Mark 8 - NQAARIIT NE ROOG

Yeesu a ñoowdanda wiin cuni nahik

¹ Na pe akaaga, faan maak a mbokatoorahina. Ne da njeg’eerna dara kaa da ñaamna, Yeesu a xoya daalbe we ten, a lay a den ee:

² «Wiin wene kaa yuɗaam lool, yaam ñaal tadik key kaa da ndefna a paam es, too njegatee tus kaa da ñaamna.

³ Boo nomtuuma a den fo nqeex, xan a ñak doole na ƭat ale, yaam leng-leng na den koƭu a inooru.»

⁴ Daalbe we ten a ndoonaan ee: «Kam a koƥ-a-ƥor alene, nam o kiin a waagu o jegit puuru kaa ngiñna a den?»

⁵ Yeesu a laamta a den ee: «Puuru podnum nu njegu?» A ndoonaan ee: «Puuru ɓetuu ƭik.»

⁶ Maaga, Yeesu a hebla wiin waa fop da moof a lanq. A janga puuru ɓetuu ƭik kaa, soo a gidim a Roog. Cinj kaaga, a xusta a den, soo a cooxin daalbe we ten, ndax da lastin. Naaga, a lasaan faan laa.

⁷ A njeg’a itam fo liƥ fo leng-leng. Yeesu a gidma a Roog, soo a lay daalbe um, ndax da lastin itam.

⁸ Fop a ñaama boo a ngiñ, too yoq kaa da nqaadit’ina a reeƭa a cenjel ɓetaa ƭaq a mayu muut.

⁹ Waa ndeeƭna maaga a mbad’a ngap wiin cuni nahik. Cinj yaa Yeesu a nomitna a den,

¹⁰ ndak fo ndak a roka no suk naa, ten fo daalbe um, soo a ret no saax laa Dalmanuta.

Farisiya we a laamta o anddiloor

¹¹ Farisiya we a ngara, a ñimatiraa fa Yeesu. A mbugaan o ƭeetloox, too a laamtaan o anddiloor olaa inoorna na asamaan.

¹² Yeesu a gatandooxa no yiif um, a lay ee: «Xar taxu xeet fene a laamtaa o anddiloor? No ndigil, mexe layaa a nuun ee: Xeet fene cooxkaand o anddiloor o leng.»

¹³ Cinj kaaga, Yeesu a xaƴa a den maaga, soo a rokatin no suk naa, ndax ta xaañ o maag olaa.

Poɗaxnir ke no Farisiya we

¹⁴ Daalbe we a mbeec’a o ƥisloox ñaamel. Mbuuru leng soom a saq’u no suk naa.

¹⁵ Yeesu a maƭooxa a den kene: «Mbootooxyo too yetoox no poɗaxnir ke no Farisiya we fo ke Herood.»

¹⁶ Daalbe we a layra yee: «Ne i saqeerna puuru taxu ta layaa keene.»

¹⁷ Yaa Yeesu a andna ke da ŋur-ŋurnoogna, a laya a den ee: «Xar taxu nu layraa yee nu saqee puuru? Ndax kaa tig refee na qoox nuun? Ndax kaa nu ndefkahinaa no ñak-o-and? Ndax xeeñ nuun kaa saƭik?

¹⁸ Nu njega a kid, xar taxu koy nu naangee o nga’aa? Nu njega nof, xar taxu nu naangee o nanaa? Ndax nu mbetandooxee?

¹⁹ Ye xustanuuma wiin cuni ƥetik we puuru ƥetik ke, a ƭamba podnum akaa mayna muut fo xa ƭeg nu nqaadit’u?» A ndoonaan ee: «A ƭamba xarɓaxay fo a ƭak.»

²⁰ «Ye xustanuuma wiin cuni nahik we puuru ɓetuu ƭik ke, a cenjel a podnum akaa mayna muut fo xa ƭeg nu nqaadit’u?» A ndoonaan ee: «A cenjel ɓetaa ƭaq.»

²¹ Maaga, a laya a den ee: «Ndax nu andee boo ndiik?»

Yeesu a wodanda o puul kam Betsayda

²² Yaa Yeesu fo daalbe we ten a mbadiidna Betsayda, Yeesu a ɓisiide o puul, too wiin we a nqeɗooxaan, ndax ta duqin.

²³ A dama o puul oxaa no ɓay, a ɓisin kaltaa saate faa. Cinj kaaga, a ɗuuma a tuxid na kid ake no koor oxeene, a doonin xa ƥay, a laamtin ee: «Ndax waagaa o ga tig?»

²⁴ O puul oxaa a yoɗa a kid um, soo a lay ee: «Ƴookaam wiin, ndaa kaa nandaam nen taxar, too kaa ñaaƴaa.»

²⁵ Yeesu a dakooxa o doon xa ƥay um took a kid ake no koor oxe, too yaa o puul oxaa a naagna jar a ɗeet, a wod’a, too a ga’ooga fop a qool qac.

²⁶ Maaga, Yeesu a nomtaan no mbind um, a layin ee: «Ba o rok kam saate fee.»

Piyeer a laya yee Yeesu refu Kiristaa fee

²⁷ Yeesu fo daalbe we ten a ndeta kam a saax akaa matna Kesare faa Filip, too ye da ndefna na ƭat ale a laamta a den ee: «An wiin we a layaa yee o ten refum?»

²⁸ A ndoonaan ee: «Leng we kaa layaa yee Saŋ o Paabatiise xe, lakas we a layaa yee Eliya, soo lakas we a layahinaa yee o leng no duleer we.»

²⁹ Maaga, a laamta a den ee: «Nuun o mat, an nu layu yee o ten refum?» Maaga, Piyeer a doonaan ee: «Wo refu Kiristaa fee o Muumucil oxe regteena.»

³⁰ Maaga, Yeesu a maƭooxa a den ee baa da layin o leng.

Yeesu a yegnita fa nqon um fo a qontax um

³¹ Maaga, Yeesu a fertu o jangnaa daalbe we ten ee: «O Ƥeenqe no kiin oxe a wara o ñagadilel. Xan maak we fo saasadax maak we fo jaajangin we no kebil ke Moyiis a mbañin. Xan a warel, ndaa cinj ñaal tadik xan a xontoox.»

³² A laya a den keene a qool qac. Piyeer a sayooxa fo ten, soo a ref no xasanan.

³³ Kaa koy, Yeesu a geleerooxa, a ɗeet daalbe waa ten, a xasan a Piyeer, too a lay ee: «Saytaane, riƈatooxaam! Yaam a qalaat of mbogree fo a qalaat Roog, a qalaat no kiin oo.»

³⁴ Cinj kaaga, Yeesu a xoya faan laa fo daalbe waa ten, too a lay a den ee: «Oxuu bugaxama o reefan, fat a wuus o ñis um, a gadooxaa bes fuu refna a kurwaa um, soo a reefanaam.

³⁵ Oxe na bugkaa o mucil o ñis um, xan a ñakin, ndaa oxe na ñakkan yaam mi, a ñakin itam yaam Yegil mbaax ne, xan a muclin.

³⁶ Xar a jiriiñkaa o kiin ta jeg adna fee fop yaa ta ñakna o laaw um?

³⁷ Ndi xar o kiin a sofitkaa o laaw um?

³⁸ Oxuu sedaxama, a sed fa lay es ndeer xeet fene na seeqaa, too a mbakaadaa, xan o Ƥeenqe no kiin oxe a sedin yaa ta garkaa kam o ndam Faap um, a yoon fo malaaka tedu ke itam.»