Mace 6 - NQAARIIT NE ROOG

Kaa farna na sadax

¹ «Mbootooxyo lalit mbaambir no wiin we yee kaa nu njof, ndax da ƭeet a nuun soom. Nu mbi’angaan, nu njegkee ndabid leng paam Faap nuun fee refna na asamaan.

² Boo o sadaxtaa, ba o laltan ne yememaar we a mbi’tan kam pind a qeƭ ke mbaat kam ped ke, ndax wiin we a simat a den. Mexe layaa a nuun no ndigil ee: A ndaawa ndabid den boo a ƈut.

³ Boo o sadaxtaa, ba o ɓay of o janoon a and ke o ñamaak ole a fi’aa.

⁴ O fi’angaan, xan sadax of a fi’u na pet, too yaaga, xan Faap of fee na ga’aa ke ɗasna a rabdong o ten.»

Kaa farna na qeƭ

⁵ «Boo nu nqeɗaa, ba nu nand fo yememaar we mbexna ngeenoox a nqeɗaa kam pind a qeƭ ke fo na xa salit axe no ped ke, ndax wiin we a nga a den. No ndigil, mexe layaa a nuun ee: A ndaawa ndabid den boo a ƈut.

⁶ Wo koy, ten taxu boo o xeɗaa, roki na ndok of, weg begax ne, soo xeɗ a Faap of fee refna meene na pet, too yaaga xan Faap of fee na ga’aa ke ɗasna a rabdong o ten.

⁷ Boo nu nqeɗaa, ba nu ndupataa fa lay fa njegee xoox nen yeefar ke na mboogaa yee a layangaa mayu xan a qeƭ den a njaɓel.

⁸ Ba nu nand fa den, yaam Roog Faap nuun a anda ke nu soxla’na boo nu ngelko fo nqeɗan o ten.

⁹ Yaaga koy, neeke nu mbaru o nqeɗtaa: ‹Faap in fee na asamaan, Yaasam gon of a tedleel!

¹⁰ Yaasam maat of a fadiid! Yaasam ke bugoona a jeg na adna nen na asamaan!

¹¹ Ci’i a in xaye ñoowir in no mbeet oo mbeet.

¹² Waasani a in tooñ ke in, ne i mbaasantaa we tooñna a in,

¹³ too ba o waas a in, i ndok no mbog, ndaa mucli a in no paaxeer oxe. [Yaam wo jegu maat fa katil fo o ndam bo na moos boo moos. Amiini.]›

¹⁴ Nu naangangaa o mbaasanaa we tooñna a nuun, Faap nuun fee na asamaan xan a waasan a nuun itam.

¹⁵ Kaa koy, nu naangangee o mbaasantaa, Roog Faap nuun itam waasankee a nuun ke nu tooñuuna.»

Kaa farna no koor

¹⁶ «Boo nu ngoorna, ba nu yuɗaanooxaa nen yememaar we na ngiɓaa a tagid den, ndax wiin we a nga ee kaa ngoor. Mexe layaa a nuun no ndigil ee: A ndaawa ndabid den boo a ƈut.

¹⁷ Wo koy, o hoorangaa, muktooxi soo ɗuumoox.

¹⁸ Yaaga wiin we nga’kee yee kaa o hoor, ndaa Faap of fee refna na pet xan a ga’in. Faap of feene na ga’aa ke ɗasna, xan a rabdong o ten.»

Kaa farna na halal fa ndigil

¹⁹ «Ba nu mbokatanoox halal na adna fee me max ke fo nqoy ke a yaqtaa, soo guuɗ we ndaƈtaa, a nguuɗaa.

²⁰ Fat nu mbokatanoox halal na asamaan maa max ke fo nqoy ke a naangeerna o yaqtaa tus fo maa guuɗ we a ndaƈtitkeerna too nguuɗkee.

²¹ Yaam me halal of a refna, maaga yiif of a refkaa itam.»

Kaa farna na qoolaand

²² «A ngid refu o lampa cer. Ñiiñax a ñaaƴangee a ngid of, xan cer of fop a nqool.

²³ Kaa koy, boo andoona yee ñiiñax a ñaaƴa a ngid of, cer of fop xan a nuk. A soƥangaa koy ee a qoolaand ale refna na wo o niɓaan oo, nam o niɓaan olaaga a fodkaa!»

Kaa farna na Roog fa halal

²⁴ «O leng waagee o dagoox yaal ɗik, yaam yaaga xan a fex oxene soo a fañ oxaana, mbaat ta damoox no xene soo a sib oxe yoqna. Nu mbaagee ndagooxaa a Roog, soo mbug o ndagoox Xaaliis.»

Ba nu njaaxiɗ!

²⁵ «Ten taxu mexe layaa a nuun ee: Ba o ñoow mbaat ñaamel [mbaat a yer] mbaat ñirax a njaaxɗand a nuun. Mee ndax o ñoow ole moƴu a ñaam ale, soo cer ke a moƴ ñirax ke?

²⁶ Ƭeetyo tiiƭ ke na asamaan andoona yee nduufkee, saxadkee, ngeerkee tus no tap, too Faap nuun fee na asamaan a ñoownaa a den. Ndax kaa nu moƴee o njeg a den o njiriiñ?

²⁷ An na nuun, na pexey a qalam um, waagu o ɓaat poye no saqit mbaambaañ na xa kiid um?

²⁸ Xar taxu nu nqalamaa kaa farna no toki boog? Ƭeetyo ne sufar-naak le na koƥ ale a maaktaa, too jalkee, forolkee.

²⁹ Mexe layaa a nuun toox de yee: O maad Salomo sax, ke ta jeg’ina jeg o ndam fop oo, mosee o ñiroor nen leng na den.

³⁰ Roog a ñirtangaa neene daaƭ le na xa saawit axe, andoona yee a refangaa xaye, o feet ta deɓel no ngañ, ndax moƴkee o ñir a nuun? Nuun soo neew o ngim!

³¹ Ba nu njaaxiɗ boog, too ba nu lay ee: Xar i ñaamkaa? Xar i yerkaa? Xar i ñirooxkaa?

³² Keene fop koy, yeefar ke na mbaaƭan. Faap nuun fee na asamaan a anda yee nu soxla’aan.

³³ Eetyo mbaaƭ Maat ne Roog fo ke ta bugna, too keene fop, xan nu ndoonanel o ten.

³⁴ Ba o feet a jaaxɗand a nuun, yaam xan o feet a topatoox a xoox um. Ñaal nuu refna coono um a ndeyaan.»