Mbeeñil 17 - NQAARIIT NE ROOG

A caga maak ale

¹ Cinj kaaga, fa leng no malaaka ɓetuu ƭik kaa saq’ina fo mbeeƭ ɓetuu ƭik naa a gara a layaam ee: «Gari too xam lalong ne a caga maak ale a hate’itkeel, o ten oxe na moofaa paam poofi maak ke.

² Maad we na adna fee a seeqa fo ten, soo we ngenna na adna fee a mbay fa biiñ fee ten refna ceeq.»

³ Yiif le Roog a gifaxam, soo malakaa fee a ɓisaam na koƥ-a-ƥor alaa. Ga’aam maaga o tew oxaa moofna took Ɓaanoor fa daalde’u fee, a may fo a kon a benir a Roog bo, a saq a qoox ɓetaa ƭaq fo xa can xarɓaxay.

⁴ O tew oxe koy kaa rokoox’u ndoki daalde mosu, soo a yipoox wurus fo a ƥil a cafeñu a mosu fo xa peme. A deegoox’a itam o mbeeƭ wurus onqaa mayna fo cednooxu ƥor ke ta seeqtaa.

⁵ Gon a bind’e na tagid um, ndaa kunpa a reeƭu. Gon kunpa’u leene refu: «Babilon fa maak, yaay fee na caga ke, a ref yaay no wiin we na mbi’aa cednooxu.»

⁶ Ga’aam ee o tew oxe kaa way’u na fo’oy le no we mbogna na Roog fo na fo’oy le no we seede’anoogna a Yeesu. Kaaga a bet’axam lool ye ga’anuuma.

⁷ Maaga, malaaka fee a layaxam ee: «Ndi xar taxu keene a betong? Xam layong ke kunpa fee no tew oxe fa kunpa fee Ɓaanoor ta moofna a tekitna, Ɓaanoor feene jegna a qoox ɓetaa ƭaq ake fo xa can xarɓaxay axe.

⁸ Ɓaanoor fee ga’oona a ñoowooga yaaga ndaa maadatee. Kaa nar o sutoor na ngas fiɗel ale, a ɓisel a saŋkook. We ngenna kam adna fee, a kon den a mbind’aandeena kam safe le no ñoow ole, no kaa xotitna no mberaandoong adna, xan a nga a Ɓaanoor. Ɓaanoor feene a ñoowooga yaaga too maadatee, ndaa xan a nomtooxiid. Keene koy, xan a bet a den.

⁹ Ndiiki, waraa saq o jeg-yiif fo o ƴiƴ. A qoox ɓetaa ƭaq ake kaa ndef xa coong ɓetaa ƭaq axe o tew oxe a moofna. Maad ɓetuu ɗik a ndefu itam.

¹⁰ Ɓetuk na den a saaya. No we yoqna koy, o leng oxe xe maadaa, o lakas oxe mat garafulee, too a garangaa sax oo, miñkee meen.

¹¹ Ɓaanoor fee ñoowoogna yaaga koy too maadatee, ten refu o maad ɓetuu tadkandeer oxe, ndaa a fog’a itam no maad ɓetuu ɗik eetaand we, too xan a ɓisel na saŋkax alaa.

¹² Xa can xarɓaxay axe ga’oona, maad xarɓaxay waa ƥoxotafulaandeena maat den a ndefu. Kaa koy, xan a ci’el sañ-sañ faa da maadoorna fa Ɓaanoor boo waxtu fa leng soom.

¹³ Den fop koy, tig leng kut ke a mbosooxu. A mbuga o ƥoxot a Ɓaanoor katil fee fa sañ-sañ fee da njegna fop.

¹⁴ Xan a song o Mbaal onqe, ndaa xan o Mbaal onqe a maaf a den, yaam ten refu o Yaal oxe no yaal we fo o Maad oxe no maad we. Ten fo we mbogna no ten, ndefna we nqoyeena fo we njileena fo we ngimna, xan a maafandoor a den.»

¹⁵ Malaaka fee a layahinaxam ee: «Poofi ke ga’oona, a caga le a moof paam den, a saax fo a paan no wiin fo qeet fo lak a ndefu.

¹⁶ Xa can xarɓaxay axe fa Ɓaanoor fee ga’oona, xan a sib a caga le, a nguytin, a nqaƴin o ƥor. Cinj kaaga, xan a sanqin, soo ke na yoqkaa no cer um da ndoxin na fiɗel bo tee riw.

¹⁷ Roog kaa ɓek na qeeñ den da mbug o mbi ke ta fosooxna. Ten taxu da ƥoxotaa maat den a Ɓaanoor, boo yaa fa lay fee Roog a fadnooxkaa.

¹⁸ Kaa jolna keene, o tew oxe ga’oona refu teeru fa maak fee na maadooxaa took no maad we na adna fee.»