Mace 23 - NQAARIIT NE ROOG

Yeesu a xasana Farisiya we fo jaajangin we no kebil ke

¹ Maaga, Yeesu a laya faan laa fo daalbe we ten ee:

² «Jaajangin we no kebil ke fo Farisiya we a moofa no gamb le Moyiis.

³ Mbi’yo too ngay ke da layaa a nuun, ndaa ba nu mbi ke da mbi’aa, yaam kaa layaa too mbi’kee.

⁴ Kaa ngumaa toq meɗu kaa ƭomeena ndoxondoox, a mbug wiin we a ngadoox a den, too den fa qoox den mbugee nqol den a duq teen.

⁵ Kuu da mbi’aa, kaa mbug soom wiin we a nga a den. Kaa ndokooxaa a safe yaaju fo a ndoki maak akaa njegna pic.

⁶ Kaa mbex o mbodaa no moofir ke moƴna o niwnoox no qew ke, a mbex o mbodaa mbaambir kam pind a qeƭ ke.

⁷ A mbexa o simnel kam qel ke, too a mbuga wiin we a nqoyaa a den ‹O caajangin o maak!›

⁸ Nuun o mat, ba nu ne’oox ‹O caajangin o maak!›, yaam o leng soom refu o Caajangin nuun. Nuun fop, fog nu ndefu.

⁹ Ba nu nqoy o leng na adna fee faap nuun itam, yaam o leng soom refu Faap nuun, ta ref oxe refna na asamaan.

¹⁰ Ba nu ne’oox kelfa, yaam o leng soom refu kelfa nuun, ta ref Kiristaa fee o Muumucil oxe regteena.

¹¹ Oxe hupna a ndeer nuun, fat a ref o tag nuun.

¹² Oxuu magnandooxna, xan a neewandel, too oxuu neewandooxna, xan a yoɗel.»

Yeesu a ɓanja yememaar ne

¹³ «Ndaw sabab took nuun, nuun jaajangin we no kebil ke fo Farisiya we, nuun we ndefna yememaar! Kaa nu yaqanaa wiin we da ndok no Maat ne na asamaan. Nuun fa qoox nuun, nu ndokkee, too nu nqaƴkee we mbugna ndok, da ndokiid. [

¹⁴ Ndaw sabab took nuun, nuun jaajangin we no kebil ke fo Farisiya we, nuun we ndefna yememaar! Kaa nu njaɓaa ke ñaaw we a njegna fop, yoonandtin a qeƭ a ciig, ndax nu ƭeetel nen jofu. Ten taxu, nuun na moƴkaa o ƭomiɗ hate.]

¹⁵ Ndaw sabab took nuun, nuun jaajangin we no kebil ke fo Farisiya we, nuun we ndefna yememaar! Kaa nu mbidaa o maag ole fo lanq ke ndax nu njeg o taalbe leng. Neene koy, nu njegangaan, nu mbi’in o ƥiy fiɗel onqaa moƴna faaxaƭar a nuun.

¹⁶ Sabab took nuun, nuun we na ƭoxaa too mbuul! Kaa nu layaa yee: ‹O gaañtangaa Mbind Roog ne, kaaga refee dara, ndaa boo gaañtoona wurus fee refna kam Mbind Roog ne, rokaa.›

¹⁷ Nuun soo ƭof too mbuul! Kum hupu na den, wurus fee ndi Mbind Roog ne na tedlandaa wurus fee?

¹⁸ Nu layahina yee: ‹O gaañtangaa o sadaxand ole, refee dara, ndaa boo gaañtoona sadax fee refna took o sadaxand ole, rokaa.›

¹⁹ Nuun soo mbuul! Kum hupu na den, sadax fee ndi o sadaxand ole na tedlandaa sadax fee?

²⁰ Oxuu gaañitna o sadaxand ole, a gaañta ke refna took um itam.

²¹ Oxuu gaañitna Mbind Roog ne, a gaañta oxe genna teen itam,

²² too oxuu gaañitna asamaan fee, a gaañta gamb no maad le Roog, a gaañit a Roog fa xoox um fee moofna teen.

²³ Ndaw sabab took nuun, nuun jaajangin we no kebil ke fo Farisiya we, nuun we ndefna yememaar! Kaa nu cooxtaa a seek xarɓaxayandeer ale na naana fee fo na fasaaƥ fee fo na kaane fee, soo koy nqaƴ ke moƴna jeg o njiriiñ no kebil ke, ta ref o cofel fa yirmande fo o ngim. Keene kaa jareena o fi oo, ndaa waree o tax nu yapatil tig lakas ke itam.

²⁴ Nuun we na ƭoxaa too mbuul! Keene refee furɓaa ƥook soo ɗuudaa ngeeleemb?

²⁵ Ndaw sabab took nuun, nuun jaajangin we no kebil ke fo Farisiya we, nuun we ndefna yememaar! Kaa nu ƥogdaa took fee na tokol ale fo took fee no roon ole, too yaaga fop oo kam fee kaa may fo kuuɗe fo ke a yuxum a paaxeer ake a ƥisiidna.

²⁶ O Farisiya puulu xe! Pañtu o eet o laxad kam a tokol ale ndax tafil fee a waag o xool itam!

²⁷ Ndaw sabab took nuun, nuun jaajangin we no kebil ke fo Farisiya we, nuun we ndefna yememaar! Kaa nu nand fo poy kaa ndan-gineena, boo took fee a mos bo, too yaaga fop oo kam fee kaa may fo xa kiiƈ no xon fo qooleer kuu refna.

²⁸ Neene nu nandtu fo jofu yaa o kiin a ƴookna a nuun, ndaa kam nuun, yememaar fo njofaƭar ƥor ndefu teen.»

Yeesu a yegnita a qaw ale

²⁹ «Ndaw sabab took nuun, nuun jaajangin we no kebil ke fo Farisiya we, nuun we ndefna yememaar! Kaa nu maxaa poy ke no duleer we, soo ndan-ginaa poy ke no jofu we.

³⁰ Kaa nu layaa itam ee: ‹I njopir’angaa fo daan waa in, i yoonkoogee fa den, ye da mbaraa duleer waa.›

³¹ Naaga nu seede’taa na qoox nuun sax sax ee xa taan no we mbarna duleer we nu ndefu.

³² Meƭityo eedir ke no daan nuun boog!

³³ Nuun soo ndef fo nqisiil fo wiin sabab! Nam nu mbaagu o ndaɗit a qaw ale na fiɗel laa ñufkeerna?

³⁴ Ten taxu nan-gilooxaamoo! Mexe ɓisiidaa me nuun duleer fo yaal-o-and fo waa na mbugko njangnaa a Pind a Tedu ke. Kaa koy, xan nu mbar leng we, lakas we nu ndeng a den na kurwaa, we yoqna nu nqaw a den xa cap kam pind a qeƭ ke nuun, soo ñagadilit a den na teeru boo na teeru.

^35-36 No ndigil, mexe layaa a nuun ee: Xan fo’oy le no jofu we ɓaxooxna a lanq fop a yen took wiin we ndiiki. No fo’oy laa Abel o cofu xe a xotitkaa, boo no fo’oy laa no ƥiy Barakiya ne’eena Sakari, too nu mbarit’un a ndeer Mbind Roog naa fo o sadaxand olaa.»

Yeesu a xasana a Yeerusaleem

³⁷ «Yeerusaleem, Yeerusaleem, wo fee na saŋkaa duleer we, wartaa a kac we luliideena me wo, a caf a mayu bug’aam o fokat xa ƥeef ne a cek a fokatta xa ñeek um yoora a nafir um, too nu mbañ!

³⁸ Ten taxu xan Mbind Roog nuun a xaƴel, a yoq o ƥor!

³⁹ Mexe layaa a nuun ee: Nu nga’katiraam muk, boo yaa nu laykaa yee: ‹Oxe na garaa no gon le no Yaal oxe a hela simatel.› »