Mace 5 - NQAARIIT NE ROOG

Waare fee took o joong ole

¹ Yaa Yeesu a ga’na wiin mayu waa, a ŋaaya took o joong olaa a moof, too daalbe we ten a matiidaan.

O ɗaay ndigil ole

² Maaga, Yeesu a refa no jangnaa a den ee:

³ «We ñakna halal yiif a ƭaaya, yaam Maat ne na asamaan den a refanu!

⁴ We naqadilooxna a ƭaaya, yaam xan Roog a yaal a den!

⁵ We ƥuuɓna a ƭaaya, yaam xan a lam adna fee!

⁶ We nqeexeena too a ngoɗomel o cofel ole Roog a ƭaaya, yaam xan a ngiñ!

⁷ We njegna yirmande a ƭaaya, yaam xan Roog a yirim a den!

⁸ We njegna xeeñ xoolu a ƭaaya, yaam xan a nga a Roog!

⁹ We na sakaa jam a ƭaaya, yaam xan Roog a xoy a den xa ƥeem!

¹⁰ We na ñagadileel yaam o cofel ole Roog a ƭaaya, yaam Maat ne na asamaan den a refanu!

¹¹ Boo andoona yee nu mbene, ñagadilel too mberanel paaxeer kuu refna yaam mi, nu ƭaaya!

¹² Mbelakinooxyo, too ndef kam o ɗaay, yaam ndabid nuun xan a magin na asamaan. Ba nu mbeecit itam ee neene duleer we adooxna a nuun a ñagadilit’e.»

Fo jem ole fo a qoolaand ale

¹³ «Nuun ndefu fo jem ole na adna fee. Fo jem o mat, a jematangee, xar waagatu tax ta jem? Jiriiñatee tus a refangeerna a deɓel tafil, soo wiin we a ndakin.

¹⁴ Nuun ndefu a qoolaand ale na adna fee. Teeru faa refna took o joong waagee ɗas.

¹⁵ O leng heƥandkee o lampa boo a ƴut, soo a sagin a saxal. Kaa ɗagan kañ, ndax ta waag o xooland ke refna na ndok ale fop.

¹⁶ Neene a qoolaand ale nuun a waru o xoolit mbaambir no wiin we, ndax da mbaag o nga a pi a paax ake nuun, soo a ƥoxot a Faap nuun fee refna na asamaan o ndam.»

Yeesu fo kebil ke Moyiis

¹⁷ «Ba nu mboog ee kaam laafiid kebil ke Moyiis mbaat ke duleer we a mbindna. Garaam, refee yee ndax um laaf a Pind ake, ndaa ndax um fadin a den.

¹⁸ No ndigil, mexe layaa a nuun ee: Boo asamaan fo lanq a mbaafeerna, bind le moƴna moƴ o neew mbaat o ɗelem o leng sax watkee no kebil ke boo yaa fop a fadnooxna.

¹⁹ Oxe na xuufkaa leng ne moƴna neew no kebil keeke, soo a jangin wiin we kaaga, xan a xoyeel oxe moƴna neew no we ndefna kam Maat ne na asamaan. Oxe na reefkaa a den koy, soo a jangin wiin we da ndeef a den, xan a xoyeel o maak no Maat ne na asamaan.

²⁰ Mexe layaa a nuun ee o cofel nuun a hupangee ole no jaajangin we no kebil ke Moyiis fo ole no Farisiya we, nu ndokkee no Maat ne na asamaan.»

Kaa farna no fuux

²¹ «Nu nana ne ta layit’eena daan waa yee: ‹Warkiro o kiin! Oxuu warna, haahate we a mbaraan o nqaw.›

²² Mi koy, mexe layaa a nuun ee: Oxuu fuuxanna o pog um sax, haahate we a mbaraan o nqaw. Oxe na laykaa o pog um sax ee: ‹O ƭof refo!› Mal maak ne fop a mbara o mbokatoor a nqawin. Oxe na laykaa o pog um ee: ‹Jegiro xoox!› a wara o xawtel fiɗel laa ñufkeerna.

²³ Yaaga koy, boo cooxtiidoona sadax of no sadaxand olaa, too wetandoox ee o pog of a saqanaang fuux,

²⁴ fat o xaƴ maaga sadax of mbaambir o sadaxand olaa, soo eet o ret xendandoor fo o pog of. Nu nqendandoorangaa boo ƈut, nomtooxi soo cooxit sadax of.

²⁵ Boo nu ndetaa no nqel no maad, wo fo xe na jambang, ñofi o xendandoor fo ten yaa nu ndefna na ƭat, yaam ndik nu mbad, soo ta ɓurong. O ɓurange, xan o kaahate xaa a ɓoxotong alkaati kaa, too xan a ƥekong kaso.

²⁶ No ndigil, mexe layang ee: Sutooxkiro maaga, too rabdiro o fiftin o falakaand ole.»

Kaa farna no ceeq

²⁷ «Nu nana ne ta layit’eena yee: ‹Seeqkiro!›

²⁸ Mi o mat, mexe layaa a nuun ee: Oxuu na ɗeetaa o tew boo a yaawin, a seeqa fo ten no xeeñ um boo a ƴut.

²⁹ A ngid of a ñamaak a naagangaang o ɓekaa na bakaad, luqteen deɓin koƭu! Ñak tig leng no cer of moƴu cer of fop a ndeɓel kam fiɗel laa ñufkeerna.

³⁰ O ɓay of o ñamaak a naagangaang o ɓekaa na bakaad, ɗegeen deɓin koƭu! Ñak tig leng no cer of moƴu cer of fop a ndeɓel kam fiɗel laa ñufkeerna.»

Kaa farna no tas a tolax

³¹ «A laye itam ee: ‹Oxuu waasna o teem, fat a cooxit o moon baasin olaa lalitna yee a waasaan.›

³² Mi koy, mexe layaa a nuun ee: Oxuu waasna o teem, too refee yee yaam kaa seeqaa, oxeene kiin a ɓekaan no ceeq. Oxuu giligna o tew o baase itam a seeqa.»

Kaa farna no gaañ

³³ «Nu nanahina ne ta layit’eena daan waa yee: ‹Gaañkiro na xa maaƥ! Kuu gaañoona mbaambir no Yaal oxe yee xan o fi’in, waraano o fadin.›

³⁴ Mi koy, mexe layaa a nuun ee: Ba nu ngaañ muk. Nu mbaree o ngaañit asamaan, yaam gamb no maad le Roog oo.

³⁵ Nu ngaañitkee lanq ke itam, yaam me ta doonaa a caf um oo, too nu ngaañitkee a Yeerusaleem, yaam teeru fee no Maad o maak oxe refna Roog oo.

³⁶ Ba o gaañit a xoox of itam, yaam waagiro fuumand mbaat o ɓalgand o biil o leng of sax.

³⁷ Fat fa lay nuun a ref ‹ii› mbaat ‹ha’aa›! Kuu nu ƥaatna taaga no ƈiƴ oxe a inooru.»

Kaa farna no ndabdinax

³⁸ «Nu nana ne ta layit’eena yee: ‹A ngid na bugko rabdaa a ngid, ñiiñ a rabdaa ñiiñ.›

³⁹ Mi koy, mexe layaa a nuun ee: Ba nu ndabdinoor fo xe na fi’aa a nuun ƭomu. O kiin a faɗangaang no ɗek o ñamaak, cooxeen o ɗek o janoon ole itam.

⁴⁰ O kiin a xoyangaang no maad, yaam a bug o jang o forok of, doonaneen teen sabadoor of sax.

⁴¹ O kiin a serangaang o ñaaƴ a taaraand juni, fi’aneen a taaraand cuni ƭik.

⁴² Ci’i oxe na xeɗang, too ba o xañ oxe na luɓang tig.»

Kaa farna no fex o pañ of

⁴³ «Nu nana ne ta layit’eena yee: ‹Fat o fex o kend of soo fañ o pañ of.›

⁴⁴ Mi o mat, mexe layaa a nuun ee: Mbexyo fañ nuun, nqeɗanaa we na ñagadilaa a nuun.

⁴⁵ Nu mbi’angaan, xan nu ndef xa ƥiy Faap nuun fee na asamaan, yaam kaa seeƈanaa faaxeer we fo faaxu we, a deɓanaa jofu we fo jofeer we.

⁴⁶ Nu mbexangaa we mbexna a nuun, ndabid num nu mbaru o njeg? Mee ndax we na ndabdinooxaa juuti sax kaa mbi’an!

⁴⁷ Nu naangangaa o simnaa fog nuun soom, xar nu moƴantu lakas we? Mee ndax yeefar ke sax kaa mbi’an!

⁴⁸ Fat nu ñak sik boog ne Faap nuun fee na asamaan a ñakitna sik.»