Mace 3 - NQAARIIT NE ROOG

Waare fee Saŋ o Paabatiise xe

¹ Na jamaane faaga, Saŋ o Paabatiise xe a feeña, soo a waare’aa kam a koƥ-a-ƥor alaa Yudee.

² Kaa layoogu yee: «Mbesyo pakaad nuun a cinj, yaam Maat ne na asamaan a matiida.»

³ Ten refu oxe o tuleer oxe ne’eena Esayi a ne’oogna ye ta layna yee: «Keeke refu o ñuxur ole na falalooxaa kam a koƥ-a-ƥor alaa yee: Sexanyo o Yaal oxe a qal, njofandanin a ƭat.»

⁴ Saŋ koy, ndoki naa fi’teena a ƥiñ ngeeleemb a rokooxoogu, a saqaa o kumnoor ƭool no ndet um. Soƈ fo suum ke na xa yulumbuum axe a ñoowtoogu.

⁵ Wiin we Yeerusaleem fo we no jegel ole Yudee fop fo we no caate kaa ndeerna o xuluɓ ole Yordaan fop a ndetooga maa ten.

⁶ Saŋ a batiise’ooga a den kam Yordaan, yaa da mbeejilna pakaad den boo a ƈut.

⁷ Yaa Saŋ a ga’na Farisiya waa fo Sadusiya waa a ngaraa ndax da mbatiise’el, a laya a den ee: «Nuun soo ndef fo nqisiil! An lalgandu a nuun nu ƈuf fuux le Roog na garaa?

⁸ Saqyo boog a pi akaa lalitna yee nu mbesa pakaad nuun a cinj.

⁹ Ba nu mboog ee nu mbaaga o lay na yiif nuun ee: ‹Abraham refu o taan in.› Mexe layaa a nuun ee Roog a waaga o fi a kac akeeke xa taan Abraham.

¹⁰ Ndiiki, ɓaax le a sipe na puƭ ake no taxar ke. Ndaxar nuu rimkeerna xa tim xa paax, xan a godel, a deɓel kam fiɗel laa.

¹¹ Mi, mexe batiise’taa a nuun foofi, ndax ta lalit ee nu mbesa pakaad nuun a cinj, ndaa oxe na reefaniidaxam moƴaxam o jeg doole, too o wolanin xa ñaaƭ um sax a jombaxam. Ten o mat, xan a batiise’it a nuun Yiif Tedu le fa fiɗel.

¹² A saqa o lang no ɓay um, too xan a fees bele fee ten soo a geek pep ke. Xan a dox ñaax le kam fiɗel laa ñufkeerna boo muk.»

Yeesu a batiise’e

¹³ Yeesu itam a inooriida Galile, a gar Yordaan maa Saŋ ndax oxeene a batiise’in.

¹⁴ Saŋ koy, jaɓ’ee too a laya yee: «Mi soxla’u o batiise’aam, soo o garaa me mi!»

¹⁵ Took kaaga, Yeesu a doonaan ee: «Jaɓi rek, yaam i mbara o mbadnit nene o cofel ole Roog fop.» Maaga, Saŋ a jaɓa.

¹⁶ Yaa Yeesu a batiise’eena boo a ƴut, a sutooxa foofi laa. Asamaan fee a wetooxa too a ga’a Yiif le Roog a fudooxiidaa took um, a saxit nen a nuukuur.

¹⁷ O ñuxur a nannoorta na asamaan ee: «Oxene refu o Ƥees onqe fexuuma fex, no ten felakinoortum.»