Mbeeñil 13 - NQAARIIT NE ROOG

Ƥaanoor ƭik ke

¹ Cinj kaaga, ga’aam a Ɓaanoor a sutooraa no maag olaa. A saq’a xa can xarɓaxay fo a qoox ɓetaa ƭaq, o jan oluu refna a saq o ndip, a kon a benir a Roog a mbindel na qoox ake ten.

² Ɓaanoor fee ga’uuma koy kaa nandtoogu o ƴaxal, a caf um a nandtaa a caf ursu, o don um a nandtaa o don njogoy. Niŋki-naŋka a doxnaan katil um fo maat um fa sañ-sañ fa maak fee ten.

³ Leng na qoox akaa no Ɓaanoor kaa jeg’u ngaañax naa na nandtaa kaa na waraa, ndaa miñee dara ngaañax mbaawar ne a woda. Adna fa muum kaa njaaxiɗ’u, too a ndeefana a Ɓaanoor.

⁴ Adna fee fop a mbaɗooxooga a Niŋki-naŋka, yaam ne ta doxin’ina a Ɓaanoor sañ-sañ um. Kaa mbaɗooxoogu a Ɓaanoor itam, too a layaa yee: «An nandu fa Ɓaanoor? Ndi an waagu o maafir fo ten?»

⁵ Ɓaanoor koy, a ci’e o lay a ƭelem a ñexetu, ndax ta wentin a Roog. A ci’e sañ-sañ feene boo a qool qarɓeen nahik fo a qool a ƭak.

⁶ A dalfooxa o xasanaa a Roog, a wenaa gon um fo ngenand um fo fop we ngenna na asamaan.

⁷ A ci’e o maafir fo we mbogna na Roog, ndax ta maaf a den. A ci’e sañ-sañ no tim oluu refna fo no saax luu refna fo na lak fuu refna fo na xeet fuu refna.

⁸ We ngenna na adna fee fop xan a mbaɗooxin. Weene ndefu we a kon den a mbind’aandeena no safe le no ñoow ole, no kaa xotitna no mberaandoong adna. Safe leene koy, o Mbaal onqe war’eena jegun.

⁹ «Oxuu jegna nof, fat a nan-giloox!

¹⁰ Oxuu jagandaneena mbaƭ, xan a ref o paɗ. Oxuu jagandaneena o wartel laƥ, xan a wartel laƥ. Ten taxu we mbogna na Roog a mbara o lalit o saƭkel fo o ngim.»

¹¹ Cinj kaaga, ga’aam ɓaanoor fa lakas faa ɗuqtooritna kam lanq ke. Xa can xa ƭaq axaa na nandtaa xa can mbaal a saq’u, a laytaa nen Niŋki-naŋka.

¹² Kaa jiriiñoortoogu sañ-sañ fee na Ɓaanoor fa eetaand fee mbaambir um. A ser’a adna fee fo we ngenna teen da mbaɗoox a Ɓaanoor fa eetaand fee, ngaañax mbaawar um a wod’ina.

¹³ Ɓaanoor fa ƭikandeer feene kaa fi’oogu xa anddiloor xa maak: A fudnitiidooga fiɗel na asamaan, ta yeniid a lanq mbaambir a kid ake no wiin we.

¹⁴ Kaa mo’andoogu we ngenna na adna fee fo xa anddiloor axe ta ci’eena o fi’aa mbaambir Ɓaanoor fa eetaand fee. Naaga, a laya we ngenna na adna fee da mbi nitaal naa nandna fa Ɓaanoor fee laƥ a gaañ’ina, too yaqanee ta maad o ñoowaa.

¹⁵ Ɓaanoor fa ƭikandeer fee a ci’e o ɓek o laaw olaa na fiɗaa no nitaal ne nandna fa Ɓaanoor, ndax nitaal neene a waag fa lay, a waag o fi boo we mbaɗooxkeerna nitaal ne nandna fa Ɓaanoor a nqon.

¹⁶ Ɓaanoor feene a serooga wiin we fop, yaal toole fo we neewna doole, siide fo rool, faɗ fo jegu a qoox den, da ñaasel no ɓay o ñamaak fo na tagid.

¹⁷ O leng waag’ee o jik tig mbaat o jikoox, too jegiro o ñaas oleene refna gon le Ɓaanoor mbaat limel ne fodirna fo gon le ten.

¹⁸ Mene koy waraa o jeg o and. Oxuu jegna yiif, fat a lim limel ne Ɓaanoor, yaam limel neene gon no kiin a fodritu, too teemeed ɓetuu fa leng fo qarɓeen ɓetuu fa leng fa ɓetaa fo leng refu limel neene.