Mark 9 - NQAARIIT NE ROOG

¹ Yeesu a dakooxa o lay a den ee: «No ndigil, mexe layaa a nuun ee: Leng-leng no we ndefna meeke nqonkee, too nga’ee Maat ne Roog a garaa fa katil.»

Yeesu a suptooxa

² A cinj ñaal ɓetuu fa leng, Yeesu a ɓislooxa a Piyeer fa Saak fa Saŋ, soo a ŋaay fa den no joong o goƭu took, maa da ndeeƭna den soom. Maaga a suptooxa mbaambir den.

³ Toki um a meleƈa, a ndanig fur. Jeg’ee koy took lanq ke o suusuup o leng oxaa waagna ran-ginit naaga toki.

⁴ Maaga, Eliya fa Moyiis a mbeeñooxa a den, a layaa fa Yeesu.

⁵ Piyeer a laya a Yeesu yee: «O Caajangin oxe, a tef ale in mene a fela lool. Fat i sip mene ƭiif tadik: Leng of, leng Moyiis fo leng Eliya.»

⁶ And’ee ke ta warna o lay, yaam daalbe we kaa ndiid’u lool.

⁷ Eel a gara, a muur a den. Maaga, o ñuxur a nannoorta kam eel laa, too a lay ee: «Oxene refu o Ƥees onqe fexuuma fex. Nan-gilooxeenoo!»

⁸ Ndak fo ndak, daalbe we a ƭeeta me widna a den, ndaa nga’ee o lakas a refangeerna Yeesu soom.

⁹ Yaa da mbudoortaa no joong olaa, Yeesu a maƭooxa a den ee baa da lay o leng ke da nga’na boo yaa o Ƥeenqe no kiin oxe a xontooxkaa a ndeer no xon we.

¹⁰ A ngeekayo fa lay feene, ndaa a laamtirooga a ndeer den ee: «Xar xontoox a ndeer no xon we a tektu?»

¹¹ Daalbe we a laamtaan ee: «Xar taxu boog jaajangin we no kebil ke Moyiis a layaa yee Eliya a wara o eet o gar?»

¹² A doona a den ee: «Ndigil oo de, Eliya a wara o eet o gar, ndax ta jagandatin fop. Yaaga boog, xar taxu a Pind a Tedu ke a lay ee o Ƥeenqe no kiin oxe xan a coono mayu, soo a ñagadilel?

¹³ Kaa koy, mexe layaa a nuun ee Eliya a gara boo a ƴut, too wiin we a mbi’aan naa felna a den, ne a Pind a Tedu ke a laytuuna no ten.»

Yeesu a wondanda o njaaƈ onqaa jini a damna

¹⁴ Yaa Yeesu fo daalbe daduk waa a mbadiidna paam daalbe lakas waa, a nga’a faan maak a ndeer a den fo jaajangin we no kebil ke Moyiis ñimatiroogna fa den.

¹⁵ Yaa wiin waa a nga’na a Yeesu, a njaaxiɗ’a, too a ƈufiida ndax da simnin.

¹⁶ Yeesu a laamta a den ee: «Na xar nu ñimatiraa fa den?»

¹⁷ O leng no faan laa a doonaan ee: «O Caajangin oxe, kaam ɓisiidong o ƥees onqaa jini a damna, soo a yaqanan ta lay.

¹⁸ Muu ta damtuuna, kaa maafan a lanq, a naaga o jegaa a puur no don um, too kaa ƴaxaa a ñiiñ ake, cer um a naangat saƭ a mbeer. Dimle’nooxaam daalbe we wo, ndax da ndax jini fee, ndaa mbaagiran.»

¹⁹ Yeesu a laya a den ee: «Xeet fa ngimaƭaru! Kaam refkaa fa nuun boo a mban? Kaam ee kaam gadooxkaa a nuun boo a mban? Ƥisiidaamoo o ten!»

²⁰ A ɓisiide o ten, too ndak fo ndak yaa jini faa a ga’na a Yeesu, a yo’na o njaaƈ onqe ta naag dal a yen a lanq, a firkilooxaa, soo a puur a sutooraa no don um.

²¹ Yeesu a laamta a faap faa yee: «Mban keeke a damun?» Faap faa a doonaan ee: «No ndeƥandoong um boo fa ndiik,

²² too leek-leek jini fee a naagaan o riñaa kam fiɗel mbaat kam foofi, ndax ta saŋkin. Kaa koy, yirmi a in, too ƴufig a in, o waagangaa teen tig.»

²³ Yeesu a layaan ee: «O waagangaa, layo! Oxe gimna a waaga fop, dara ɓoowiran.»

²⁴ Ndak fo ndak, faap fee no ƥeenqe a wuuqa yee: «Gimaam! Gari ƴufgaam no ngimaƭar es!»

²⁵ Yaa Yeesu a ga’na wiin mayu waa a ƈufiidaa, a ŋala jini faa, soo a layin ee: «Jini fa muumu, too a ram, mexe heblang o ten, sutooxi o ndeɓandoong onqene, too ba o rokat no ten!»

²⁶ Jini faa a sutoora xa ƥiic, a yo’nin a maak. O ndeɓandoong onqe a fi’at nen kaa xon boo jaaku a layataa yee a xona.

²⁷ Kaa koy, Yeesu a damaan o ɓay, a inin, soo ta geenoox.

²⁸ Yaa Yeesu a rokna no mbind naa, daalbe we soom a ngara, a laamtin ee: «Xar taxu i mbaag’ee o ndax jini feene?»

²⁹ A laya a den ee: «Na pexey a qeƭ [fo koor] soom o kiin a waagu o sutit jini fa nandu neeke.»

Yeesu a dakooxa o yegnit fa nqon um fo a qontax um

³⁰ Yeesu fo daalbe we ten a inoora maaga, soo a nqaañ kam Galile. Yeesu bug’ee anddel,

³¹ yaam kaa jangnoogu daalbe we ten, too a layaa a den ee: «O Ƥeenqe no kiin oxe xan a ɓoxotel a ndeer xa ƥay axe no wiin we. Xan a mbarin, ndaa ñaal tadik a cinj fa nqon um xan a xontoox.»

³² Kaa koy, daalbe we and’ee ke fa lay feene a tekitna, too kaa saɗar’un o laamit.

An hupu no Maat ne Roog?

³³ A mbadiida Kapernawum. Yaa ta rokna no mbind naa, Yeesu a laamta daalbe we yee: «Xar nu ñimatiroogu na ƭat ale?»

³⁴ Kaa koy, a naanga cel, yaam na ƭat ale kaa ñimatiroogu a ndeer den, ndax da and oxe hupna.

³⁵ Maaga, Yeesu a moofa, a xoy xarɓaxay fo ɗik we, too a lay a den ee: «Boo o kiin a bugna o ref o aa-adax, a wara o ref oxe falakanna fop fo o tiidimle no fop.»

³⁶ Cinj kaaga, a xota o ndeɓandoong o ndutuuñ, a geennin a ndeer den, soo a ɓopin, a lay a den ee:

³⁷ «Oxuu genarna o ndeɓandoong o ndutuuñ o mbodu nene yaam mi, mi a genaru, too oxuu genaraxama, refee yee mi a genaru, ndaa oxe lulaxama.»

Oxuu fañeerna a in, fa in a faru

³⁸ Saŋ a laya a Yeesu yee: «O Caajangin oxe, i nga’a o koor oxaa na raxaa cini ke no gon of, too i mbug’aan o mbañit o ten, yaam yoonee fa in.»

³⁹ Kaa koy, Yeesu a doona yee: «Ba nu mbañtin o ten, yaam jegee o leng oxaa waagna o fi a pi katil no gon es, soo ndak fo ndak ta lay paaxeer na mi.

⁴⁰ Oxuu fañeerna a in, fa in a faru.

⁴¹ Oxuu ci’na a nuun a tokol foofi no gon es, yaam ne Kiristaa a jegna a nuun, no ndigil, mexe layaa a nuun ee: Ñakkee o daaw ndabid um.»

We na mbakaadnooraa wiin we

⁴² «Oxuu tolofnoorna o leng na xa teɓandoong axene ngimna na mi, kaa moƴna no xeene kiin ta rokel ɓil unir no cok soo a deɓel no maag olaa.

⁴³ Boo o ɓay of a ɓekang na bakaad, ɗegeen! Rok kam o ñoow ole fo o ɓay o leng moƴu o jeg xa ƥay xa ƭaq, soo deɓel kam fiɗel laa ñufkeerna boo muk. [

⁴⁴ Maaga max ke na yaqaa cer ke nqonkee, too fiɗel le ñufkee muk.]

⁴⁵ Boo a caf of a ɓekang na bakaad, ɗegeen! Rok kam o ñoow ole fo a caf a leng moƴu o jeg a caf a ƭak, soo deɓel kam fiɗel laa ñufkeerna boo muk. [

⁴⁶ Maaga max ke na yaqaa cer ke nqonkee, too fiɗel le ñufkee muk.]

⁴⁷ Boo a ngid of a ɓekang na bakaad, luqteen deɓin! Rok no Maat ne Roog fo a ngid a leng moƴu o jeg a kid a ƭak, soo deɓel kam fiɗel laa ñufkeerna boo muk.

⁴⁸ Maaga max ke na yaqaa cer ke nqonkee, too fiɗel le ñufkee muk.

⁴⁹ Yaam o kiin oxuu refna xan a jemaƭtel fiɗel.

⁵⁰ Fo jem a faaxa lool, ndaa fo jem o mat a jematangee, xar waagatu o tax ta jem? Njegyo fo jem na qoox nuun, too ñoowaa na jam a ndeer nuun.»