Mace 25 - NQAARIIT NE ROOG

A naxax ale no roog xarɓaxay we

¹ «Yaaga koy, xan Maat ne na asamaan a nand fo roog xarɓaxay waa njangna xa lampa soo a nqetik fo o kor-no-kulook oxe.

² Ɓetuk na den kaa ƭof’u, soo yoq we a njeg yiif.

³ Ye ɓetuk ñaku xoox we a njangna xa lampa den, a mbaña o yaxandoox diwliin.

⁴ Jegu yiif we o mat, a njanga xa lampa den, soo a yaxandoox diwliin na xa moon.

⁵ Ye o kor-no-kulook oxe a yengeena a kar, a nqija den fop boo a mujat sax a ƭaan.

⁶ Ndeer o yeng olaa, o kiin a falaloox a yee: ‹O kor-no-kulook oxe xe garaa, ndetyo nqetik fo ten!›

⁷ Maaga, roog waa fop a yokooxa, soo a njagand xa lampa den.

⁸ Ñaku xoox waa a laya jegu yiif waa yee: ‹Ci’angyo a in na diwliin fee nuun, yaam xa lampa xe in owe ñufaa.›

⁹ Jegu yiif waa a ndoona a den ee: ‹Ha’aa, xetandee a nuun, yaam yaaga i yoqiɗkee. Ndetyo njikanik a qoox nuun maa no jula waa.›

¹⁰ Yaa da njikkaa, o kor-no-kulook oxaa a fadiida. Waa njagandoox’ina a ndoka fo ten na ndok alaa no ngulook naa, too begax naa a wege.

¹¹ Yaa ta ɓaatinna, roog lakas waa a mbadiida, a lay ee: ‹Yaal mbind! Yaal mbind! Wetani a in!›

¹² Maaga, a doona a den ee: ‹No ndigil, mexe layaa a nuun ee: Mosiim o and a nuun.›

¹³ Yetooxyo boog, yaam nu andee ñaal ne fa waxtu fee o kor-no-kulook oxe a garkaa.»

A naxax ale na xaaliis fa ndoxnite fee

¹⁴ «Xan a refahin nen o kiin oxaa andoona yee kaa ñaaƴkaa, soo a xoy faɗ um ndax ta doxin a den halal fee ten.

¹⁵ A cooxa o leng xa qanjar xa ƥetaq wurus, o lakas xa qanjar xa ƭaq, soo o tadkandeer oxe ta cooxin o xanjar o leng kut, oxuu refna podnaa ta hatilna, soo a sogkaa ret.

¹⁶ Ndak fo ndak, oxe doxin’eena xa qanjar xa ƥetaq a reta, soo a rimand a den boo a jegat xa qanjar xa ƥetaq xa lakas.

¹⁷ Oxe jeg’ina xa qanjar xa ƭaq axe itam a reta a rimand waa ten, too a jegata xa qanjar xa ƭaq xa lakas.

¹⁸ Oxe daaw’ina o xanjar o leng kut ole koy a reta, soo a gas o njemb, a ɗasin taaga xaaliis faa o yaal mbind um a doxin’uuna.

¹⁹ Yaa ta miñna, o yaal mbind no faɗ waa a nomtooxiida, soo a laac a den ke da saqan’uuna.

²⁰ Oxe daaw’ina xa qanjar xa ƥetaq axe a gara, a ɓisiid xa qanjar xa ƥetaq xa lakas, a layin ee: ‹Yaal mbind! Xa qanjar xa ƥetaq doxin’axamo, rimandaam xa qanjar xa ƥetaq xa lakas koy.›

²¹ O yaal mbind um a layaan ee: ‹Jook a njal, o paɗ o paax o kore’u xe! Gore’aa no tig neewu, ten taxu xam doxnong mayu. Rokiidi too felakinoox fo o yaal mbind of!›

²² Oxe daaw’ina xa qanjar xa ƭaq axe itam a matiida, a layin ee: ‹Yaal mbind! Xa qanjar xa ƭaq doxin’axamo, rimandaam xa qanjar xa ƭaq xa lakas.›

²³ O yaal mbind um a layaan ee: ‹Jook a njal, o paɗ o paax o kore’u xe! Gore’aa no tig neewu, ten taxu xam doxnong mayu. Rokiidi too felakinoox fo o yaal mbind of!›

²⁴ Naaga itam, oxe daaw’ina o xanjar o leng kut ole a gara, soo a lay ee: ‹Yaal mbind! Mi de, kaam and’u yee o kiin o ƭomu tig refo, too kaa o saxadaa kaa duufeeroona, fokataa itam kaa feeseeroona.

²⁵ Kaam diid’u boo ten taxu ye retoona, um dalfoox o ɗasnik ke doxin’axamoona kam lanq ke. Am, jangi ke jegoona!›

²⁶ O yaal mbind oxaa a layaan ee: ‹Wo soo ref o paɗ o soxodu too feeñaak! And’aa xil ee kaam saxadaa kaa duufeeruuma, soo fokataa kaa feeseeruuma.

²⁷ Ten taxu koy, kaa o war’u rawnit xaaliis fee mi, ndax um nomtooxiidangaa, um waag o daaw ke ta rimna.

²⁸ Njaɓyo o xanjar ole ten, too cooxin oxe jegna xa qanjar xarɓaxay axe.

²⁹ Oxe jegna, xan a ci’el, too xan a moƴ o mayiƭ, ndaa oxe jegeerna, onqe ta jegna sax xan a jaɓel.

³⁰ Ndeɓyo o paɗ o cegee njiriiñ oxe tafil kam o niɓaan ole maa xa lool fo ƈaxrand a ñiiñ a ndefkaa.› »

Nqel maak ne Roog

³¹ «Yaa o Ƥeenqe no kiin oxe a garkaa kam o ndam um, a yoon fo malaaka ke fop, xan a moof no gamb no maad le ten jegna o ndam.

³² Xan qeet ke fop a mbokatel mbaambir um, too xan a xaaj a den ne o kaynaak a xaajtaa pambe fo paal.

³³ Xan a fi paal ke na ñamaak um, soo pambe ke, ta fi a den na janoon.

³⁴ Maaga, xan o Maad oxe a lay we ndefna na ñamaak um ee: ‹Ngaryo, nuun we Faap es a barke’na. Njangyo Maat ne nu njagandan’eena yaaga adna a sogaa feroox,

³⁵ yaam kaam xeexel’el, nu cooxaam um ñaam, um hoɗomel, nu ci’aam um yer. Reeƭaam o kenar itam, soo nu ngenaraam.

³⁶ Ɓangid’eem, soo nu ñiraam, um jir, nu ƭeetiidaam, um damel, soo nu ngar farna fa mi.›

³⁷ Xan jofu waa a ndoonin ee: ‹O Yaal oxe, a mban i nga’ong o xeexel, soo i cooxong o ñaam mbaat o hoɗomel, soo i ci’ong o yer?

³⁸ A mban i nga’ong o ref o kenar, soo i ngenarong mbaat o ɓangdel, soo i ñirong?

³⁹ A mban i nga’ong o jir, soo i ƭeetiidong mbaat o damel, soo i ngar farna fa wo?›

⁴⁰ Maaga, xan o Maad oxe a lay a den ee: ‹No ndigil, mexe layaa a nuun ee: Ke nu mbi’anna o leng oxe moƴna o neew no fog es wene fop, mi nu mbi’anun.›

⁴¹ Cinj kaaga, xan a lay we ndefna na janoon um ee: ‹Ngoƭaamoo, wiin halakooxu we! Ndetyo kam fiɗel fo ñufkeer muk ole jagandan’eena o ƈiƴ oxe fo malaaka um,

⁴² yaam kaam xeexel’el, too nu cooxiraam um ñaam, um hoɗomel, too nu ci’iraam um yer.

⁴³ Kaam reeƭu o kenar, too nu ngenariraam, um ɓangdel, too nu ñiriraam. Jir’aam, damel, too nu ƭeetiidiraam.›

⁴⁴ Weene itam, xan a ndoonin ee: ‹O Yaal oxe, a mban i nga’ong o xeexel, hoɗomel, ɓangdel, jir mbaat o ref o kenar mbaat na kaso, too i ndimle’irang?›

⁴⁵ Xan a doon a den ee: ‹No ndigil, mexe layaa a nuun ee: Ke nu mbi’aneerna o leng oxe moƴna o neew no fog es wene fop, mi nu mbi’aneerun.›

⁴⁶ Waaga xan a ndet na qaw alaa fagkeerna boo faw, soo jofu we a ndet no ñoow o fagkeer olaa.»