Mark 15 - NQAARIIT NE ROOG

Yeesu mbaambir Pilaat

¹ No nqes naa, yaa mbeet naa a xoolaa, saasadax maak waa a mbokatoora fo maak waa fo jaajangin waa no kebil ke fo Mal maak ne fop, ndax da ƭaap pexey den. Yaa da ngumna a Yeesu boo a ƈut, a ƥisaan, soo a ƥoxotin a Pilaat.

² Pilaat a laamtaan ee: «Wo refu o maad oxe no Yaawuur we?» Yeesu a doonaan ee: «Wo ne’un!»

³ Saasadax maak we a njambooga a Yeesu mayu.

⁴ Maaga, Pilaat a dakooxaan o laamit ee: «Ndax kaa doonkiro dara? Ndax naniro ke da njambang fop?»

⁵ Kaa koy, Yeesu doonatee dara, too kaaga a bet’a a Pilaat lool.

Yeesu a hate’e

⁶ Na Xew a colandax aluu refna, wiin we a njilooga oxaa felna a den no we mbegeena kaso, ndax Pilaat a sutanin a den.

⁷ A jeg’a oxaa dameena kaso, too a ne’el Barabaas. Ten fo yoon um kaa mbog’u no we mbi’’ina boom boo a mbar o kiin.

⁸ Faan laa a ndeta maa Pilaat, soo a ndef no laamtan ke ta mer’ina o fi’anaa a den.

⁹ Pilaat a doona a den ee: «Ndax nu mbuga um xaƴan a nuun o maad oxe no Yaawuur we?»

¹⁰ A laya neene, yaam a and ee saasadax maak we kaa siisoogu a Yeesu, boo ten taxu da ƥoxotin.

¹¹ Kaa koy, saasadax maak we a ƈaxa wiin mayu waa nof, ndax da nqeɗ a Pilaat, ta xaƴan a den a Barabaas.

¹² Pilaat a dakooxa o lay faan laa yee: «Xar nu mbugu boog um fi no xe nu nqoyaa o maad oxe no Yaawuur we?»

¹³ A mbuuqa yee: «Rengeen na kurwaa!»

¹⁴ Pilaat a laamta a den ee: «Paaxeer kum a fi’u?» Kaa koy, a moƴa o mbuuq ee: «Rengeen na kurwaa!»

¹⁵ Pilaat a buga o fi ke faan le a mbugna, a xaƴa a Barabaas, a xawnoor a Yeesu xa cap, soo a ɓoxotin, ndax ta rengel na kurwaa.

Yeesu a xaadnooxe

¹⁶ Xiixire waa a ƥisa a Yeesu no xeloorand olaa, soo a nqoy xiixire waa fop,

¹⁷ a ndokan a Yeesu lori yaxgu coy, a ndiw o ndip kiƈ, soo a ndokanin o ten no xoox.

¹⁸ Cinj kaaga, a ndefa no simnan ee: «Daali maad no Yaawuur we, walid!»

¹⁹ A mbadtoogaan o kangafaan no xoox, a nduxdaa took um, too a ngooknooxooga mbaambir um nen kaa mbaɗooxan.

²⁰ Yaa da nqaadnooxuuna boo a ƈut, a mbola lori yaxgu coy naa, soo a ndaknin tikoorik um. Cinj kaaga, a ƥisaan tafil, ndax da ndengin na kurwaa.

Yeesu a renge na kurwaa

²¹ A sera o koor oxaa joon’ina maaga, a inoor na koƥ alaa, ndax ta gadoox a kurwaa le Yeesu. O koor oxeene Simoŋ a ne’e, a gen Kireen, a ref faap Aleksaandar fa Rifis.

²² A ƥisa a Yeesu no mbiñ onqaa ne’eena Golgota, tekitna «o mbiñ onqe no Nqolof ne».

²³ A mbug’aan o coox biiñ faa juleena miir, ndaa Yeesu yer’iran.

²⁴ A ndengaan na kurwaa, a nqaajir tikoorik um, ye da mbanjangna, ndax da and ke oxuu refna a daawkaa.

²⁵ Na waxtu njeeƈ-tanqin a reeƭu, yaa da ndengan na kurwaa.

²⁶ Ndax da lalit ke tax’ina ta rengel, a bind’e no jul ole na kurwaa le yee: «O maad oxe no Yaawuur we».

²⁷ Guuɗ ɗik a ndeng’e paam Yeesu, o leng oxe na ñamaak, o lakas oxe na janoon. [

²⁸ Neene, ke a Pind a Tedu ke a layna a fadnoortu: «A ɗeet’e nen saasaay kaa.»]

²⁹ Dak-a-faaf we kaa mbenoogun, soo a mbulaa a qoox, a layaa yee: «Heey! Wo fee bug’ina o gef Mbind Roog ne, soo maxatinin no ñaal tadik,

³⁰ mucli a xoox of! Fudooxi a kurwaa le.»

³¹ Saasadax maak we fo jaajangin we no kebil ke Moyiis a nqaadnooxoogaan ee: «A mucla lakas we, too waagee o mucil a xoox um.

³² Fat Kiristaa fee o Muumucil oxe regteena refna o maad Isra’el a fudoox a kurwaa le ndiiki, ndax i nga too ngim.» Waa ndeng’eena fo ten itam kaa mbenoogun.

Yeesu a saaya

³³ Na waxtu njeeƈ ndeer xoox, a jeg’a o niɓaan took lanq ke fop, boo na waxtu a kirandax.

³⁴ Na waxtu a kirandax Yeesu a wuuqa fo o ñuxur o jegu doole yee: «Eloyi, Eloyi, lema sabaxtaani?» Ten tektu: «Roog es, Roog es, xar taxu o xaƴaam?»

³⁵ Yaa leng-leng no waa ndeeƭna maaga a nanuuna, a laya yee: «Nanyo, oxe xoyaa a Eliya.»

³⁶ O leng na den a ƴufa, a suupik liir na bineegar, a morgin no siind, soo a cooxin ndax ta yer. Maaga, a laya yee: «Nqaƴyo boo i nga, ndax xan Eliya a gar a fudnin!»

³⁷ Kaa koy, Yeesu a wuuqa a maak, soo a saay.

³⁸ Mbaƴ naa fegit’eena o mbiñ o tedu nqaa no Mbind Roog naa a naagta faceet took boo a sip a lanq.

³⁹ Yaa o aa-adax oxaa no xiixire teemeed waa reeƭna mbaambir Yeesu a ga’na naa ta fadnoorit’ina, a laya yee: «O kiin oxeeke reeƭu o Ƥeenqe Roog ndigil.»

⁴⁰ A jeg’a itam rew waa mat’ina maaga, a ƭeetaa. Mari-Magdala fa Mari fee ya Saak fa ndeɓ fa Yoose fo o tew o ne’e Salome a mbog’a no rew waaga

⁴¹ ndeefoogna a Yeesu, too a ndimle’an ye ta refna Galile. A jega itam rew lakas mayu waa yoon’ina fo ten boo Yeerusaleem.

Yeesu a gase

⁴² No kirand naa, a jopir da mbaajanaa Xew fee na colandax ale, too bes fee na ñootnax ale a war’u o ref no feet olaa,

⁴³ Yoseef fee genna Arimate, too a ref o koor o niwe no Mal maak naa a gara. Ten fa xoox um itam kaa cungoogu Maat ne Roog. A jeg’a njambaar naa ta retitna maa Pilaat, ndax ta xeɗin o dal ole Yeesu.

⁴⁴ Fa nqon fa ñofu fee Yeesu a bet’a a Pilaat. A xoya o aa-adax oxaa no xiixire teemeed waa, soo a laamtin ndax Yeesu a miñ’a o xon.

⁴⁵ Yaa ta wooruuna yee a xona, a ɓoxota a Yoseef o dal olaa.

⁴⁶ Yoseef a jika njoor, a fudin a Yeesu na kurwaa le, a laxasin o ten, soo a ɓekin kam a mboy alaa sexeena no ɓil. A berenga ɓil maak, ndax ta wegtin ndokand naa na mboy alaa.

⁴⁷ Mari-Magdala fa Mari fee ya Yoose a ƭeetooga me ta geekeena.