Mace 7 - NQAARIIT NE ROOG

Ba nu ƥanj o leng!

¹ «Ba nu ngate’aa wiin we yaam ndik Roog a hate’aa a nuun.

² Ne nu ngate’taa wiin we, Roog a hate’itkaa a nuun, too xan nu eedantel eedir ke nu eedtaa.

³ Xar taxu o ga’aa njaambul onqe refna na ngid no kend of, too waagiro ƴook a toodook ale refna kam a ngid of?

⁴ Mbaat nam waago layit o pog of ee: Xaƴi um watnanong njulmbax ne refna na ngid ale wo, wo fee a toodook a refna kam a ngid of!

⁵ Wo soo ref o yememaar! Pañtu o eet o watin a toodook ale refna na ngid of, soo sogkaa waag o ga a paax ne o watnitkaa njulmbax ne refna kam a ngid no kend of!

⁶ Kuu tedna, ba nu cooxin xa ƥox axe, yaam ndik da ngeleeroox, a lisit a nuun, too ba nu ndeɓ xa peme xe nuun mbaambir a tuul ake, yaam ndik da nduut a den.»

Nqeɗyo too xan nu ci’el

⁷ «Nqeɗyo a Roog, too xan nu ci’el, mbaaƭyo too xan nu nga. Koŋ-koŋinyo, too xan nu mbetanel.

⁸ Oxuu xeɗna a Roog, xan a ci’el, too oxuu waaƭna, xan a ga. Oxuu koŋ-koŋinna, xan a wetanel.

⁹ An na nuun na ci’kaa o ƥeem gac yaa ta xeɗuuna mbuuru?

¹⁰ A xeɗangaan liƥ ndax xan a ci’in fangool?

¹¹ Ke nu soxodna soxod fop oo, kaa nu ci’aa xa ƥiy nuun tig paax. Yaaga koy, ndax Faap nuun fee refna na asamaan ci’kee a nuun paax yaa nu nqeɗuuna o ten?

¹² Kuu nu mbugna wiin we a mbi’an a nuun, mbi’aneenoo a den, yaam keene fadandu kebil ke Moyiis fo ke duleer we a mbindna.»

A ƭat a ƭak ake

¹³ «Ndokityo no don-maax o ŋooɓu le, yaam o don-maax ole fo a ƭat ale na ƥisaa na saŋkax alaa yaaju, too a jega wiin mayu we na ndoktaa na den.

¹⁴ O don-maax o ŋooɓu le fo a ƭat a piiqu le koy na ƥisaa no ñoow o fagkeer olaa, too wiin mayeer na ndeeftaa na den.»

Duleer naanax we

¹⁵ «Mbootooxyo we na ngaraa me nuun, soo a maaɓaa yee duleer oo. Kaa mbi’ooxaa nen paal, too yaaga fop a teeteem a baawar a ndefu.

¹⁶ No ke da mbi’aa nu andditkaa a den. Ndax o kiin a waaga ɗatit xa tim ndaxar biiñ took ngol, mbaat xa tun took ndomb?

¹⁷ Ndaxar mbaax nuu refna xa tim xa paax a rimaa, soo ndaxar mbaaxeer nuu refna a rimaa xa tim xa paaxeer.

¹⁸ Ndaxar mbaax waagee rim xa tim xa paaxeer, too ndaxar mbaaxeer waagee rim xa tim xa paax.

¹⁹ Ndaxar nuu rimkeerna xa tim xa paax, xan a godel, a deɓel kam fiɗel laa.

²⁰ Yaaga koy, no ke da mbi’aa nu andditkaa a den.»

Mosiim o and a nuun!

²¹ «No we na layaxam ee ‹O Yaal oxe! O Yaal oxe!› a jega waa ndokkeerna kam Maat ne na asamaan. Oxe na fi’aa ke Faap es fee na asamaan a bugna soom na rokkaa teen.

²² Na bes faa na hate faa, xan mayu a layaam ee: ‹O Yaal oxe! O Yaal oxe! Ndax kaa i njo’tee a Roog no gon of? Ndax kaa i ndaxee cini ke no gon of? Ndax kaa i mbi’ee a pi katil a mayu no gon of?›

²³ A koom, xam faambir fa den, lay a den ee: Mosiim o and a nuun. Ngoƭaamoo, nuun we na mbi’aa paaxeer!»

Sinjyo no ɓil!

²⁴ «Yaaga koy, oxuu nanna a ƭelem akeeke um layaa, soo a reef a den, xan a nand fo o koor o cegu yiif oxaa sinjna mbind um took ɓil.

²⁵ Ye ndiig ne a garna, a qaandiind ake fo a und ake a ngoma mbind ne, ndaa yenee, yaam no ɓil a sinje.

²⁶ Oxuu nanna ke um layaa koy too reefiran, xan a nand fo o koor o ƭofu xaa sinjna mbind um kam mbuuƴ ne.

²⁷ Ye ndiig ne a garna, a qaandiind ake fo a und ake a ngoma mbind ne, ta yen too njom ne a magna lool.»

Sañ-sañ fee Yeesu

²⁸ Yaa Yeesu a ƴutna waare faaga, a cangin um a duq’a wiin mayu.

²⁹ Kaa jangnitoogu nen oxaa jegna sañ-sañ, too refee nen jaajangin we no kebil ke Moyiis.