Mbeeñil 19 - NQAARIIT NE ROOG

¹ Cinj kaaga, nanaam o ñuxur o maak ta inoor no faan no wiin mayu na asamaan, a xaanaa yee: «Haleluyaa! Roog in kaa muclaa! O ndam fa katil a ngelaan!

² Kaa hate’taa ndigil fo o cofel, yaam a hate’a a caga maak ale naxtoogna adna fee ceeq.»

³ A ndakooxahina o nqaan ee: «Haleluyaa!» Fo suun ole no dox ole na teeru fa maak feene oxe yoɗooxaa bo na moos boo moos.

⁴ Maaga, maak qarɓeen ƭik fo maak nahuk we fo pindel nahik ke a ndalfooxa o ngooknoox, a mbaɗoox a Roog fee moofna took gamb no maad le. Kaa nqaanoogu yee: «Amiini! Haleluyaa!»

A put ngulook ale no Mbaal onqe

⁵ O ñuxur a nannooxa, a inoor no gamb no maad le. Kaa layoogu yee: «Simatyo a Roog fee in, nuun fop we na ndagooxan too saɗarin, nuun yaal toole fo we neewna doole!»

⁶ Cinj kaaga, nanaam o ñuxur no faan maak ta fangoortaa nen poofi cegu doole kaa na nqawraa, a saxit nen fangax ƭuuɗ maak. Kaa xaanoogu yee: «Haleluyaa! O Yaal oxe Roog in fee jegna katil, oxe maadooxaa!

⁷ Fat i mbelakinoox, too ƭaay! Kaam ee, fat i simatin, yaam ngulook ne no Mbaal onqe a fadiida, too o toog um a jagandooxa boo a ƴut.

⁸ A ci’e maa ta rokooritna sooy yelefu. Ndoki neene koy kaa meleƈaa too a xool qac.» Sooy yelefu neene kaa ref a pi a cofu ke no we mbogna na Roog.

⁹ Malaaka fee a layaxam ee: «Bindi yee: We nqureena na put ngulook ale no Mbaal onqe a ƭaaya!» Cinj kaaga, a ɓaata teen ee: «Fa lay feeke ndigil kak oo, Roog layun.»

¹⁰ Dalfooxaam o naag giriƥriƥ na caf um ndax um faɗooxin, ndaa a layaxam ee: «Jaɓino o fi! O tag rek refum nen a wo fo nen we fogtoona o ngim na seede’anaa a Yeesu. Roog soom helu o faɗooxel!» Ndigil ne Yeesu a feeñilna na laynooraa duleer we.

Oxe ŋaayna pis bari ne

¹¹ Cinj kaaga, ga’aam asamaan fee a wetoox, too pis bari a feeña. Oxe ŋaay’uuna koy Gor fo Ndigil a ne’e. O cofel a hate’taa, a maafriteel o ten.

¹² A kid um kaa miric-miricnoogu nen aal fiɗel, soo ta rokoox fo ndip fo mayu. A saq’a koy gon binde laa o leng a andeerna a refangee ten.

¹³ Ndoki naa suupeena na fo’oy a rokoox’u, soo gon um a ref «fa Lay fee Roog».

¹⁴ A yaj ake no yaal kumnax ke ndefna na asamaan kaa ndeefanoogun, oxuu refna a ŋaay bari. Weene koy kaa ndokoox’u sooy yelefu kaa ndanigna, too a nqool.

¹⁵ Laƥ mbeelu a sutoortooga no don um, ndax ta xawtin qeet ke. Xan a xurit a den o samb njelem, a mokand xa biiñ axe kam o nirir ole refna fuux ɗomu le Roog fa njegu katil fee.

¹⁶ No ndoki ne ten fo na ñaal ale ten gon lene a binde: «O Maad oxe no maad we fo o Yaal oxe no yaal we.»

¹⁷ Cinj kaaga, ga’aam malaaka faa geenooxna took njeeƈ ne. A falalooxa a maak, a lay a tud ake yetoogna ndeer asamaan fee yee: «Ngaryo mbokatooran a put a maak ale Roog!

¹⁸ Ngaryo ñaam xa tal no maad fo xa tal kelfa no yaal kumnax fo xa tal yaal katil fo xa tal pis fo ŋaaŋaay den fo xa tal no wiin fop, faɗ fo jegu a qoox den, yaal toole fo we neewna doole.»

¹⁹ Cinj kaaga, ga’aam a Ɓaanoor fo maad we na adna fee fo a yaj no yaal kumnax den a mbokatoor, ndax da ñoxor fo Xe ŋaay’ina bari ne fo yaal kumnax um.

²⁰ Naaga, Ɓaanoor a naage nuus a damnoorel, ten fo o tuleer o maamaaɓ oxe fi’’ina xa anddiloor mbaambir um. Xa anddiloor axeene a naxtoogu we ndaaw’ina o ñaas ole Ɓaanoor, soo a mbaɗooxaa nitaal um. Maaga, den ɗik fop a ndeɓe na mbeel fiɗel alaa no nqeen ke moƴna o saas.

²¹ Lakas we koy, laƥ ne sutooroogna no don ole no xe ŋaay’ina bari ne a mbarit’e, soo a tud ake fop a ndef no seeñaa xa tal den.