Mbeeñil 14 - NQAARIIT NE ROOG

A kim ale no we mbateena

¹ Cinj kaaga, ɗeetaam, too ga’aam o Mbaal onqe a geenoox took o Joong ole Siyoŋ, soo wiin cuni teemeed we fo wiin cuni qarɓeen nahik we fo wiin cuni nahik we a ndef fo ten, gon le no Mbaal onqe fo gon Faap um a mbindel na tagid den.

² Nanaam o ñuxur olaa inoorna na asamaan, a jibtaa nen poofi maak kaa na nqawraa, a fangoortaa nen ƭuuɗ maak. O ñuxur ole nanuuma kaa nandtoogu itam nen o ñuxur no riiriiti waa na nqilimbaa.

³ Wiin weene kaa ngimoogu a kim a qas mbaambir gamb no maad le fo mbaambir pindel nahik ke fo maak we. Kaa koy, o leng waag’ee o aqatoox a kim ale, a refangee wiin cuni teemeed we fo wiin cuni qarɓeen nahik we fo wiin cuni nahik we mbat’eena na adna fee.

⁴ Den ndefu we njegeerna soɓe, yaam mosee o yoon fo o tew. Kaa ndeefoogu o Mbaal onqe muu ta jofoogna. Kaa mbat’el ndeer no wiin we, a ndefan a Roog fo o Mbaal onqe nen taawlax.

⁵ O maaɓ o leng mosee o sutoor no don den, yaam njegee sik fa leng.

Malaaka tadik ke

⁶ Cinj kaaga, ga’aam malaaka fa lakas faa na yetaa ndeer asamaan fee. Kaa saq’u Yegil mbaax naa faafkeerna muk, ndax ta yegnin we ngenna na adna fee, na xeet fuu refna fo no tim oluu refna fo na lak fuu refna fo no saax luu refna.

⁷ Kaa layoogu fo o ñuxur o maak ee: «Saɗaryo a Roog, too ƥoxotin o ndam, yaam waxtu fee na hate fee ten a fadiida. Fat nu mbaɗoox oxe sakna asamaan fee fo lanq ke fo o maag ole fo xa quluɓ axe.»

⁸ Malaaka fa ƭikandeer a reefana fa eetaand fee, a lay ee: «Koo a jiƭtooxa, a jiƭtooxa yoo! Babilon fa maak fee yerinna qeet ke fop biiñ fee ten, refna a yaaw a paaxeer ake na seeqnooraa.»

⁹ Malaaka fa ndadkandeer a reefana malaaka ƭik eetaand ke, a lay a maak ee: «Oxuu faɗooxna a Ɓaanoor fo nitaal ne ten, soo a daaw o ñaas um na tagid um mbaat no ɓay um,

¹⁰ oxaaga kiin xan a yer na biiñ fee no fuux le Roog. Biiñ feene koy julaand tus, too Roog kaa yipan no feeƭ ole saqna fuux le ten. We na mbesooraa neene koy, xan a toroxandel kam fiɗel laa fo nqeen kaa mbaambir malaaka tedu ke fo mbaambir no Mbaal onqe.

¹¹ Maaga, fo suun ole na fiɗel le na toroxandaa a den xan a naag kiw a yoɗoox boo xoo. We na mbaɗooxaa a Ɓaanoor fo nitaal um koy, fo xuu andoona yee a daawa o ñaas ole no gon um, weene fop njegkee a ñootnax ñaal fo o yeng.

¹² Ten taxu we mbogna na Roog, a ngeek kebil um, a ngim na Yeesu, a mbara o lalit o saƭkel.

¹³ Cinj kaaga, nanaam o ñuxur olaa inoorna na asamaan, a layaam ee: ‹Bindi keeke: We na nqonaa no Yaal oxe no ke xotitna ndiiki a ƭaaya! Yiif le Roog a yegnita yee keene ndigil oo: Xan a mbaagat o ñootnoox no calel ƭomu ke da ngomoogna, yaam a pi den xan a ndeefan a den.› »

A saxad ale na adna fee

¹⁴ Ɗeetaam too ga’aam eel ran fur, too took eel leene, oxaa nandtoogna o ƥiy no kiin moof’u teen. Kaa rokoox’u o ndip wurus, a pokoox a ñand a beelu.

¹⁵ Malaaka fa lakas a sutoora no Mbind Roog naa, a falaloox a maak oxe moof’ina took eel le yee: «Jangi a ñand of too geew, yaam waxtu a saxad a fadiida. Adna fee a foora, too a fade o saxad.»

¹⁶ Maaga, oxe moof’ina took eel le a daalandooxa lanq ke fo a ñand um, too lanq ke a saxadooxa.

¹⁷ Malaaka fa lakas a sutoora no Mbind Roog ne na asamaan. Ten itam a saq’a a ñand a beelu.

¹⁸ Cinj kaaga, malaaka fa lakas fee jeg’ina sañ-sañ na fiɗel le a inoora no sadaxand ole. Naaga a falalooxa a maak fee saqna a ñand a beelu le, a lay ee: «Daalandooxi fo a ñand a beelu le wo, woq tuunq biiñ ke a lanq, yaam a mboora.»

¹⁹ Naaga, malaaka fee a daalandooxa lanq ke fo a ñand um. A geewa tuunq biiñ ke, a ɓek a den kam o nirir o maak ole refna fuux le Roog.

²⁰ Xa biiñ axe a nolte kam o nirir ole tafil teeru fee. Maaga, fo’oy a sutoora no nirir ole, a xay boo ngap kilomeet teemeed tadik. O qooɗel um koy a reta boo a waag o laxaaɓ pis.