Mbeeñil 15 - NQAARIIT NE ROOG

Malaaka ke fo taamaala palakaand ke

¹ Cinj kaaga, ga’aam na asamaan o anddiloor o lakas o maak o jom’andtu: Malaaka ɓetuu ƭik a ndeeƭu, a saq taamaala ɓetuu ƭik. Taamaala keene mbalak’u yaam na den fuux le Roog a dayu.

² Cinj kaaga, ga’aam kaa na nandtaa o maag o wendu laa fokatoorna fo fiɗel. Ga’ahinaam we maaf’ina a Ɓaanoor fo nitaal um fo limel ne fodirna fo gon le ten. Kaa ngeenoox’u took o maag o wendu le, a saq fo nqilimb ne Roog a coox’ina a den.

³ Kaa nqaanoogu a kim ale Moyiis fee o tag Roog, a nqaanaa itam a kim ale no Mbaal onqe Roog. Kaa nqaanoogu yee: «O Yaal oxe Roog fee jegna katil, a pi of kaa magin, too a mos! Wo daali maad no qeet ke! Mee ndax yuuƥ ke wo kaa njof, too ndigil kak a ndefu.

⁴ O Yaal oxe, an saɗarkeerong boog? Ndi an na fañkang o ɓoxot o ndam? Wo soom tedu. Qeet ke fop xan a mbaɗooxiidong, yaam a pi a cofu ke wo a mbeeñle a qool qac.»

⁵ Yaa kaaga a faafna, ga’aam na asamaan Mbind Roog ne a wetoox, me Ƭiif ne no ngiɓoor ne Roog a refna.

⁶ Malaaka ɓetuu ƭik ke saq’ina taamaala ɓetuu ƭik ke a sutoora no Mbind Roog ne. Malaaka fuu refna na den kaa rokoox’u sooy ndan fur naa na meleƈaa, a ngumnoox o qap wurus no laf um.

⁷ Leng no pindel nahik kaa a cooxa malaaka ɓetuu ƭik kaa fo mbeeƭ ɓetuu ƭik wurus naa mayna muut fo fuux le Roog fa ñoow jok fee na refkaa boo faw.

⁸ O ndam onqe Roog fa katil fee ten a tax’a Mbind Roog ne a naag kuy fo fo suun. O leng koy waag’atee o rok kam Mbind Roog ne boo neene taamaala ɓetuu ƭik ke no malaaka ɓetuu ƭik ke a mbaafu.