Mark 11 - NQAARIIT NE ROOG

Yeesu a rokiida Yeerusaleem

¹ Yaa da mbadiidna Betfage fa Betani farna fo Joong olaa no taxar oliiw kaa paam Yeerusaleem, Yeesu a lula ɗik no daalbe we ten,

² a lay a den ee: «Ndetyo na saate fee refna mbaambir nuun. Boo nu ndokna taaga rek, xan nu soƥ maaga o mol o mbaam onqaa humeena, too o leng mosiran o ŋaay. Mbokteenoo, ƥisiidaam o ten!

³ Boo o kiin a laamitna a nuun ee: ‹Xar taxu nu mbi’aa keene?› Fat nu ndoonin ee: ‹O Yaal oxe soxla’un, too xan a dakniidin ndiiki.› Maaga, xan a xaƴin ta gar ndak fo ndak.»

⁴ Daalbe waa a ndeta, a soƥ o mol onqaa humeena tafil paam begax ne na ƭat ale, soo a mboktin.

⁵ Leng-leng no waa ndeeƭna maaga a laya a den ee: «Xar nu mbi’aa? Xar taxu nu mboktaa o mol onqeene?»

⁶ A ndoonta a den ne Yeesu a layit’uuna a den, too a nqaƴe a ndet.

⁷ A ƥisiida a Yeesu o mol onqe, a ƭapanin toki ke den, soo Yeesu a moof took fee.

⁸ Wiin mayu a ƭaapa toki den na ƭat ale, soo lakas we a ƭaapaa a naaq akaa da ƭegit’ina na xa qol axe.

⁹ We adoox’ina a Yeesu fo we ndeefan’uuna a mbalalooxooga yee: «Hoosiyana! Oxe na garaa no gon le no Yaal oxe a hela simatel.

¹⁰ Maat ne na garaa a hela simatel, maat ne Dawid fee o taan in! Hoosiyana took-ee-took asamaan!»

¹¹ Naaga, Yeesu a roka kam Yeerusaleem, a ret kam Mbind Roog naa. Yaa ta ɗeetna me widuuna fop, a ga’a yee a yaar’a lool, too a reta na saate faa Betani, a yoon fo xarɓaxay fo ɗik we.

Yeesu a salooxa ndun

¹² No feet olaa, yaa da sutooxaa Betani, Yeesu a xeexel’e.

¹³ A ƴooka ndun naa saq’ina a naf, too a reta a ɗeetik, ndax xan a ga taaga xa cala. Kaa koy, yaa ta matiidna ndaxar ne, soƥee taaga tus a refangee a naf a ƥor, yaam reeƭee na waxtu fee tun ke a ndimaa.

¹⁴ Yeesu a laya ndun ne yee: «Yaasam baa o kiin a ñaamat xa tim of boo faw!» Daalbe we ten a nana kaaga.

Yeesu a raxa jiijikax waa kam Mbind Roog ne

¹⁵ Cinj kaaga, a mbadiida Yeerusaleem, soo Yeesu a rok kam Mbind Roog naa. A raxa jiijikax waa fo waa njikoogna maaga, a maaf a taabul ake no we mbecetoogna xaaliis fo a tuɗand ake no jiijikax we na nuukuur ake,

¹⁶ too ci’ee o leng ta reefand tig no Mbind Roog naa.

¹⁷ A jangnooga a den, too a layaa yee: «Ndax a Pind a Tedu ke layee yee: ‹Mbind es xan a xoyeel mbind a qeƭ no qeet ke fop›? Nuun o mat, kaa nu mbi’in ngol no guuɗ.»

¹⁸ Saasadax maak waa fo jaajangin waa no kebil kaa Moyiis a nana kaaga, too kaa mbaaƭoogu naa da mbartuuna. Kaa saɗar’un, yaam wiin we fop kaa sawar’u na cangin ale ten.

¹⁹ Yaa tigaa a yaarna, Yeesu fo daalbe we ten a sutooxa teeru faa.

Yeesu fo ndun ne

²⁰ No feet nqes olaa, yaa daalbe waa a ndeefna maaga, a nga’a ndun naa a weer boo na paƴ akaa.

²¹ Yaa Piyeer a wetandooxna ke xew’ina, a laya a Yeesu yee: «O Caajangin oxe, ɗeetangi, ndun ne saloox’oona a weera boo ŋayam!»

²² Yeesu a doona a den ee: «Ngimyo na Roog!

²³ No ndigil, mexe layaa a nuun ee: Boo o kiin a gimna no xeeñ um, too jegee a yiif-a-ƭak, a layangaa o joong olene sax ee: ‹Inooxi mene, too jimboox kam o maag ole,› kaaga xan a jegit ne ta laytuuna.

²⁴ Ten taxu mexe layaa a nuun ee: Kuu nu nqeɗna, ngimyo yee nu ndaawaan, too xan nu cooxel o ten.

²⁵ Boo nu ngeenooxna ndax nu nqeɗ, nu saqanangaa o kiin tig, mbaasaneenoo, ndax Faap nuun fee refna na asamaan a waasan a nuun tooñ nuun itam. [

²⁶ Kaa koy, nu mbaasanangee lakas we, Faap nuun fee refna na asamaan waasankee a nuun tooñ nuun itam.]»

Sañ-sañ fee Yeesu

²⁷ A ndakooxahina o ndet Yeerusaleem, too yaa Yeesu a ñaaƴaa kam Mbind Roog naa, saasadax maak waa fo jaajangin waa no kebil kaa Moyiis fo maak waa a ngara me ten,

²⁸ a laamtin ee: «Sañ-sañ fum o fi’taa kene? An ci’ong sañ-sañ fee o fi’taa kene?»

²⁹ Yeesu a doona a den ee: «Xam laamit a nuun tig. Boo nu ndoonaxama, xam lay a nuun sañ-sañ fee um fi’taa kene.

³⁰ Batiise fee Saŋ o mat, na asamaan a inooru ndi no wiin we? Ndoonaamoo!»

³¹ Maaga, a ñimatirooga a ndeer den ee: «Boo i ndoonuuna yee: ‹Na asamaan a inooru›, yaaga xan a lay a in ee: ‹Xar taxu boog nu ngimee no ten?›

³² Ndi kaa i ndoonkan ee: ‹No wiin we a inooru›…» Kaa saɗaroogu wiin we, yaam fop kaa mbi’’u a Saŋ o tuleer ndigil.

³³ Maaga, a ndoona a Yeesu yee: «I andee.» Yeesu a laya a den ee: «Mi yoo, laykiim a nuun sañ-sañ fee um fi’taa kene.»