Mark 12 - NQAARIIT NE ROOG

A naxax ale no xooxoox soxodu we

¹ Cinj kaaga, Yeesu a refa no naxooxaa a den ee: «O yaal mbind a jimba a ƭing taxar biiñ, a ɗingin, soo a waq kam faa o nirir. A maxa taaga o yetooxand. Maaga, a doxnaan xooxoox, da nar o nqaajran fo ten, soo a ñaaƴik no saax jan.

² Yaa a saxad alaa a fadna, a lula o tag um maa no xooxoox waa, ndax ta daaw a las um no ke saxadeena.

³ Kaa koy, a ndama o tag oxaa, a nqawin, soo a nomtin ƥay ƥor.

⁴ A lulahina o tag o lakas. A nqaaña oxaaga, soo a mbi’in cednooxu.

⁵ A mbi’a naaga dag lakas mayu. A nqawa leng we, soo lakas we, da mbar a den.

⁶ O ƥeem onqe ta fexna fex soom yoq’u. Ten a falaku o lulaa maa den, yaam kaa layoogu yee: ‹Xan a niw o ƥees.›

⁷ Kaa koy, xooxoox waa a layra a ndeer den ee: ‹O lam oxe xe garaa. Fat i mbarin, soo yoqat fo ke ta warna o lam.›

⁸ A ndamaan, a mbarin, soo a ndeɓin kaltaa a ƭing alaa.

⁹ Ndiiki koy, xar o yaal a ƭing ale a fi’kaa? Xan a gar, a saŋik xooxoox we, soo a doxin a ƭing ale wiin lakas.

¹⁰ Ndax nu njangee kam a Pind a Tedu ke fa lay fene: ‹Ɓil le maamax we a ndeɓ’ina refatu ɓil faraaj le.

¹¹ Keene no Yaal oxe a inooru, too njomlaand oo na kid in.› »

¹² Aa-adax we a mbaaƭooga naa da ndamtuuna, yaam a and’a xil ee den o mat taxu Yeesu a lay a naxax aleene. Kaa koy, kaa saɗar’u wiin mayu waa. Ten taxu a nqaƴaan, soo a ndet.

Roog fa Kesaar fee

¹³ Farisiya leng-leng fo waa mbogna na qaaj ale Herood a lule paam Yeesu, ndax da mbogin na fa lay um.

¹⁴ A ngara, a layin ee: «O Caajangin oxe, i anda yee o kiin o booru refo. A ƭat of yongee no leng itam, yaam naagiro o ɗeetaa ne wiin we a nandna, too kaa o jangnaa a ƭat Roog no ndigil. Ndax i mbara o ndabid a Kesaar fee a bateer? I mbara o ndabid, ndi i mbaree o ndabid?»

¹⁵ Yeesu a anda yememaar naa den, too a doona a den ee: «Xar taxu nu mbogaxam? Ƥisiidaamoo o xanjar o leng boo um ga.»

¹⁶ A ƥisiidaan o xanjar o leng. Maaga, Yeesu a laamta a den ee: «Nitaal nene fo a pind akene, an jegu a den?» A ndoonaan ee: «Kesaar fee.»

¹⁷ Maaga, a laya a den ee: «Ƥoxotyo boog a Kesaar fee ke Kesaar fee a jegna, soo ƥoxot a Roog ke Roog a jegna.» O doonanqol ole Yeesu a bet’a a den.

Kaa farna na qontax ale no xon we

¹⁸ Leng-leng no Sadusiya we na layaa yee a qontax jegee a ngara me Yeesu, soo a laamtin ee:

¹⁹ «O Caajangin oxe, Moyiis kaa bindan a in ee: Boo o maag no kiin a xonna, soo a xaƴ meen o teem, too jegee fo ten o ƥiy, o ndeɓ um a wara o lam o tew oxe, a sakan o maag um ƥasil.

²⁰ A jeg’a koy o maag fo xa teɓ ɓetaa fo leng um. O maag oxe a gilga, a xon, too jegee xa ƥiy.

²¹ O ƭikandeer oxe a lama o ñaaw oxe, a xon, too xaƴee xa ƥiy. Naaga a refit’u no tadkandeer oxe itam.

²² Ɓetuu ɗik waa fop a nqona, too o leng na den xaƴee xa ƥiy. A cinj den fop, o tew oxe a xona itam.

²³ Ii, ndiiki koy, kaa i laamtang: Na bes faa na qontax alaa, an na den na jegkaa o tew oxe, yaam ɓetuu ɗik we fop a ndolin’aan.»

²⁴ Yeesu a doona a den ee: «Kaa nu mo, yaam nu andee a Pind a Tedu ke, katil fee Roog ne’aand.

²⁵ Na qontax alaa no xon we, goor we ngiligkatee, too rew we ndolooxkatee, ndaa xan a nand fo malaaka ke ndefna na asamaan.

²⁶ No kaa farna na qontax ale no xon we, ndax kaa nu njangee no safe le Moyiis ke layeena no ngol naa? A binde maaga yee Roog a laya a Moyiis ee: ‹Mi refu Roog fee Abraham, Roog fee Isaak fa Roog fee Yakoob.› »

²⁷ Yeesu a ɓaata teen ee: «Roog refee Roog fee no xon we, ndaa Roog fee no ñoow we. Nuun o mat, kaa nu mo tigi.»

Kebil ne hupna no kebil ke

²⁸ O leng no jaajangin waa no kebil kaa Moyiis a nan’a da ñimatiraa. Yaa ta andna yee Yeesu a ɓur’a Sadusiya we, a matiidaan, a laamtin ee: «Kebil num hupu o njiriiñ no kebil ke?»

²⁹ Yeesu a doonaan ee: «Oxene refu eetaand ne: ‹Wo Isra’el, nan-gilooxi! O Yaal oxe Roog in soom refu o Yaal oxe.

³⁰ Xan o fex o Yaal oxe Roog of no xeeñ of fop, no laaw of fop, na qalaat of fop fo na doole of fop.›

³¹ Oxene refu ƭikandeer ne: ‹Xan o fex o kend of nen a xoox of.› Jegatee kebil lakas naa hupna weene.»

³² O caajangin oxe no kebil kaa a layaan ee: «Jook a njal, o Caajangin oxe, layaa ndigil ee Roog fa leng kut jegu, too jegee fa lakas a refangee o ten.

³³ Fex a Roog no xeeñ of fop fo na qalaat of fop fo na doole of fop, soo fex o kend of nen a xoox of moƴu yee o ɓoxotaa a Roog sadax fa ndoxel mbaat sadax kuu ndefna.»

³⁴ Yeesu a ga’a yee a doon’aan fo o jeg-yiif. Maaga, a layaan ee: «Wo de, goƭiro Maat ne Roog.» Cinj kaaga, o leng saɗ’atiran o laamit tig.

Yeesu Kiristaa o ndaan Dawid fo o Ƥeenqe Roog

³⁵ Yaa Yeesu a jangnaa kam Mbind Roog naa, a laamta yee: «Nam jaajangin we no kebil ke Moyiis a mbaagu o layit ee Kiristaa fee o Muumucil oxe regteena o Ndaan Dawid oo?

³⁶ Yaam na pexey Yiif Tedu le, Dawid a laya ten fa xoox um ee: ‹O Yaal oxe a laya o Yaal oxe mi yee: Moofi na ñamaak es, boo yaa fi’uuma fañ we wo me o dakaa.›

³⁷ Dawid fa xoox um sax kaa xoyan ‹o Yaal oxe›. Nam a waagu o refit o ndaan um koy?» Wiin mayu a nan-gilooxoogaan fo o ɗaay.

Yeesu a xasana jaajangin waa no kebil kaa

³⁸ A laya wiin waa ta jangnoogna yee: «Mbootooxyo jaajangin we no kebil ke mbexna o ndokooxaa a ndoki maak, too a mbex o simneel no qel ke.

³⁹ Kaa mbaaƭaa maa da mboditna mbaambir kam pind a qeƭ ke fo xa moofand xa paax axe no qew ke.

⁴⁰ Kaa njaɓaa ke ñaaw we a njegna fop, a yoonandtin a qeƭ a ciig, ndax da ƭeetel nen jofu. Weene wiin na moƴkaa o ƭomiɗ hate.»

O tew o ñaaw oxe sadaxitna ke ta jegna

⁴¹ Cinj kaaga, Yeesu a moofa paam o geekand olaa me sadax ke no Mbind Roog ne a yipoogeena, too a ɗeetooga ne wiin mayu a ƥektoogna xaaliis fee. Yaal kalal mayu a yipooga xaaliis fa mayu.

⁴² O ñaaw o ndool a gara, soo a ɓek xa piftin xa ƭaq axaa mbi’na ngap genwal o derem.

⁴³ Maaga, Yeesu a xoya daalbe we ten, too a lay a den ee: «No ndigil, mexe layaa a nuun ee: O ñaaw o ndool onqene moƴu o yip wiin lakas we fop.

⁴⁴ Yaam lakas we fop, xaaliis fee da soxla’eerna a sadaxtu, ndaa o ten o mat, kam o ñak um, a cooxta fop ke ta jeg’ina, reeƭna ñoowir um.»