Mace 22 - NQAARIIT NE ROOG

A naxax ale no ngulook ne

¹ Yeesu a dakooxa o naxoox, a lay a den ee:

² «Maat ne na asamaan kaa nand fo o maad oxaa na roofandaa ngulook no ƥeem o ngoor,

³ soo a lul dag um ndax da nqoyik we njawaneena a put ale. Waa nqoyeena koy mbug’ee o ngar.

⁴ A dakooxa o lul dag lakas ee: ‹Layyo we nqoyeena yee fi’aam a put, war qoox es fo cegel ke moƴna o neer no muumeen ke mi. Ndiiki fop a ƴuta, fat a ngar a ñaam!›

⁵ Yaa waaga a nanna kaaga, a ƭat den yong’ee no xoy ole, ndaa a ndeta, oxene no qol um, oxaana na cikax um.

⁶ Lakas waa koy kaa ndam dag waa, a nqaw a den, a mbar a den.

⁷ O maad oxaa a fuuxa, too a lula dag um ndax da mbarik wiin faaxeer waaga, soo a ndox teeru faa den.

⁸ Maaga, a laya dag waa ten ee: ‹A put ale a ƴuta, ndaa a jomba we ta jawaneena.

⁹ Ndetyo boog na xa salit axe fo na ƭat ake, too nqoy we nu nga’kaa fop.›

¹⁰ Dag waa a ndeta, a mbokat we da nga’na fop, faax fo soxodu, boo a ndok ale wiin we a ñaamtoogna a may muut.

¹¹ O maad oxaa a rokiida ndax ta ga we ndeer’ina, too a ƴooka a ndeer no wiin waa o leng oxaa rokooxeerna ndoki ne warna no ngulook.

¹² A layaan ee: ‹Xaariit es, nam rokto mene, too saqiro ndoki ngulook?› O kiin oxaaga waag’iran o doon ɗelem leng sax.

¹³ Maaga, o maad oxaa a laya dag waa yee: ‹Ngumyo xa ƥay axe no kiin oxene fo a caf ake ten, too ndeɓin tafil fee kam o niɓaan ole. Maaga xa lool fo ƈaxrand a ñiiñ a ndefkaa.›

¹⁴ A jega mayu we nqoyeena, ndaa we njileena mayee.»

Roog fa Kesaar fee

¹⁵ Maaga, Farisiya we a ndeta a nga’rik, ndax da mbaag o mbog a Yeesu took fa lay um sax sax.

¹⁶ A lula maa ten daalbe we den fo waa mbogna na qaaj ale Herood ee: «O Caajangin oxe, i anda yee o kiin o booru refo, too kaa o jangnaa a ƭat Roog no ndigil. A ƭat of yongee no leng itam, yaam naagiro o ɗeetaa ne wiin we a nandna.

¹⁷ Ten taxu itam i laamtiidong ne keeke a nandoonga: Ndax o kiin a wara o rabid a Kesaar fee a bateer, ndax nam?»

¹⁸ Yeesu a anda coxod naa den, too a doona a den ee: «Nuun soo ndef yememaar! Xar taxu nu mbogaxam?

¹⁹ Lalaamoo xaaliis fee nu ndabditaa a bateer.» A lalaan o xanjar.

²⁰ Maaga, Yeesu a laamta a den ee: «Nitaal nene fo a pind akene, an jegu a den?»

²¹ A ndoonaan ee: «Kesaar fee.» Maaga, a laya a den ee: «Ƥoxotyo boog a Kesaar fee ke Kesaar fee a jegna, soo ƥoxot a Roog ke Roog a jegna.»

²² Ne Yeesu a doonit’ina a den a bet’a a den lool, too a mbaasaan, a ndet.

Kaa farna na qontax ale no xon we

²³ Na bes faaga sax, Sadusiya we na layaa yee a qontax jegee, a ngara me Yeesu, a laamtin ee:

²⁴ «O Caajangin oxe de, Moyiis kaa lay ee o koor oxuu xonna, too rimee fo o teem xa ƥiy, o ndeɓ um a wara o lam o ñaaw oxaa, a sakan o maag um ƥasil.

²⁵ Kaa jeg’u koy a ndeer in o maag fo xa teɓ ɓetaa fo leng. Ye o maag oxe a xonna, too xaƴee xa ƥiy, o ndeɓ um a lama o tew oxe.

²⁶ Naaga a xewit’u itam no ƭikandeer oxe fo no tadkandeer oxe, bo no ɓetuu fa lengandeer oxe.

²⁷ Cinj den fop, o tew oxe a xona itam.

²⁸ Ndiiki koy i laamtang: Na bes faa na qontax alaa, an na den na jegkaa o tew oxe, yaam ɓetuu ɗik we fop a njeg’aan?»

²⁹ Yeesu a doona a den ee: «Kaa nu mo, yaam nu andee a Pind a Tedu ke, katil fee Roog ne’aand.

³⁰ Na qontax ale, goor we ngiligkatee, too rew we ndolooxkatee, ndaa xan a nand fo malaaka ke ndefna na asamaan.

³¹ No kaa farna na qontax ale no xon we, ndax kaa nu njangee ke Roog a layna a nuun:

³² ‹Mi refu Roog fee Abraham fa Roog fee Isaak fa Roog fee Yakoob.› Roog refee Roog fee no xon we, ndaa Roog fee no ñoow we.»

³³ Wiin waa nan-gilooxoogna a Yeesu fop a njaaxiɗ’a, yaam ne ta jangnitoogna.

Kebil ne hupna no kebil ke

³⁴ Yaa Farisiya waa a nanna yee Yeesu a ɓura Sadusiya waa, a ndalfooxa o mbokatoor.

³⁵ O leng na den oxaa reeƭna o caajangin o maak no kebil kaa, a bug’aan o ɗeetloox, too a laamtaan ee:

³⁶ «O Caajangin oxe, kebil num moƴu o magin no kebil ke?»

³⁷ Yeesu a doonaan ee: « ‹Xan o fex o Yaal oxe Roog of no xeeñ of fop, no laaw of fop fo na qalaat of fop.›

³⁸ Ten eetu no kebil ke, too ten refu ne moƴna magin.

³⁹ Neeke refu ƭikandeer ne nandna fo ten: ‹Xan o fex o kend of nen a xoox of.›

⁴⁰ No kebil ƭik keene, kebil ke fo duleer we fop a saxu.»

Yeesu Kiristaa, o Ndaan Dawid, o Ƥeenqe Roog

⁴¹ Yaa Farisiya we a mbokatoorna, Yeesu a laamta a den ee:

⁴² «Xar nu mboogu na Kiristaa fee o Muumucil oxe regteena? O ƥiy an oo yee?» A ndoonaan ee: «O Ndaan Dawid oo.»

⁴³ Yeesu a laya a den ee: «Nam Dawid a waagun o xoyit o Yaal oxe na pexey Yiif le Roog boog,

⁴⁴ ye ta layna yee: ‹O Yaal oxe a laya o Yaal oxe mi yee: Moofi na ñamaak es boo yaa fi’uuma fañ we wo me o dakaa.›

⁴⁵ Dawid a xoyangaan o Yaal oxe mi, nam a waagu o refit o Ndaan um koy?»

⁴⁶ O leng waag’iran o doon ɗelem leng sax, too no kaa xotitna na bes faaga, o leng saɗ’atiran o laamit tig.