Mbeeñil 20 - NQAARIIT NE ROOG

Jamaane fee na xa kiid juni xe

¹ Yaa kaaga a faafna, ga’aam malaaka fa maak a fudoortiidaa na asamaan, a saq no ɓay um xa caafu xe na ngas fiɗel ale fo a njeen a maak.

² A songa a Niŋki-naŋka, Mbangool ne yaaga refna o ƈiƴ oxe mbaat Saytaane, soo a humin boo xa kiid juni.

³ Malaaka fee a deɓaan kam a ngas fiɗel ale, a wegin fo o jaafu, a fi teen o ñaas, ndax naxkatee qeet ke boo yaa xa kiid juni xe a mbaafkaa. Cinj kaaga, xan a wetel boo a pe a mayeer.

⁴ Yaa keene a faafna, ga’aam a kamb, soo we moofna teen a ci’el sañ-sañ faa da ngate’itna. Ga’ahinaam itam xa laaw axe no we mbarnoor’eena, yaam ne da seede’anoogna a Yeesu, a nqaynaa fa lay fee Roog. Den fa qoox den koy mos’ee o mbaɗoox a Ɓaanoor fo nitaal um, too ndaaw’ee itam o ñaas ole Ɓaanoor na tagid den fo no ɓay den. Weene a nqontooxa, a maadoox fa Kiristaa boo xa kiid juni.

⁵ Keene na refkaa a qontax a eetaand ale. Xon lakas we koy nqontooxkafulee boo yaa xa kiid juni xe a mbaafkaa.

⁶ We na njegkaa a las na qontax a eetaand ale a ƭaaya, too xan a mbarke’el. Fa nqon fa ƭikandeer fee waagkee na den tus, too xan a ndef waa na ƥoxotanaa a Roog fa Kiristaa sadax, a maadoox fa Kiristaa boo xa kiid juni.

Saytaane a maafe

⁷ Boo xa kiid juni xe a mbaafna, xan Saytaane a sutel kaso.

⁸ Maaga, xan a sutoox ndax ta nax qeet ke kam adna fee fop. Den ndefu Gog fa Magog. Xan a fokat a den, da mayit nen pep lanq na ƥeeraamb o maag, da ndet a ngomrikel.

⁹ Den oo weene a inooriidaa no saax oo saax, ndax da mbid o kurul-keƥ saŋe ne no we mbogna na Roog refna teeru fee ta fexna. Kaa koy, fiɗel a inoora na asamaan, a saŋik a den.

¹⁰ Maaga, o ƈiƴ oxe naxoogna qeet keene a joore kam a mbeel fiɗel alaa no nqeen saasu kaa, maa Ɓaanoor fo o tuleer o maamaaɓ oxe a njoor’eena. Xan a toroxandeel ñaal fo o yeng boo faw.

Hate fa mbalakaand fee

¹¹ Cinj kaaga, ga’aam gamb no maad maak ran fo xe moofna teen. Lanq ke fa asamaan fee a qicooxa boo a ngoƭ mukit um, nga’ataand boo xoo.

¹² Maaga, ga’aam xon we, yaal toole fo we neewna doole, da ngeenoox mbaambir gamb no maad le. A jega a safe kaa mbeteena. Safe lakas a wet’e itam, refna ref safe le no ñoow ole. Xon we a ngate’e no ke bind’eena kam a safe ke, oxuu refna na pi um.

¹³ O maag ole a ɓoxota xon we ndeeƭna no ten, fa nqon fa jaaniif a ƥoxot xon we ndeeƭna na den. Den fop a ngate’e, oxuu refna na pi um.

¹⁴ Fa nqon fa jaaniif a njoore kam a mbeel fiɗel ale. A mbeel fiɗel aleene koy refu fa nqon fa ƭikandeer fee.

¹⁵ Oxuu gon um a bind’aandeena kam safe le no ñoow ole, xan a joorel kam a mbeel fiɗel ale.