fo o tigil oxe, boo a mban o cungkaa ndax o hate we ngenna na adna fee, xaw a den, yaam ne da mbar’ina a in?»

¹¹ Roog a cooxa oxuu refna na den ndoki ndan, too a laya a den da ƥaat o ñootnoox o ndik, boo yaa fog gimu we den da yoontoogna no calel ke a soƥiidna a den, den we nar’eena o mbar itam nen a den.

¹² Cinj kaaga, ga’aam o Mbaal onqe a ñaƥtaa o ñaas ɓetuu fo lengandeer ole. Maaga, a jeg’a yo’nax lanq maak, njeeƈ ne a ɓalig ɗok nen ndoki ñaawoor, a qoor ale a yaxig coy nen fo’oy,

¹³ soo xa qoor axe na asamaan a yurdooxiidaa a lanq nen a koƥ ndaxar akaa a und a yo’inna.

¹⁴ Asamaan fee a fokatooxa nen a kayit alaa doreena, xa coong axe fop fo a pimb ake fop a mbuuroox me da ndeeƭna.

¹⁵ Maaga, maad we na adna fee fo maak we fo kelfa ke no xiixire we fo yaal kalal ke fo we njegna sañ-sañ, wiin lakas we fop, faɗ we fo we njegna a qoox den, den fop a naanga suq kam luf ke fo a ndeer a ƥil ake na xa coong axe.

¹⁶ Naaga, a layooga xa coong axe fo a ƥil ake yee: «Ngirdooxyo took in, ndax nu laq a in mukit fee no Xe moofna no gamb no maad le, ngoƭatirand a in fo fuux le no Mbaal onqe,

¹⁷ yaam bes fa maak fee da nqawkaa a in a fadiida, too an na waagkan o haŋ?»