Mace 8 - NQAARIIT NE ROOG

Yeesu a wodanda o yaal a tik-a-maak

¹ Yaa Yeesu a fudoorna no joong olaa, wiin mayu a ndeefanaan.

² Maaga, o yaal a tik-a-maak a matiidaan, a gooknoox mbaambir um, too a lay ee: «O Yaal oxe, a felangaang waagaxamo o xooland.»

³ Yeesu a letna o ɓay um, a duqin, too a lay ee: «A felaxam, xooli!» Ndak fo ndak, a tik-a-maak alaa ten a xoola.

⁴ Yeesu a layaan itam ee: «Wootooxi layin o kiin o lakas. Reti maa no saasadax oxaa, too sadaxit ke Moyiis a hebilna, ndax fop a seede yee xoolaa.»

Yeesu a wodanda o tag no aa-adax no xiixire teemeed

⁵ Yaa Yeesu a rokaa kam Kapernawum, o aa-adax no xiixire teemeed a matiidaan too a xeɗin ee:

⁶ «O Yaal oxe, o tag es oxaa wondooxa no mbind naa. Kaa ɓoof too a xija lool.»

⁷ Yeesu a layin ee: «Xam gar wodandin.»

⁸ Kaa koy, o aa-adax oxaaga a doonaan ee: «O Yaal oxe, jombaa o rok no mbind es. Layi o ɗelem o leng rek, too xan o tag es a wod.

⁹ Mi o mat, kaam fi’aa ke we kelfa’axama a simaxam. Jegaam itam xiixire waa um lulaa. Kaam layaa o leng ee: ‹Reti!› ta ret, soo um lay o lakas ee: ‹Gari!› ta gar. Kaam layaa surga es itam ee: ‹Fi’i kene!› ta fi’in.»

¹⁰ A ƭelem akaaga Yeesu a nan’ina a mbet’aan lool, too a laya waa ndeefooguuna yee: «No ndigil, mexe layaa a nuun ee: Isra’el boo Isra’el a xet, mosiim o ga o kiin o cegtu nene o ngim.

¹¹ Ten taxu, mexe layaa a nuun ee xan mayu a inoor no batand fo no mudand too xan a mbog o roon fa Abraham fa Isaak fa Yakoob kam Maat ne na asamaan.

¹² Xa ƥiy axe no maat ne ndefna mboƥ ne Isra’el koy, xan a ndeɓel tafil kam o niɓaan ole me xa lool fo ƈaxrand a ñiiñ naa a ndefkaa.»

¹³ Yeesu a geleerooxa a faambir fo aa-adax oxe soo a layin ee: «Reti, fat a jegit ne gimtanoona.» Na waxtu faaga sax o tag oxaa a woda.

Yeesu a wodanda wiin mayu

¹⁴ Cinj kaaga, Yeesu a reta no mbind Piyeer, a jopir o seemir o tew Piyeer a wondoox ee yaam cer um kaa sum.

¹⁵ Yeesu a damaan no ɓay too a sumaan ale a xaƴaan. A inooxa soo a genar a Yeesu.

¹⁶ No yaar olaa, Yeesu a ɓisiide wiin mayu waa cini a ndamna. A raxa cini ke na pexey fa lay um, too a wodanda waa njir’ina fop.

¹⁷ Kaaga a xewa, ndax ke reefand’eena na Esayi, o tuleer oxe, a fadnoox: «A janga xa ƭomel axe in, a gadoox a cir ake in.»

Ne Yeesu a wareena o reefanit

¹⁸ Yaa Yeesu a ga’na yee wiin mayu a ndeeraan, a hebla daalbe um ndax da laqtook kaltaa o maag ole.

¹⁹ O kiin oxaa fogna no jaajangin we no kebil ke Moyiis a matiidaan, a lay ee: «O Caajangin oxe, muu o jofaa xam reefanong.»

²⁰ Yeesu a doonaan ee: «Xa ƥox-a-koƥ axe a njega qanq, tiiƭ ke na asamaan a njeg tut, ndaa o Ƥeenqe no kiin oxe jegee maa ta hakandooxna.»

²¹ O lakas no daalbe waa a layaan ee: «O Yaal oxe, ci’aam boo um waag o uup a faap es boo ƴut, soo gar reefanong.»

²² Oxaaga itam, Yeesu a doonaan ee: «Reefanaam, too xaƴ xon we a uup xon den.»

Yeesu a riimanda a und

²³ Yeesu a roka no suk naa, soo daalbe um a ndeefanin.

²⁴ A und a maak a yoɗooxa took o maag olaa, boo a yag-ee-yag ake na foofi le a muuraa suk ne, a soƥ Yeesu a ɗaanaa.

²⁵ Daalbe we a matiidaan, a yokin, a lay ee: «O Yaal oxe, ƴufgi a in, in we saŋkooxaa kat!»

²⁶ Yeesu a laya a den ee: «Xar taxu nu ndiid? Nuun soo neew o ngim!» Cinj kaaga, a inooxa, a ŋal nqeñ ne fo o maag ole, too fop a naag’ata yereŋ.

²⁷ Wiin waa a njaaxiɗ’a lool, too a layooga yee: «O kiin oxene an a refu boo nqeñ ne fo o maag ole sax a nananan?»

Yeesu a wodanda ɗik waa cini a ndamna

²⁸ Yaa Yeesu a fadna kaltaa o maag olaa, no saax laa no Gaagadara waa, wiin ɗik waa cini a ndamna a sutoorta no poy kaa, a nqetiid fo ten. Kaa soxod’u boo a tax o leng waagee o reef a ƭat alaaga.

²⁹ A laya a maak ee: «Wo fee refna o Ƥeenqe Roog, xar bugo fi a in? Ndax kaa o xijliid a in boo waxtu fee a helko fo fadaa?»

³⁰ Laqa den, a jeg’a o siir o maak a tuul olaa suufoogna.

³¹ Cini kaaga a nqeɗooga a Yeesu yee: «O naagangaa sutkaa a in, fat o ɓakand a in kam o siir ole na tuul akeene.»

³² Yeesu a laya a den ee: «Ndetyo!» Cini ke a sutooxa, soo a ndok kam a tuul akaa. O siir olaa a dalfooxa o eetatir a pudnand alaa, kam o maag olaa, soo a saŋkook kam poofi kaa.

³³ Waa ngayoogna a den a ƈufa kam saax laa, soo a mbetandoox ke xew’ina fop fo ke fi’an’eena wiin ɗik waaga cini a ndam’ina.

³⁴ Yaa waa no saax laa a yeguuna, a nqetooxiida a Yeesu, soo a nqeɗooxin ndax ta sutoox saax den.