Mbeeñil 10 - NQAARIIT NE ROOG

Malaaka fee fo o njafe nqe

¹ Ga’aam malaaka fa njegu doole fa lakas a fudoortiidaa na asamaan, a huloox eel, soo a ñang-ee-ñang a yooroox xoox um. Mukit um kaa meleƈoogu nen njeeƈ, a caf um a miric-miricnaa nen aal fiɗel.

² A deegoox’a o njafe nqaa weteena. A doona a caf um a ñamaak no maag ole, a caf um a canoon, ta dakin na jeeri fee.

³ Naaga, a falalooxa a maak nen njogoy naa na bumbaa. Ye ta falalooxna, ƭuuɗ ɓetuu ƭik ke a mbangooxa, a njaaɓanin.

⁴ Ye ƭuuɗ ɓetuu ƭik ke a mbangooxna, bug’aam o bind, ndaa nanaam na asamaan o ñuxur olaa layaxama yee: «Dami ke ƭuuɗ ɓetuu ƭik ke a layna rek, too fañ o bind.»

⁵ Maaga, malaaka fee ga’uuma ta geenoox no maag ole fo na jeeri fee a yoɗa o ɓay um o ñamaak farna fa asamaan.

⁶ A daaɓoorta oxe na ñoowaa bo na moos boo moos. Oxeene refu oxe sakna asamaan fo ke ta moŋna, a sak lanq ke fo ke ta moŋna, a sak o maag ole fo ke ta moŋna. Malaaka fee a daaɓooxa yee: «A cung jegkatee!

⁷ Kaa koy, yaa malaaka ɓetuu fa ƭikandeer fee a luuƥkaa, xan yuuƥ kunpa’u ne Roog a fadnoox ne ta yegnit’uuna duleer we ten ndagooxooguuna yaaga.»

⁸ Cinj kaaga, o ñuxur ole nan’uuma na asamaan a layahinaxam ee: «Reti xot o njafe nqe weteena no ɓay ole na malaaka fee geenooxna no maag ole fo na jeeri fee.»

⁹ Naaga, retaam farna fa malaaka fee, too xeɗaanum ta cooxaam o njafe nqe. A doonaxam ee: «Am! Ƴaxeen! Xan a xaaɗ no soosoox of, ndaa xan a saf nen suum no don of.»

¹⁰ Xotaam o njafe nqe no ɓay ole na malaaka fee. Luuxaanum, too a safa nen suum no don es. Kaa koy, ye ɗuudanuuma, ñasiil’eem.

¹¹ Maaga, layeem ee: «Warahinaa o jo’tanaa a Roog farna fo a saax a mayu fo qeet mayu fo lak mayu fo maad mayu.»