Malaki 2 - NQAARIIT NE ROOG

Saasadax we a maƭooxe

¹ O Yaal oxe Hupna fop kaa tee: «Ndiiki koy nuun saasadax we, nuun njegu a maƭax aleeke:

² Nu nan-gilooxangee, nu njaɓangee o niw gon es fo xeeñ nuun fop, xam saloox a nuun soo saloox parke ke nu ndaawna. Ii, xam saloox a den, yaam nu niwiraam fo a qeeñ nuun fop.

³ Me ta refna koy, xam yoomnoor a nuun, deɓ a nuun kutatin ke na mukit, kutatin ke no cegel ke nu sadaxtaa, too xan nu ƥaxkel fa den.

⁴ Xan nu and boog ee mi o Yaal oxe Hupna fop, kaam coox a nuun a maƭax aleene, ndax ngiɓoor ne mi fa Lewi a maadaa.

⁵ Keeke refu ngiɓoor ne mi fo ten: Kaam cooxin o ñoow fa jam, soo ta niwaam, a sendaa mbaambir es yaam diid.

⁶ A cangin a tiindigil ale hatoogu no don um, too xa maaƥ mosee o sutoor no muuceek um. Kaa ñaaƴoogu fa mi na jam fee fo na kam fa letu too a sutta wiin mayu no pakaad den.

⁷ Ke o saasadax oxe a cungteel refu ta andnoor wiin we a Roog, too no don um a cangin ale a waru o sutooraa, yaam kaa ref o tuleer no Yaal oxe Hupna fop.

⁸ Nuun o mat, kaa nu ƭap a ƭat ale, a cangin nuun a ruuxnoor wiin mayu a koƥ. Kaa nu ƭeg ngiɓoor ne hiɓ’uuma fa Lewi, mi o Yaal oxe Hupna fop.

⁹ Mi koy, xam xeefnoor a nuun soo fudin a nuun na kid no xeet fee fop, yaam nu ndeefee a ƭat es soo samtirandaa wiin we, yaa nu njangnaa a den!»

A maƭax no ndolnir fo no sambir

¹⁰ «Ndax in fop i mbogee a Faap fa leng? kaam ee ndax Roog fa leng kut sakee a in? Xar taxu boog i ngore’aƭar a ndeer in, yapatilaa neene ngiɓoor ne Roog fo daan we in?

¹¹ Wiin we no maat ne Yudaa a ngore’aƭara, too cednooxu mayu a mbi’e kam Isra’el fa Yeerusaleem. Goor we Yudaa a ndolnira fo roog waa na mbaɗooxaa a roog fa lakas, too neene a tooña o mbiñ o tedu nqe o Yaal oxe a fexna.

¹² Fat o Yaal oxe a suqit ndamlooxand fo ke na xoxtaa o koor oxuu fogna na Yakoob soo a fi nandu neene! Baa ta xaƴanin sax o leng oxaa na waagkaa o ɓoxotiid o Yaal oxe Hupna fop sadax!

¹³ Keeke refahinu ke nu mbi’aa: Nuun taxu boo o sadaxand ole no Yaal oxe a may muut fo xa kooniit fo xa lool fo xa iin. Ten taxu yoo ta xuun sadax ke nuun too jaɓkatee dara no ke nu ƥoxotan.»

¹⁴ Kaa nu laamtaa yee: «Yaam fa xar keene?» Yaam kaa o waas o teef, ke ta reeƭna reeƭ o yoon of fop oo fo o tew oxe hiɓoorit’oona. O Yaal oxe seede’’ong ndeer of fo o tew oxe dolniroona no ndeƥandoong of.

¹⁵ Ndax o Yaal oxe fi’ee boo nu ndefat o leng no njer fo no yiif? Ndi xar o lengel oleene a bugu? Ten refu Roog a ci’in xa ƥiy! Mbootooxyo boog boo ba o leng a hod o tew oxe ta dolnirna no ndeƥandoong um!

¹⁶ O Yaal oxe Roog fee Isra’el kaa tee: Kaam sib a tolax a tasu, yaam kaa ref nen a bar. Mbootooxyo boog, too ba nu ngore’aƭar. Keene o Yaal oxe Hupna fop a layu.

Bes fee na hate fee no Yaal oxe a matiida

¹⁷ Kaa nu nqijlaa o Yaal oxe na xa ƭelem nuun soo laamtaa yee: «Na xar i nqijlan?» Ten refu, yaa nu layaa yee: «We na mbi’aa paaxeer a mbaaxa na kid no Yaal oxe, too kaa fartaa a den.» mbaat nu ndamtin ee: «Taa Roog fee no cofel ole?»