Malaki 3 - NQAARIIT NE ROOG

¹ Mexey heblaa oxe luluuma ta adooxaam, a holtanaam a ƭat. No miñeer o Yaal oxe nu mbaaƭaa xan a rokiid ndeer ñaf fo ƭeet kam Mbind Roog ne ten, Malaaka fee no ngiɓoor ne nu cungaa oxey garaa. Keene o Yaal oxe Hupna fop a layu.

² Ndi an na hatilkaa bes feene ta garkaa? Kaam ee an na geenooxkaa naŋ, yaa ta feeñna?, yaam kaa nand fo fiɗel no paal o qaaxaw soo a ran-gandaa taw nen xeme.

³ Xan a moof, a naayin soo a xooland xaaliis fee. Xan a ɓogid Leelewi we soo a xooland a den ne wurus fa xaaliis a nqoolandteel, too xan a ƥoxotaa o Yaal oxe sadax ne ta waritna.

⁴ Maaga, o Yaal oxe xan a jaɓ sadax ke no wiin we Yudaa fa Yeerusaleem, nen yaa fo maak waa, no camaane kaa yaaga.

⁵ O Yaal oxe Hupna fop kaa tee: Mexey garaa, ndax um hate a nuun, too xam ñof o jamb we saɗareeraxama, a ñango’aa mbaat da seeqaa mbaat da ngaañtaa cegeer mbaat da naxaa jaajal we no ndabid den mbaat da toroxandaa ñaaw we fo xa baan axe mbaat da tooñaa xa kataakoon axe.

A seek xarɓaxayandeer ake

⁶ Mi o Yaal oxe, suptooxkiim muk, too nuun we xa taan Yakoob, nu suptooxee.

⁷ No kaa xotitna no camaane kaa no daan we nuun kaa nu ngoƭatir fo kebil es, mbañ o ndeef a den. Mi o Yaal oxe Hupna fop, kaam ee: Nomtooxiidyo me mi boog, too mi yoo xam nomtooxiid me nuun, ndaa kaa nu laamtaa yee: «Xar i mbi’u boo o layaa a in keene?»,

⁸ um doon a nuun ee: Ndax o kiin a waaga o guuɗ a Roog? Yaag oo toox de, kaa nu nguuɗaxam soo laamtaa yee: «Xar i nguuɗang?» Na seek xarɓaxayandeer ake fo no sadax ke nu ƥoxotaxam o mat nu nguuɗtaxam.

⁹ A salax ake kaa ndaabaa a nuun, yaam ne nu nguuɗaxama, nuun saax le fop!

¹⁰ Naangyo ƥisiidaa a seek xarɓaxayandeer a teyu sik no Mbind es, ndax ñaamel a jegaa teen kili. Ƭeetloorangaamoo neene, mi o Yaal oxe Hupna fop, boo nga, ndax suqtankiim a nuun pand ke na asamaan soo mayƭand a nuun fo paax ƥor.

¹¹ Mi o Yaal oxe Hupna fop, kaam ee: Xam xañtan a nuun tooroog ke da yaq duufe nuun mbaat da yaqan a ƭing taxar biiñ ake nuun da ndim.

¹² A saax a can ake fop xan a layaa yee nu ƭaaya, yaam saax nuun xan a fel o genel. Keene o Yaal oxe Hupna fop a layu.

Bes fee Roog a feeñilkaa o cofel um

¹³ O Yaal oxe kaa tee: Kaa nu layaxam xa ƭelem xa ñexetu soo laamtaa yee: «Xar i layong?»

¹⁴ Kaa nu layaa yee: «O faɗoox a Roog kasaara yoo. Kaa i ndeefaa bargal ke ten, ñaaƴaa fa naqad mbaambir no Yaal oxe Hupna fop, ndaa jiriiñee a in dara.

¹⁵ Ndiiki koy, i nga’a yee we magnandooxna ƭaayu, soo soxodu we a neq. A ƭeetlooxangaa a Roog sax oo, a ndaɗ.»

¹⁶ Kaa koy, we saɗarna o Yaal oxe kaa saƭakinraa a ndeer den, too o Yaal oxe a runga nof um, a nan-gilooxaa a den, soo safe wetandoor no we saɗaruuna too a niwaa gon um, a bindtel mbaambir um.

¹⁷ O Yaal oxe Hupna fop kaa tee: Na bes fee um jagandkaa, xan da ndefat o jeg es tigi. Xam fexit a den ne faap a fextaa o ƥeem onqe na jalanan.

¹⁸ Maaga, xan nu nga’ahin njektir ne refna ndeer o cofu xe fo o soxodu xe, nga itam an dagooxu a Roog fo an dagooxeerun.

¹⁹ O Yaal oxe Hupna fop kaa tee: Bes fee xey a garaa, a nand fo nqeen sumu jip. Na bes faaga, we magnandooxna fo soxodu we xan a ndox riw nen sañ beeru, too yoqkee na den rus leng mbaat o kangafaan.

²⁰ Na nuun we saɗarna gon es o mat, xan njeeƈ ne na muc ale a wat, soo ñalal le ten a wodand a nuun. Xan nu njeg a qoox nuun soo ndaaploortaa nen fo nqeel naa na sogeel o mbokit.

²¹ Na bes faa um fi’kaa keene, xan nu nduutaa soxodu we, yaam xan a ndef ndaw yoora tal a caf nuun. Keene o Yaal oxe Hupna fop a layu.

Xan Eliya a nomtooxiid

²² Mbetandooxyo ke Moyiis fee o tag es a janginna. Ngayyo kebil ke fo bargal ke cooxanuuma no joong olaa Horeb, ndax ta daawnin xeet fee Isra’el fop.

²³ Nga’yo, boo bes fee no Yaal oxe a helko fo fadiidaa, bes fa maak fa saɗarnooxu feene, xam lultiid a nuun o tuleer Eliya.

²⁴ Xan a xuriid paap ke, da njeg jam na xa ƥiy den, soo xa ƥiy axe itam, ta xuriid a den, da njeg jam no paap den, yaam ndik um moocand saax le nuun, yaa um garkaa.