Mark 3 - NQAARIIT NE ROOG

O yaal o ɓay o xaru le

¹ Yeesu a roka kam mbind a qeƭ naa. O koor oxaa o ɓay um a xarna a reeƭa maaga.

² Wiin waa a ngorooxooga a Yeesu a paax boo a nga, ndax xan a wodand o koor oxeene na bes fee na ñootnax ale, yaam kaa mbug’un o njamb.

³ Yeesu a laya o yaal o ɓay o xaru le yee: «Inooxi a ndeer den.»

⁴ Cinj kaaga, Yeesu a laamta waa ƭeetoogna yee: «Xar a ƭat ale in a simtu? O fi paax na bes fee na ñootnax ale ndi fi paaxeer? O mucil o kiin ndi o warin?» Den o mat mbug’ee o ndoon.

⁵ Naaga, Yeesu a ɗeeta a den fop, too a fuux. A naqadiloox’a sax yaam a qeeñ a saƭku ke den. A laya o koor oxe yee: «Letni o ɓay of.» A letnaan, too o ɓay um a woda boo ceŋ.

⁶ Farisiya waa a sutooxa mbind a qeƭ naa, soo a ngukrik ndak fo ndak fo we mbogna na qaaj ale Herood, ndax da ƭeet ne da mbaagkaa o saŋkit a Yeesu.

Wiin mayu a ngara me Yeesu

⁷ Yeesu a riƈatooxa fo daalbe we ten, a xot farna fa ƥeeraamb alaa no Maag olaa Galile, too wiin mayu a ndeefanaan. Kaa inoortiidoogu Galile fa Yudee

⁸ fa Yeerusaleem fa Idume fo kaltaa Yordaan fo teeru kaa mbidna Tiir fa Sidoŋ. Wiin mayu weene a ngara me Yeesu, yaam kaa nan’u ke ta fi’oogna fop.

⁹ Maaga, Yeesu a hebla daalbe we ten da mbaaƭanin suk ndeɓ, ndax wiin mayu waa ndakkiran,

¹⁰ yaam waa njir’ina fop kaa ƥiikloogun ndax da nduqin, took ne ta wodandoogna wiin mayu.

¹¹ A mbanuu cini ke a nga’uuna, a yenooga na caf um, soo a mbuuqaa yee: «Wo refu o Ƥeenqe Roog!»

¹² Kaa koy, Yeesu a maƭooxa a den a paax ndax yegnitikkiran.

Yeesu a jila apootar xarɓaxay fo apootar ɗik

¹³ Cinj kaaga, Yeesu a ŋaaya took o joong olaa, a xoy we ta bugna, too a ngara me ten.

¹⁴ A jila taaga xarɓaxay fo ɗik waa ta ne’na apootar. Kaa jil a den itam, ndax da ndef fo ten, a ndet a mbaare’ik,

¹⁵ soo a njeg sañ-sañ faa da ndaxtaa cini ke.

¹⁶ Wene ndefu xarɓaxay fo ɗik we ta jilna: Simoŋ fee Yeesu a feran’ina Piyeer

¹⁷ fa Saak fa Saŋ o ndeɓ um, ndefna den ɗik fop xa ƥiy Sebede xe Yeesu a moolan’ina Bowanerges, ten tektu xa ƥiy ƭuuɗ.

¹⁸ A jila itam a Andare fa Filip fa Bartelemi fa Mace fa Tomaa fa Saak fee o ƥiy Alfe, a jil a Tade fa Simoŋ oxe na xoxtaa saax um

¹⁹ fa Yudaa o Iskariyot oxe na retkaa a ɓoxot a Yeesu.

Ƥasil ne Yeesu a mbugaan o ƥis

²⁰ Cinj kaaga, Yeesu a nomtooxiida no mbind naa, too wiin mayu a ndakooxa o mbokatoor, boo Yeesu fo daalbe we mbaag’ee o ñaam sax.

²¹ Yaa fog we Yeesu a nanna ke xewna, a ngara ndax da ƥisin, yaam a layoogu yee: «Yoonatee fa sagu um.»

Bakaad yaam fañ Yiif Tedu le

²² Jaajangin waa no kebil ke Moyiis inoortiid’ina Yeerusaleem kaa layoogu yee: «Belsebul refu fo ten.» Lakas we a layaa yee: «Na pexey o maad oxe no cini ke a raxtaa cini ke.»

²³ Yeesu a xoya a den, too a naxoox a den ee: «Nam Saytaane a waagu o raxit a xoox um?

²⁴ Boo we mbogna maat a nqaajoorna a ndeer den, maat naaga waagee o miñ,

²⁵ too boo we mbogna mbind a nqaajoorna a ndeer den, xan mbind neene a gef tuƈ, yaam waagkee o geenoox.

²⁶ Yaaga boog, boo Saytaane a siiknoorna fa xoox um, xan a xaajoox. Naaga, waagkee o geenoox naŋ, too xan a ref muukandoong um.

²⁷ O leng waagee o rok no mbind no kiin o cegu doole, soo a jaɓ halal um fop, a refangeerna kaa eetin o hum. Naaga soom a waagu o gefit mbind um.

²⁸ No ndigil, mexe layan a nuun, pakaad ke no wiin we fo a ben ake den da mosna o mben a Roog fop a mbaage o mbaasanit.

²⁹ Kaa koy, oxuu wenna Yiif Tedu le, waasankaand o ten boo muk. A fi’a bakaad fa ñufkeer boo faw.»

³⁰ Yeesu a layta naaga yaam ne da layoogna yee: «Jini damun.»

Ya Yeesu fo xa teɓ axe Yeesu

³¹ Ya Yeesu fo xa teɓ axe Yeesu a mbadiida, a ngeenoox tafil mbind naa, a lul o kiin ndax ta xoyin.

³² Wiin mayu kaa ndeer’un, too a layaan ee: «Reti jaaɓik! Ya of fo xa teɓ of owe tafil, a mbaaƭang.»

³³ Yeesu a doona a den ee: «An refu ya es? Aniin ndefu xa teɓ es?»

³⁴ Maaga, a ɗeeta waa moof’ina, a ndeerin, too a laya yee: «Wene ndefu ya es fo xa teɓ es.

³⁵ Yaam oxuu na fi’aa ke Roog a bugna, oxaaga o ndeɓ es o ngoor oo, o ndeɓ es o ndew oo, ya es oo.»