Mark 4 - NQAARIIT NE ROOG

A naxax ale no tuuduuf oxe

¹ Yeesu a dakooxa o ret na ƥeeraamb alaa no Maag olaa Galile, a jangnaa. Yaa wiin mayu a mbokatoorna paam um, a roka no suk, a moof. Suk naa koy, kam o maag olaa a reeƭu. Wiin waa fop na ƥeeraamb alaa a ngeenoox’u.

² A jangnooga a den na naxax a mayu, too a laya a den na cangin ale ten ee:

³ «Nan-gilooxyo: O tuuduuf sutoox’u a duufik.

⁴ Ye ta sulaa, a seek a leng no ax ke a sama kam a ƭat ale, soo tiiƭ ke a ngar a ñaamin.

⁵ A seek a lakas a sama maa fi’na ƭeŋkeleer, too mayee mbuuƴ. A looƴ’a no ñofu yaam ne mbuuƴ ne a mayeerna.

⁶ Yaa njeeƈ naa a sumna, a leeƥa, too a weera, yaam jegee a paƴ.

⁷ A seek a lakas a sama maa jegna kiƈ. Kiƈ ke a maaka, too a ngoñaan boo jegee xa tim.

⁸ A seek a lakas a palakaand ale a sama no lanq paax ke. A maaka, too a sulta. Mbep leng a rima qarɓeen tadik, lakas qarɓeen ɓetuu fa leng, soo lakas a rim pep teemeed.»

⁹ Maaga Yeesu a laya yee: «Oxuu jegna nof nanir, fat a nan-giloox!»

Ke taxna Yeesu a laytaa a naxax

¹⁰ Yaa Yeesu a riƈatooxna wiin mayu waa, we ndeerooguuna fo xarɓaxay fo ɗik we a laamtaan ke a naxax akeene a tekitna.

¹¹ A laya a den ee: «Kaa nu ci’el kunpa fee no Maat ne Roog, ndaa no we ndefna tafil, fop kaa war o fi’tel a naxax.

¹² Neene, a naangangaa o ƭeetaa, nga’kee, too a naangangaa o nanaa itam, andkee, yaam ndik da saktoox na Roog, soo a mbaasanel pakaad den.»

Yeesu a tekta a naxax ale no tuuduuf oxe

¹³ Yeesu a dakooxa o lay a den ee: «Nu andee ke a naxax alene a tekitna! Nam nu anditkaa a naxax a lakas ake fop boog?

¹⁴ O tuuduuf oxe, fa lay fee Roog a duufaa.

¹⁵ Wiin leng-leng kaa nand fo a ƭat ale, me fa lay fee a samna. Ye da nanuuna, ndak fo ndak Saytaane a gara, soo a watin fa lay fee duufeena kam den.

¹⁶ Lakas we itam neene: We ndaawna ax ke samna no ƭeŋkeleer ne ndefu we nanna fa lay fee, a njaɓin ndak fo ndak fo o ɗaay,

¹⁷ ndaa njegee a paƴ na den sax sax. Kaa ndef wiin damlooxeer, too koy boo andoona yee o njaaxɗataan mbaat ñagadil a ngara yaam fa lay fee Roog, a naangaan o ndalfooxaa o mbes a cinj.

¹⁸ Lakas a ndaawa ax ke nduufeena kam kiƈ ke. Den ndefu we na nanaa fa lay fee,

¹⁹ ndaa a qalaat ake na adna fee fo ne halal adna a ƴiƴtaa a den fo a yuxum ake no ñoow ole kaa ngoñaa fa lay fee boo mbaagkee o ndim.

²⁰ Lakas a ndaawa ax ke nduufeena no lanq paax ke. Den ndefu we na nanaa fa lay fee, a njaɓin, soo a ndimaa: Mbep leng xan a rim qarɓeen tadik, lakas a rim pep qarɓeen ɓetuu fa leng, soo lakas a rim teemeed.»

A naxax ale no lampa le

²¹ Cinj kaaga, Yeesu a laya a den ee: «Ndax xan o kiin a heƥand o lampa, soo a sagin a saxal mbaat ta ɓekin yoora njong? Mee ndax kaa ɗagan!

²² Yaam jegee dara kaa ɗasna, too ñuqitkaand. Jegee itam kunpa fa leng faa ɗasna, too weejilkaand.

²³ Oxuu jegna nof nanir, fat a nan-giloox!»

²⁴ Yeesu a layahina a den ee: «Mbootooxyo no ke nu nanaa. Xan nu eedantel ke nu eedtaa boo mbuuña’el.

²⁵ Keene mat taxu oxe jegna xan a ci’el, ndaa oxe jegeerna, onqe ta jegna sax xan a jaɓel.»

A naxax ale no ax ke soxla’eerna o nqooxel

²⁶ Yeesu a dakooxa o lay ee: «Maat ne Roog kaa nand fo o kiin oxaa duufna ax a lanq.

²⁷ Kuu ta ɗaanaa mbaat ta ɗeetaa, ñaal oo yeng oo, nduup ne kaa looƴaa, a maakaa. Oxeene kiin koy andee ne duufe le a maaktaa.

²⁸ Lanq ke soom na saxnaa ke duufeena: O kangafaan ole na eetaa o sutoox, o yaƥ ole a doonoox, soo pep ke a mbeeñit no yaƥ ole.

²⁹ Boo o yaƥ ole a foorna, o kiin oxe a naaga o saxadtaa a ñand, yaam ne a saxad ale a fadna.»

A naxax ale no xonq seneew ole

³⁰ Yeesu a dakooxa o lay ee: «Xar i nandanditkaa Maat ne Roog, ndi a naxax alum i mbaagun o laltit?

³¹ Kaa nand fo o xonq seneew olaa andoona yee ye ta duufeel a lanq, ten refu ke moƴna o neew no ax ke fop.

³² A cinj ye ta duufeena boo a sax, a hupata tuufe-duufe ke fop, too a saxa a naaq a maak boo tiiƭ ke na asamaan a mbaag o ndut yoora yook um.»

³³ Na pexey a naxax a mayu a nandu neene Yeesu a yegnitoogu a den fa lay fee, naa da mbaag’uuna o andit.

³⁴ A naxax rek a laytoogu fa den, ndaa boo ta reeƭna fo daalbe we ten soom, a tektanooga a den fop.

Yeesu a riimanda a und

³⁵ No kirand naa na bes fa leng kut faaga, Yeesu a laya daalbe we ten ee: «Fat i laqtook kaltaa o maag ole.»

³⁶ Cinj yaa daalbe waa a nomitna wiin mayu waa, a ƥisa a Yeesu no suk naa ta reeƭna, too a jeg’a suk lakas kaa ndeeƭna a paam um itam.

³⁷ Maaga, a und a maak a yoɗooxa, too a yag-ee-yag ake a yipooxooga kam suk ne boo ta mayat sax.

³⁸ Yeesu o mat kaa ɗaanoogu no xoox le no suk ne took hakandax le. Daalbe we ten a yokaan, too a layin ee: «O caajangin oxe, ndax a saŋkax in kaa haalirang?»

³⁹ Yeesu a inooxa, a ŋal nqeñ ne, too a lay o maag ole yee: «Naagi tek, too riim!» Nqeñ naa a riima, too fop a naag’ata yereŋ.

⁴⁰ Yeesu a laya daalbe we yee: «Xar taxu nu ndiid? Nam nu ñaktu nene o ngim?»

⁴¹ Diid maak a dama a den, too a layrooga a ndeer den ee: «O kiin oxene an a refu boo nqeñ ne fo o maag ole sax a nananan?»