Mace 21 - NQAARIIT NE ROOG

Yeesu a rokiida Yeerusaleem

¹ Yaa da mbadiidna Betfage paam Yeerusaleem, farna fo o Joong olaa no taxar oliiw kaa, Yeesu a lula daalbe ɗik,

² soo a lay a den ee: «Ndetyo na saate fee refna mbaambir nuun. Xan nu soƥ maaga o faam o rew olaa humeena, ten fo o mol um. Mbokityo a den, too ƥisiidaam a den.

³ O kiin a layangaa nuun tig, fat nu ndoonin ee: ‹O Yaal oxe soxla’u a den.› Yaaga xan a xaƴ a den fa nuun ndak fo ndak.»

⁴ Kaaga a fadiida, ndax ke lay’eena na pexey o tuleer oxe a fadnoox:

⁵ «Layyo a Siyoŋ, o ndoog onqe yee: O maad of oxey a garaa me wo, kaa ɓuuɓ, too took o faam a ŋaayu, took o mol, o ƥiy no faam o jalir.»

⁶ Daalbe waa a ndeta, soo a mbi ke Yeesu a hebil’ina a den.

⁷ A ƥisiida o faam o rew olaa fo o mol onqaa. A ƭapanaan toki ke den, soo Yeesu a moof took fee.

⁸ Faan laa ndeeƭna maaga a ƭaapooga toki ke den kam a ƭat ale, lakas a ƭegaa a naaq taxar, soo a ndoonaa a den kam a ƭat ale itam.

⁹ Wiin mayu we adoox’ina a Yeesu fo we ndeefan’uuna kaa mbalalooxoogu yee: «Hoosiyana, o Ndaan Dawid! Oxe na garaa no gon le no Yaal oxe a hela simatel. Hoosiyana took-ee-took asamaan!»

¹⁰ Yaa Yeesu a rokna kam Yeerusaleem, teeru faa fop a yo’nooxa, too wiin we a laamtooga yee: «Ndi an oo xene?»

¹¹ Wiin mayu a layooga yee: «Yeesu o Naanasaret oxe yoo, o tuleer oxe inoorna no jegel olaa Galile.»

Yeesu a raxa jiijikax waa no Mbind Roog naa

¹² Yeesu a roka no Mbind Roog naa, soo a rax jiijikax we fo we njikoogna fop kam faa. A maafa a taabul ake no we mbecetoogna xaaliis fo a tuɗand ake no jiijikax we na nuukuur ake.

¹³ Maaga, a laya a den ee: «A Pind a Tedu ke a laya yee: ‹Mbind es xan a xoyeel mbind a qeƭ.› Nuun o mat, kaa nu mbi’in ngol no guuɗ.»

¹⁴ Fuul fo wiin waa na laƴaa, a matiida a Yeesu kam Mbind Roog naa, too a wodanda a den.

¹⁵ Saasadax maak waa fo jaajangin waa no kebil kaa Moyiis a mbuux’a lool, yaa da nga’na comlaand kaa ta fi’na fo xa teɓandoong axe mbuuqoogna kam Mbind Roog naa yee: «Hoosiyana, o Ndaan Dawid!»

¹⁶ Kaaga a taxa da lay a Yeesu yee: «Ndax kaa naniro ke da layaa?» Yeesu a doona a den ee: «Nanaanum moos! Ndax kaa nu mosee o njang kene: ‹Xottaam a simat na xa ton axe na xa teɓandoong xa tutuuñ axe fo no we na xa qeq axe›?»

¹⁷ Yeesu a waasa a den maaga, soo a sutoox, a ret a fe’ik na saate faa Betani.

Yeesu a salooxa ndun

¹⁸ Yaa Yeesu a nomtooxaa na teeru faa no nqes naa, a xeexel’e lool.

¹⁹ A ƴooka ndun paam a ƭat ale, a matiidin, ndaa soƥee taaga o jala leng a refangee a naf a ƥor, too a layaan ee: «Yaasam baa o rim o leng sax a feeñat took of boo faw!» Ndak fo ndak, ndun naa a naaga ŋayam a weer.

²⁰ Daalbe waa a nga’a kaaga, too a bet’a a den. Naaga, a laya yee: «Nam ndun ne a waagu o weerit ñofaand kene?»

²¹ Yeesu a doona a den ee: «No ndigil, mexe layaa a nuun ee: Nu njegangaa o ngim, too nu saqee a yiif-a-ƭak, nu mbi’kee ke fi’eena meeke soom, ndaa yaaga nu layangaa o joong olene yee: ‹Inooxi mene, too jimboox kam o maag olaa›, yaaga xan kaaga a jeg.

²² Kuu nu nqeɗna fo o ngim, xan nu ndaawin.»

Sañ-sañ fee Yeesu

²³ Yeesu a roka no Mbind Roog naa. Yaa ta jangnaa, saasadax maak waa fo maak waa na xeet faa a ngara, a laamtin ee: «Sañ-sañ fum o fi’taa kene? An ci’ong sañ-sañ fene?»

²⁴ Yeesu a doona a den ee: «Xam laamit a nuun tig itam. Boo nu ndoonaxama, xam lay a nuun sañ-sañ fee um fi’taa kene.

²⁵ Batiise fee Saŋ, mam a inoor’u? Na asamaan ndi no wiin we?» Maaga, a ñimatirooga yee: «Boo i ndoonuuna yee: ‹Na asamaan a inoor’u›, yaaga xan a lay a in ee: ‹Xar taxu boog nu ngim’ee no ten?›

²⁶ Too i ndoonangaan ee: ‹No wiin we a inoor’u›, i mbara o saɗar wiin we, yaam kaa mbi a Saŋ o tuleer.»

²⁷ Maaga, a ndoona a Yeesu yee: «I andee.» Yeesu a laya a den ee: «Mi yoo, laykiim a nuun sañ-sañ fee um fi’taa kene.»

A naxax ale na xa ƥiy xa ƭaq axe

²⁸ «Nam tige a nandu a nuun boog? O kiin jeg’u jeg xa ƥiy xa ƭaq. A gara me no eetaand oxe, a layin ee: ‹O ƥees, inooxi jalik na ƭing taxar biiñ alaa xaye!›

²⁹ O ƥiy onqaa a doonaan ee: ‹Retkiim›, ndaa a ricooxa, too a ret.

³⁰ A laya o ƥiy o lakas onqe leng kut ke. Ten o mat, a doonaan ee: ‹Iyo faap, xam ret›, ndaa retee.

³¹ An no ɗik waaga fi’u ke faap um a bugna?» A ndoonaan ee: «O eetaand oxe.» Maaga, Yeesu a doona a den ee: «No ndigil, mexe layaa a nuun ee: We na ndabdinooxaa juuti fo we na seeqaa, xan a adoox a nuun no Maat naa Roog.

³² Yaam Saŋ o Paabatiise xe a gara me nuun, a lal a nuun a ƭat ale no cofel ole, ndaa nu ngimee fa lay um. We na ndabdinooxaa juuti fo we na seeqaa a ngima no ten. Ke nu nga’na keene fop oo, taxee nu ndicoox too ngim.»

A naxax ale no xooxoox soxodu we

³³ «Nan-gilooxyo a naxax a lakas. Kaa jeg’u jeg o yaal mbind oxaa jimbna a ƭing taxar biiñ. A ɗingaan, soo a waq kam faa o nirir. A maxa taaga o yetooxand. Maaga, a doxnaan xooxoox, ndax da nqaajran fo ten, soo a ñaaƴik no saax jan.

³⁴ Yaa a saxad alaa a fadna, a lula dag um maa no xooxoox waa, ndax da ƥisiidin xa tim um.

³⁵ Kaa koy, xooxoox waa a ndama dag waaga, a nqaw o leng oxe, a mboom o lakas oxe, o tadkandeer oxe da mbartin a kac.

³⁶ A lulahina dag lakas waa moƴna may eetaand waa. Xooxoox waa a mbi’ahin a den nen eetaand waa.

³⁷ Cinj kaaga, a lula o ƥeem, yaam kaa layoogu yee: ‹Xan a niw o ƥees.›

³⁸ Kaa koy, yaa xooxoox waa a nga’na o ƥiy onqe no yaal a ƭing alaa a garaa, a laya yee: ‹O lam oxe xe garaa. Fat i mbarin, soo njang ke ta war’ina o lam fop.›

³⁹ A ndamaan, a ƭooqin boo ta sutoox a ƭing alaa, soo da mbarin.

⁴⁰ Ii, ndiiki koy, boo o yaal a ƭing alaa a garna, nam a fi’kaa xooxoox waaga?»

⁴¹ Wiin waa a ndoona a Yeesu yee: «Xan a war wiin faaxeer waaga a bar a parƴu, too xan a doxin a ƭing alaa xooxoox lakas waa na njaɓkaa o nqaajir fo ten saxade le.»

⁴² Yeesu a laya a den ee: «Ndax nu mosee njang kam a Pind a Tedu ke yee: ‹Ɓil le maamax we a ndeɓ’ina refatu ɓil faraaj le. Keene no Yaal oxe a inooru too njomlaand oo na kid in.›

⁴³ Ten taxu, mexe layaa a nuun ee: Xan Maat ne Roog a watnel na xa ƥay nuun, soo a doxnel xeet faa na ƥoxotkaa xa tim axe ten. [

⁴⁴ Oxuu yenna took ɓil leene xan a ɓoloox, too took no xuu ta yenna xan a feñexoox.]»

⁴⁵ Yaa saasadax maak waa fo Farisiya waa a nanna kaaga, a and’a yee den Yeesu a ne’aa,

⁴⁶ ndaa kaa saɗaroogu wiin mayu waa, ke da mbug’uuna o ndam fop oo, yaam wiin we kaa mbi’’u a Yeesu o tuleer.