Mace 4 - NQAARIIT NE ROOG

Saytaane a foga a Yeesu

¹ Maaga, Yiif le Roog a ɓisa a Yeesu kam a koƥ-a-ƥor alaa ndax o ƈiƴ oxe a fogin.

² Yaa ta hoorna ñaal qarɓeen nahik fo xa yeng den, a xeexel’e.

³ O poofog oxe a matiidaan, too a layin ee: «O refangaa o Ƥeenqe Roog, supti a kac akeeke da ndef puuru.»

⁴ Yeesu a doonaan ee: «A binde yee: ‹O kiin ñoowitkee ngaaf soom, ndaa fo fa lay fuu sutoorna no don Roog.› »

⁵ Cinj kaaga, o ƈiƴ oxe a ɓisaan kam teeru fa maak fa tedu faa refna Yeerusaleem. A sipaan took Mbind Roog naa,

⁶ soo a layin ee: «O refangaa o Ƥeenqe Roog, foolti mene, yaam a binde yee: ‹Xan a heblanong malaaka ke ten, too xan a meeɓong, yaam ndik o kamas ɓil.› »

⁷ Yeesu a layahinaan ee: «A binde itam ee: ‹Ɗeetlooxkiro o Yaal oxe Roog of muk!› »

⁸ O ƈiƴ oxe a dakooxaan o ɓis took o joong o jigdu lool, a lalin maat ke ndefna na adna fee fo kalal ke den fop,

⁹ soo a layin ee: «O gooknooxangaa mbaambir es too faɗooxaam, xam ci’ong keene fop.»

¹⁰ Maaga, Yeesu a layaan ee: «Saytaane, goƭaam! Yaam a binde yee: ‹O Yaal oxe Roog of soom waro faɗoox too dagooxan.› »

¹¹ Naaga, o ƈiƴ oxe a waasaan, too malaaka ke a ngara paam Yeesu, a ndagooxin.

Yeesu a fera o jangnit Galile

¹² Yaa Yeesu a nanna yee Saŋ a ɓeke kaso, a reta no jegel olaa Galile.

¹³ A jangoorta na teeru faa Nasaret, soo a geniid Kapernawum, refna paam o maag olaa, no jegel olaa na carind ale Sabulon fo ale Neftali.

¹⁴ Neene, ke reefand’eena na pexey o tuleer oxaa ne’eena Esayi a fadnooxa:

¹⁵ «O jegel olaa Sabulon fo olaa Neftali, fo me joonna fo o maag olaa fop boo a jof kaltaa Yordaan fa Galile, o jegel ole no wiin jan we,

¹⁶ xeet feene moofna no niɓaan ole a nga’a a qoolaand a maak. Took no waa moofna kam a pelyook ale na fa nqon fee, a qoolaand a yoɗooxa.»

¹⁷ Na jamaane faaga, Yeesu a fera o waare, a lay ee: «Mbesyo pakaad nuun a cinj, yaam Maat ne na asamaan a matiida.»

Yeesu a xoya faafaal nahuk

¹⁸ Yaa Yeesu a ñaaƴaa na ƥeeraamb alaa no Maag olaa Galile, a ga’a fog ɗik, Simoŋ fee na lastiteel Piyeer fa Andare fee o ndeɓ um. Kaa ndeɓoogu mbaal kam o maag olaa, yaam faafaal a ndeeƭu.

¹⁹ Yeesu a laya a den ee: «Ndeefaamoo, too xam fi a nuun faafaal no wiin.»

²⁰ Ndak fo ndak, a nqaƴa paal kaa den, too a ndeefanin.

²¹ Yaa Yeesu a retna boo a yaac o goƭ, a ga’a fog ɗik lakas, Saak o ƥiy Sebede fa Saŋ fee o ndeɓ um. Kaa ndeeƭu kam suk fa Sebede fee reeƭna faap den, a nqendandaa paal den. Yeesu a xoya a den,

²² too ndak fo ndak, a nqaƴa suk naa fa faap den, a ndeefanin.

²³ Yeesu a widooga Galile fop, too a jangnaa kam pind a qeƭ kaa den. A waare’ooga Yegil mbaax ne no Maat ne na asamaan. A wodandooga jir luu refna fo o ƭomel oluu dam’ina wiin waa.

²⁴ Gon um a joot’a kam Siri fop, too a ɓisiidooge waa a cir fo xa ƭomel xa pagkatar a ndamna. A jeg’a waa cini a ndamna fo o mbeƭfeƭin fo wiin waa ƥoofna, too a waadna a den.

²⁵ Wiin mayu a ndeefanaan, a inoortiid Galile fa Dekapol fa Yeerusaleem fa Yudee fo kaltaa Yordaan.