Mbeeñil 16 - NQAARIIT NE ROOG

Fo mbeeƭ ne yipna fuux le Roog

¹ Cinj kaaga, nanaam o ñuxur o maak olaa inoorna no Mbind Roog ne, a lay malaaka ɓetuu ƭik ke yee: «Ndetyo ƥax took lanq ke fo mbeeƭ ɓetuu ƭik ne yipna fuux le Roog!»

² Malaaka fa eetaand fee a gara, a ɓax o mbeeƭ um a lanq. Maaga, a ƭoy a paaxeer a ƭomu a ndama wiin we saq’ina o ñaas ole Ɓaanoor, too a mbaɗooxoogu nitaal ne ten.

³ Malaaka fa ƭikandeer fee a ɓaxa o mbeeƭ um kam o maag ole. Foofi le a suptooxa boo a nand nen a yal. Naaga, ke ñoowoogna kam o maag ole fop a nqona.

⁴ Malaaka fa ndadkandeer fee a ɓaxa o mbeeƭ um kam xa maag xa maas axe fo kam xa quluɓ axe, soo da suptoox fo’oy.

⁵ Maaga, nanaam malaaka fee jegna sañ-sañ no poofi ke a lay ee: «Kaa o ted, wo fee refna oxe na maadaa fo xe reeƭna. Kaa o jof yaam ne hate’toona neene.

⁶ Yaam kaa ƥax fo’oy le no we mbogna na Roog fo le no duleer we. Ndiiki koy cooxaa a den fo’oy fo yerel. A ndaawa a las den!»

⁷ Cinj kaaga, nanaam o ñuxur olaa inoorna no sadaxand ole a lay ee: «O Yaal oxe Roog fee jegna katil, kate ke wo ndigil kak oo, too a njofa.»

⁸ Malaaka fa nahkandeer fee a ɓaxa o mbeeƭ um took njeeƈ ne. Njeeƈ ne a ci’e o dox wiin we fo a sumaan ale ten.

⁹ A sumaan a ƭomu a doxa wiin we. A ndefata no mbenaa gon le Roog fee jegna sañ-sañ, too a pokoox taamaala keene. A mbañ’a o mbes pakaad den a cinj, a mbañ o ƥoxot a Roog o ndam.

¹⁰ Malaaka fa ƥetkandeer fee a ɓaxa o mbeeƭ um took gamb no maad le Ɓaanoor. Maaga, maat ne ten a dalfooxa o ref no niɓaan. Wiin we kaa ŋatooxoogu yaam a ƭomeel,

¹¹ a mbenaa a Roog fee na asamaan yaam ne da ƭomeel, too a njeg a ƭoy. Kaa koy, yaqanee da mbañ o mbes a cinj a pi a paaxeer ake den.

¹² Malaaka ɓetuu fa lengandeer fee a ɓaxa o mbeeƭ um took o xuluɓ ole Ofrat. Maaga, foofi laa ten a ŋiisa, ndax ta fi’an maad we na inoortiidkaa no batand a ƭat.

¹³ Cinj kaaga, ga’aam cini tadik kaa na nandtaa a paaɓ, a sutooraa no don ole Niŋki-naŋka fo no don ole Ɓaanoor fo no don ole no tuleer o maamaaɓ oxe.

¹⁴ Cini keene koy na mbi’aa xa anddiloor, kaa ndet farna fo maad we na adna fee fop, ndax da mbokat a den, da ñoxorkel no ñaal maak ne Roog fee jegna katil.

¹⁵ O Yaal oxe a laya yee: «Nga’yo, mexey garaa nen o kuuɗ oxaa na ɓeedaa! Oxe ɗaaneerna, too a geek toki um, yaam a fañaa o ñaaƴ fo cer ƥor, a ɗaaya. Oxeene kiin bugee gaci um a feeñ.»

¹⁶ Cini ke kaa mbokat maad we no mbiñ onqe na xoyeel na hebre: Harmagedon.

¹⁷ Malaaka ɓetuu fa ƭikandeer fee a ɓaxa o mbeeƭ um no nqeñ ne. Maaga, o ñuxur o maak a nannoorta no Mbind Roog ne, a inoor no gamb no maad le, a lay ee: «Waxtu fee a fada!»

¹⁸ Maaga, a jega xa kiiñ fo pangax fo ƭuuɗ fo a yo’nax lanq a maak alaa andoona yee naa o kiin a sake mosee o jeg a yo’nax alaa magnitna neene.

¹⁹ Babilon, refna teeru fa maak faa a xaajooxa a qaaj a tadak, teeru ke na saax ake a yen. Neene Roog a dalfooxu o wetandoorit a Babilon fa maak fee, ndax ta yernin o mbeeƭ biiñ onqe yipna fuux sumu le ten.

²⁰ A pimb ake fop a ƈufna, too xa coong axe nga’ataand boo xoo.

²¹ Maaga, a kalam a ƥuuɓu kaa andoona yee o meɗel den a fi’’a ngap kilo qarɓeen nahik, a yentiidooga na asamaan, a ndalaa took no wiin we. Weene a ndefata no mbenaa a Roog, yaam taamaala fee a teƥ aleene a fi’oogna. Taamaala feene koy, a ɗom’a lool.