Mbeeñil 11 - NQAARIIT NE ROOG

Seede ɗik we

¹ Cooxeem o siind o liiƥir olaa na nandtaa o samb, too layel ee: «Reti liiƥ Mbind Roog ne fo o sadaxand ole, too lim we na mbaɗoortaa teen fop.

² Fat o xaƴ o maax-tafil ole no Mbind Roog ne koy, ba o liiƥin, yaam kaa ci’el qeet ke ndefeerna Yaawuur, too xan a nduut teeru fa tedu fee boo a qool qarɓeen nahik fo a qool a ƭak.

³ Xam luliid seede ɗik we mi da njo’tanaxam, a ñaawoor xa saaku boo ñaal juni fo ñaal teemeed ƭik fo ñaal qarɓeen ɓetuu fa leng.»

⁴ Seede ɗik weene ndefu taxar oliiw ƭik ke fo a pagal a ƭak xa lampa ake mbodna mbaambir no Yaal oxe jegna adna fee fop.

⁵ Oxuu bugna o fañ a den, a fi a den paaxeer, xan fiɗel a sutoor no don den, a saŋkin. Oxuu bugna fi a den paaxeer sax oo, neene mat a waritkeel.

⁶ Yaam seede ɗik weene a njega sañ-sañ faa da mbegitna asamaan fee, ndax a teƥ jegkatee no ñaal ke da mbugko o njo’tanaxam. A njega itam sañ-sañ faa da suptitna foofi fo’oy fa sañ-sañ faa da nqawitna adna fee fop xa ƭomel xa pagkatar a mbanuu ta felna a den.

⁷ A yegnitangaa nduleer den boo a ƈut, xan Ɓaanoor fee na sutoorkaa na ngas fiɗel ale a song a den, a maaf a den, soo a war a den.

⁸ Maaga, xan xa tal den a liilel no nqel naa na teeru fa maak faa, maa o Yaal den a reng’eena. Teeru feene gon le Sodoom fa Misira a naxoorte.

⁹ No saax luu refna fo na xeet fuu refna fo no tim oluu refna fo na lak fuu refna xan wiin a ƭeetaa xa tal den boo ñaal tadik fa genwal, too taxkee da njaɓ o ƥoxot a den da ngaskel.

¹⁰ Maaga, xan adna fa muum a mbelakinoox, too a ndef no ɗaay na fa nqon fee no seede ɗik weene. Xan a lultiraa a ƭang a ndeer den, yaam duleer ɗik weene njom’andoogna adna fee.

¹¹ A cinj ye ñaal tadik keene fa genwal fee a mbaafna, yiif laa na ñoowdandaa a inoora na Roog, a rok na den. Den ɗik a inooxa, a ngeenoox, too we nga’na a den a ndiida diid maak.

¹² Maaga, duleer ɗik we a nana o ñuxur olaa inoorna na asamaan, a lay ee: «Ŋaayiidyo mene!» Naaga, a ŋaaya na asamaan kam eel, soo fañ we den a ndef no ƭeetaa a den.

¹³ Na waxtu faaga, a jega a yo’nax lanq a cegu doole, too a qaaj xarɓaxayandeer ale na teeru faa a girdooxa. Wiin cuni ɓetuu ƭik a nqona na yo’nax alaaga no lanq ke. Lakas waa koy kaa ndiid’u boo a ƥoxotaa a Roog fee na asamaan o ndam.

¹⁴ A ƭomaan a ƭikandeer ale a faafa, ndaa a tadkandeer ale oxe garaa no ñofu, mbootooxyo boog!

A luuƥ ɓetuu ƭikandeer ale

¹⁵ Cinj kaaga, malaaka ɓetuu fa ƭikandeer faa a luuƥa, too a jega na asamaan xa ñuxur xa maak axaa layoogna yee: «Maat ne na adna fee a ɓoxote o Yaal in fo o Muumucil oxe ta regitna, too xan a maadoox bo na moos boo moos.»

¹⁶ Maaga, maak qarɓeen ƭik fo maak nahuk we moof’ina na kamb den mbaambir Roog a ngungooga a lanq, a mbaɗooxaa a Roog. Kaa layoogu yee:

¹⁷ «Wo o Yaal oxe Roog o Cegu katil oxe, in we ngidmang, wo fee refna oxe na maadaa fo xe reeƭna, yaam ne pokooxoona katil maak ne wo soo maadooxaa.

¹⁸ Qeet ke fop kaa mbuux’u boo a mbuɓaa, ndaa waxtu fee waroona o fuux fa waxtu fee waroona o hate we nqonna a fadiida. Waxtu fee waroona o saɗig dag we wo na njo’tanang, waxtu fee o saɗigkaa we mbogna na wo, a saɗarong, ta ref yaal toole ke mbaat we neewna doole, a fadiida. Waxtu fee waroona o gef we na ngefaa adna fee a fadiida.»

¹⁹ Maaga, Mbind Roog ne na asamaan a dalfooxa o wetoox, soo arka ne no ngiɓoor ne a feeñit kam fee. A jeg’a xa kiiñaand fo pangax fo ƭuuɗ fo a yo’nax lanq fo a teƥ a kalam a ƥuuɓu.