Mbeeñil 18 - NQAARIIT NE ROOG

Njom ne Babilon

¹ Cinj kaaga, ga’aam malaaka fa lakas a fudoortiidaa na asamaan. A jega sañ-sañ fa maak, too a qoolaand ale inoor’ina no ndam um a xooland’a adna fee fop.

² A falalooxa a maak ee: «Koo a jiƭtooxa, a jiƭtooxa yoo! Babilon fa maak fee! A refata ngenand cini fo o jaɓnoorand o xos a yiif a paaxeer akuu ndefna fo o xos tiiƭ tiimbel kuu ndefna too a sibdel.

³ A yerna qeet ke fop biiñ fee ten refna ceeq. Maad we na adna fee fop a seeqa fo ten, soo jiijikax we na adna fee sax a njegit halal no neq um.»

⁴ Cinj kaaga, nanaam o ñuxur o lakas a inoortiid na asamaan, a lay ee: «Nuun xeet es, sutooxyo teen, ndax nu mbogkee no pakaad ke ten, soo njeg a las no taamaala ke naruuna o ndal,

⁵ yaam pakaad um. Pakaad um keene koy, a ndondrandoora boo na asamaan, too Roog weecee a pi a paaxeer ake ten.

⁶ Mbesooryo fa Babilon ne ta fesooritna fa nuun, ndabdin boo a caf a ƭak ke ta fi’na a nuun. Yipyo o mbeeƭ onqe ten a yer alaa moƴna o xaaɗ a caf a ƭak a yer ale ta fi’an’ina a nuun.

⁷ Ndoonyo took um ƭomu fo toroxand kaa mbodirna fo o ndam onqe fo o neq ole ta jeg’ina. Kaa layooxaa yee: ‹Kaam moof mene nen o maad o tew. Refiim o ñaaw too andkiim ke ñaaw a refna boo muk.›

⁸ Ten taxu, no ñaal leng kut taamaala ke ta geekaneena a ndalkan. Den ndefu jir waawar fo ñaawax fo biim. A koom xan a saŋkitel fiɗel. Yaam o Yaal oxe Roog fee hate’uuna a maya katil.»

⁹ Maad we na adna fee seeqna fo ten, a neqit no ten, xan a naang ciic a lool, a ƭomatoox yaam saax leene, yaa da nga’kaa fo suun ole no dox ole ten.

¹⁰ Xan a mbod koƭu, yaam a saɗaraa coono ke teeru feene a gomkaa. Kaa mbugko layaa yee: «Ndaw sabab! Koo ndaw sabab! E koon Babilon fa maak, teeru fa mayu katil fee! Waxtu fa leng kut a deyaang ndax o xawel.»

¹¹ Maaga, jiijikax we na adna fee fop kaa looloogu itam, soo a ƭomatooxan, yaam o leng jikoogatee cula ke den.

¹² Cula keene koy ndefu: Wurus fa xaaliis fo a ƥil a cafeñu a mosu fo xa peme. Kaa njula’oogu itam piis mosu nen sooy fo daalde fo suwaa fo cuup. A njikooxoogahina o xos a qanq a cafeñu fo kaa fi’teena a ñiiñ fa ñiig fo a teex nqool fa xanjar fo njelem fo a ƥil marbar.

¹³ A njikooxooga kanel fo safnir lakas fo qeeñe-xeeñe fa miir fo cuuraay. Biiñ fa diwliin fo mbiɗel fa bele fo qoox fo paal fo pis fo a sareet bo no faɗ, ndefna wiin ñoow sax, a njega.

¹⁴ Jiijikax weene a layooga teeru faa yee: «Ke cer of a soxla’’ina fop a sooƴa, too ñakaa kalal ke wo fop fo o neq of. Ga’katiro a den boo muk.»

¹⁵ Jiijikax we njula’oogna kam teeru feene fop boo a mayat halal, xan a mbod koƭu, yaam a saɗar coono fee na dalkaa a den. Xan a lool, a ƭomatoox,

¹⁶ a lay ee: «Sabab! Koo ndaw sabab na teeru fa maak fee! Kaa rokoox’u sooy fo daalde mosu, a yipoox wurus bo, a may fo a ƥil a cafeñu fo xa peme!

¹⁷ Na waxtu fa leng kut halal fee ten fop a sooƴa.» We adooxan’ina a kaal ake fo ñaañaaƴ we, maamaag we fo we ngaɗ’ina o ñoow den no maag ole kaa mbod’u koƭu.

¹⁸ Kaa mbuuqoogu ye da nga’na fo suun ole no dox ole ten ee: «E koon, teeru faa nandna nen a teeru fa maak feeke mosee o jeg muk!»

¹⁹ Kaa isdoogu fo ut took a qoox den, a loolaa, a ƭomatooxaa soo a mbuuqaa yee: «Sabab! Koo ndaw sabab na teeru fa maak feeke. Na halal fee ten we njegna a kaal no maag ole fop a njegtu halal. Na waxtu fa leng kut a ñaka fop.

²⁰ Ten taxu wo asamaan, felakinooxi! Nuun we mbogna na Roog fo apootar we fo duleer we, kaam ee mbelakinooxyo, no ne Roog a hate’na teeru feene yaam ɗom le ta fi’na a nuun.»

²¹ Maaga, malaaka fa mayu katil a janga ɓil laa fodirna fo uu-un bele, a deɓin kam o maag ole, a lay ee: «Neene o mat, Babilon, teeru fa maak fee a riimitkaa fa doole, too o leng doonkatiran a ngid boo muk.

²² O qaaxaan mbaat o kiigim mbaat o tiiriiti mbaat o luuluuƥ nanitkataand na wo. O caajal o say o leng soƥkataand na wo, too o leng nankatee oxaa na unaa.

²³ O jam kaƥkatee me wo, too o ñuxur no waa na sogaa ndolnir nanitkataand na wo. Jula we wo koy moƴ’u o njeg doole na adna fee, too kaa naxtoogu qeet ke fop pan ne wo.»

²⁴ Babilon kaa xaw’el yaam fo’oy le no duleer we fo le no we mbogna na Roog fo le no we mbar’eena fop na adna fee kaa soƥel no ten.