Mace 27 - NQAARIIT NE ROOG

Yeesu a ɓise maa Pilaat

¹ No nqes naa, yaa mbeet naa a xoolaa, saasadax maak waa fo maak waa na xeet faa fop a mbokatoora, ndax da mbar a Yeesu.

² Yaa da ngumuuna boo a ƈut, a ƥisaan soo a ƥoxotin a Pilaat fee reeƭna gofornoor.

Yudaa a xirooxa

³ Yaa Yudaa fee ɓoxot’ina a Yeesu a ga’na yee a hate’e, a ricooxa, too a nomtiida qarɓeen tadik kaa maa no saasadax maak waa fo maak waa na xeet faa,

⁴ too a lay a den ee: «Bakaadaam ye andoona yee kaam ɓoxot fo’oy fo jegee sik.» Maaga, a ndoonaan ee: «A ƭat in yongee teen. Wo andu!»

⁵ Yudaa a deɓa xaaliis faa kam Mbind Roog naa, soo a jang o ƥaak a xirook.

⁶ Yaa saasadax maak waa a ngisna xaaliis faa, a laya yee: «Waraand o ɓek na halal fee no Mbind Roog ne, yaam njigand fo’oy oo.»

⁷ A njofoora a ndeer den, ndax da njikit xaaliis feene o qol laa no maamax qaw oxaa, ta refik poy na xa kataakoon.

⁸ Kaaga taxu o saawit olaa a ne’el ‹O qol fo’oy› boo xaye.

⁹ Naaga, ke lay’eena a reefandel na pexey Yeremi o tuleer oxe a fadnoortu: «A njanga qarɓeen tadik kaa ndefna njigand no kiin oxaa xa ƥiy Isra’el a njikooxna,

¹⁰ soo a njiktin o qol laa no maamax qaw oxaa, ne o Yaal oxe a heblit’axama o ten.»

Yeesu mbaambir Pilaat

¹¹ Yaa Yeesu a ɓisiideena mbaambir gofornoor faa, oxeene a laamtaan ee: «Wo refu o maad oxe no Yaawuur we?» Yeesu a doonaan ee: «Wo ne’un!»

¹² Kaa koy, Yeesu doon’ee dara no ke saasadax maak we fo maak we a njambooguuna.

¹³ Maaga, Pilaat a layaan ee: «Ndax naniro ke da layanoonga fop?»

¹⁴ Kaa koy, Yeesu dooniran o ɗelem o leng, too kaaga a bet’a gofornoor faa lool.

Yeesu a hate’e

¹⁵ Na Xew a colandax aluu refna, wiin we a njilooga oxaa felna a den no we mbegeena kaso, ndax gofornoor fee a sutanin a den.

¹⁶ A jeg’a oxaa dameena, too a ref o kiin o cegu gon yaam a pi a paaxeer ake ta fi’na, Barabaas a ne’’e.

¹⁷ Ye da mbokatoorna, Pilaat a laya a den ee: «An nu mbugu um xaƴan a nuun? Barabaas ndi Yeesu fee na xoyeel Kiristaa?»

¹⁸ Pilaat a laya neene, yaam a and ee aa-adax we kaa siisoogu a Yeesu, boo ten taxu da ƥoxotin.

¹⁹ Yaa ta moofna no hate’and olaa, o teem a ɓisnitiidaan ee: «Baa jeg dara a ndeer of fo o kiin o cofu xeene! Xa ƭaaɗ kaa nqijlaam bo no yeng olene yaam o ten.»

²⁰ Saasadax maak waa fo maak waa a ƈaxa wiin mayu waa nof, ndax da nqeɗ a Pilaat ta xaƴan a den a Barabaas, too a saŋiknoor a Yeesu.

²¹ Gofornoor fee a laya yee: «An no ɗik wene nu mbugu um xaƴan a nuun?» A ndoonaan ee: «Barabaas.»

²² Pilaat a laya a den ee: «Xar um fi’kaa a Yeesu fee na xoyeel Kiristaa koy?» Fop a ndoonaan ee: «Fat a rengel na kurwaa!»

²³ Gofornoor fee a laya yee: «Paaxeer kum a fi’u?» Maaga, wiin waa a moƴa o mbuuq ee: «Fat a rengel na kurwaa!»

²⁴ Yaa Pilaat a ga’na yee ɗaxdee dara, too coow le a moƴ o mayaa, a janga foofi, soo a laxad xa ƥay um mbaambir no wiin waa fop, too a lay ee: «Refiim dara no fo’oy le no cofu xene. Nuun ngadooxun.»

²⁵ Xeet faa fop a ndoona yee: «Fat fo’oy um a yen took in, in fo xa ƥiy in!»

²⁶ Maaga, Pilaat a xaƴana a den a Barabaas, ndaa a xawnoora a Yeesu xa cap, soo a ɓoxotin ndax ta rengel na kurwaa.

Yeesu a xaadnooxe

²⁷ Xiixire waa a ƥisa a Yeesu no xeloorand olaa, soo a ndeerin den fop.

²⁸ A mbola tikoorik ke ten, soo a ndokanin lori yaxgu coy.

²⁹ A ndiwa o ndip kiƈ, soo a ndokanin o ten no xoox le. A cooxaan o kangafaan no ɓay um o ñamaak, soo a ngooknoox mbaambir um a nqaadnooxan ee: «Daali maad no Yaawuur we, walid!»

³⁰ A nduxdooga took um, soo a njang o kangafaan ole da coox’uuna, a mbadan o ten no xoox.

³¹ Yaa da nqaadnooxuuna boo a ƈut, a mbola lori ne, a ndaknin tikoorik um. Cinj kaaga, a ƥisaan, ndax da ndengin na kurwaa.

Yeesu a renge na kurwaa

³² Yaa da sutooxna, a nqeta fo o koor oxaa genna Kireen, too a ne’el Simoŋ. A seraan ndax ta gadoox a kurwaa le Yeesu.

³³ Yaa da mbadiidna maa ne’eena Golgota, tekitna «o mbiñ onqe no Nqolof ne»,

³⁴ a cooxaan biiñ faa juleena kaa saqna a qaaɗaan o soylaar, ndaa yaa ta ñimuuna, bug’iran o yer.

³⁵ Yaa da ndenguuna na kurwaa boo a ƈut, a nqaajra toki um a cinj ye da mbanjangna. [ndax ke lay’eena no pexey o tuleer oxe a fadnoox: A lasra tikoorik es soo a mbanjang sabadoor es.]

³⁶ A moofa itam, a ndef no yetooxan.

³⁷ Ndax da lalit ke tax’ina ta rengel na kurwaa, a mbind’a yee: «Oxene refu Yeesu, o maad oxe no Yaawuur we.» A pind akeene koy kaa yooroox’u xoox le Yeesu.

³⁸ Guuɗ ɗik a ndeng’e paam Yeesu, o leng oxe na ñamaak, o lakas oxe na janoon.

³⁹ Dak-a-faaf we kaa mbenoogun, soo a mbulaa a qoox,

⁴⁰ a layaa yee: «Wo fee bug’ina o gef Mbind Roog ne, soo maxatinin no ñaal tadik, mucli a xoox of! O refangaa o Ƥeenqe Roog, fudooxi a kurwaa le!»

⁴¹ Saasadax maak we fo jaajangin we no kebil ke Moyiis fo maak we a nqaadnooxoogaan ee:

⁴² «A mucla lakas we, too waagee o mucil a xoox um! A refangaa o maad Isra’el, fat a fudoox a kurwaa le, too xan i ngim no ten.

⁴³ A doona yaakaar um na Roog, Roog a fexangaan, pañtu ta muclin koy? Mee ndax kaa layoogu yee ten refu o Ƥeenqe Roog!»

⁴⁴ Guuɗ ɗik a ndeng’e fo ten, too den itam kaa mbenoogun nen lakas we.

Yeesu a saaya

⁴⁵ No kaa xotitna na waxtu njeeƈ ndeer xoox boo na waxtu a kirandax, a jeg’a o niɓaan took lanq ke fop.

⁴⁶ Farna fa waxtu a kirandax, Yeesu a wuuqa fo o ñuxur o jegu doole yee: «Eeli, Eeli, lema sabaxtaani?» Ten tektu: «Roog es, Roog es, xar taxu o xaƴaam?»

⁴⁷ Yaa leng-leng no waa ndeeƭna maaga a nanuuna, a laya yee: «Nanyo, oxe xoyaa a Eliya.»

⁴⁸ Ndak fo ndak, o leng na den a ƴufa a jangik liir, a suupin kam bineegar, a morgin no siind, soo a cooxin o ten, ndax ta yer.

⁴⁹ Lakas waa o mat kaa layoogu yee: «Xaƴi boo i nga ndax xan Eliya a mucliidin!»

⁵⁰ Yeesu a dakooxa o wuuq a maak, soo a ɓoxot o laaw um.

⁵¹ Na waxtu faaga, mbaƴ naa fegit’eena o mbiñ o tedu nqaa no Mbind Roog naa a naagta faceet took boo a sipoox a lanq. Lanq ke a yo’nooxa, soo a ƥil ake a qaacoox.

⁵² Poy ke a mbetooxa, too wiin tedu mayu waa nqon’ina a nqontooxnoor’e.

⁵³ Yaa Yeesu a xontooxna, a sutoora no poy kaa, a ndok kam teeru fa tedu faa, too a mbeeñooxa wiin mayu.

⁵⁴ Yaa o aa-adax oxaa no xiixire waa fo waa ndeeƭna fo ten, a yetooxaa a Yeesu, a nga’na ne lanq ke a yo’nooritna fo ke xew’ina, a ndiida diid maak. Maaga, a layoogata yee: «O kiin oxeeke reeƭu o Ƥeenqe Roog ndigil!»

⁵⁵ Rew mayu waa yoontiid’ina a Yeesu Galile, ndax da ndimle’in, a mbod’a o ndeer-ndeer onqe, a ƭeetaa.

⁵⁶ Mari-Magdala fa Mari fee refna ya Saak fa Yoseef fa ya na xa ƥiy Sebede a mbog’a no rew waaga.

Yeesu a gase

⁵⁷ No kirand naa, o kiin o cegu halal oxaa gen’ina Arimate too a ne’el Yoseef a fadiida. Ten itam o taalbe Yeesu a reeƭatu.

⁵⁸ A reta maa Pilaat, soo a xeɗin o dal ole Yeesu. Pilaat a hebla yee ta cooxel o ten.

⁵⁹ Yoseef a janga o dal olaa, soo a laxasin njoor.

⁶⁰ A ɓekaan kam a mboy a qas alaa ta sexood’ina no ɓil. A berenga ɓil maak, ndax ta wegtin ndokand naa na mboy alaa.

⁶¹ Mari-Magdala fa Mari fa lakas fee a moof’a, a njasnoor fo a mboy alaa.

Yeeyetax we na mboy ale

⁶² Bes fee Yaawuur we a mbaajanoogna Xew fee na colandax ale a faafa. No feet olaa, saasadax maak waa fo Farisiya waa a soƥkahina a Pilaat no mbind um,

⁶³ soo a layin ee: «Yaal saax le! I mbetandooxa yee o maamaaɓ oxeene kaa lay’u ye ta ñoowaa yee: ‹Cinj ñaal tadik, xam xontoox.›

⁶⁴ Hebli wiin boog, ndax da yetoox a mboy ale boo no ñaal ndadkandeer naa, yaam ndik daalbe we a nguuɗik o dal ole, soo a lay wiin we no saax le yee a xontooxa a ndeer no xon we. Yaaga o maaɓ o falakaand oleene na moƴkaa faaxaƭar o eetaand ole sax.»

⁶⁵ Pilaat a laya a den ee: «Yeeyetax we wey! Ndetyo yetoortin nuu nu mbaagtuuna!»

⁶⁶ A ndeta na mboy alaa, soo a ndoon o anddiloor took ɓil laa, a nqaƴ maaga yeeyetax.