Mace 20 - NQAARIIT NE ROOG

A naxax ale no jaajal we njangeena no baxtu pogreer

¹ «Maat ne na asamaan kaa nand fo o yaal mbind oxaa sutooxna ƥiiɓ teel, ndax ta waaƭ waa njalanuuna na ƭing biiñ um.

² A jaɓ’a o rabid a den o xanjar o leng ñaal nuu refna. Naaga, a ɓisa a den na ƭing um.

³ Farna fo njeeƈ-tanqin a sutooxa, soo a dakooxa o ga lakas waa moofna na baayo faa, too njegee kaa da njalna.

⁴ A laya a den ee: ‹Ndetyo na ƭing biiñ es nuun itam, too xam coox a nuun ke warna.›

⁵ Ngoor kaa a ndalfooxa o ndet. O yaal mbind oxaa a sutooxahina yaa njeeƈ ne a fodna ndeer xoox fo na waxtu kirandax, a fi leng kut ke.

⁶ Yaa ta sutooxna farna fo njeeƈ mudu naa, a ga’ahina waa moofna no nqel naa. A laya a den ee: ‹Xar taxu nu ndef mene ñaal ne fop, too nu njalee dara?›

⁷ A ndoonaan ee: ‹O leng jangee jang a in.› A laya a den ee: ‹Ndetyo na ƭing es nuun itam.›

⁸ Yaa ta yaarna, o yaal a ƭing alaa a laya oxe na rabdanan ee: ‹Xoyi jaajal we, rabid a den. Eetti no we mbalakna o ngaraa, jof no we eetna o ngar.›

⁹ We ngar’ina no njeeƈ mudu naa a cooxe oxuu refna o xanjar o leng.

¹⁰ Yaa waa eet’ina o ngar a mbadiidna, a mboog’a yee xan a ndaaw kaa hupna kaaga, ndaa a cooxe itam oxuu refna o xanjar o leng.

¹¹ Yaa da ndaawna kaaga, a nqaada o yaal mbind naa,

¹² a layin ee: ‹We mbalakna o ngaraa, waxtu fa leng soom a njalu, soo o fodandaa a den fa in, in we ndoxondooxna xij le fo mbooyo ne fop.›

¹³ A doona o leng na den ee: ‹Xaariit es, naxiroong. Ndax i njofoor’ee no xanjar o leng?

¹⁴ Jangi ke waroona o jeg, too inoox meen. Kaa felaam um coox oxe falakna o garaa podu nen ke wo.

¹⁵ Ndax kaa waagiim o fi na halal es ke buguuma? Ndi o paaxel ole mi kaa feƭarong?›

¹⁶ Neene we mbalakna ndiiki a ndefitkaa we adooxna, soo we adooxna ndiiki a ndefat we mbalakna.»

Yeesu a dakooxa o yegnit fa nqon um fo a qontax um

¹⁷ Yaa Yeesu a xotna a ƭat a jofaa Yeerusaleem, a kes’a xarɓaxay fo ɗik we, a lay a den ee:

¹⁸ «In we ndetaa Yeerusaleem too xan o Ƥeenqe no kiin oxe a ɓoxotel saasadax maak waa fo jaajangin waa no kebil kaa Moyiis. Xan a ngate’in ndax ta warel.

¹⁹ Xan a ƥoxotin gimaƭaru we, ndax da nqaadnooxin, a nqawin xa cap, soo a ndengin na kurwaa, ndaa no ñaal ndadkandeer naa, xan a xontoox.»

Xa ƥiy axe Sebede

²⁰ Maaga, ya na xa ƥiy axe Sebede a yooniida fo xa ƥeem, a gar me Yeesu. Yaa ta matiiduuna, a gooknooxa ndax ta xeɗin tig.

²¹ Yeesu a laamtaan ee: «Xar bugo?» Yaay faa a xeɗaan ee: «Fi’i xa ƥees xa ƭaq axeeke a moof kam maat of, oxene na ñamaak of, o lakas oxe na janoon.»

²² Yeesu a doonaan ee: «Nu andee ke nu nqeɗaa. Ndax nu mbaaga o yer o kaas coono le waruuma yer?» A layaan ee: «I mbaagaan.»

²³ Yeesu a doonahina a den ee: «Xan nu yer o kaas coono le mi kañ, ndaa no ke farna no moof na ñamaak es fo na janoon es, kaaga hapooxee na mi, ndaa we Faap fee a jagandanuuna, xan a ndaawin.»

²⁴ Yaa daalbe xarɓaxay waa a nanuuna, a nqaad’a fog ɗik waaga.

²⁵ Yeesu a xoya a den, soo a lay ee: «Nu anda yee yaal a saax ake kaa ngeblaa a saax den fa doole, soo aa-adax we a laltaa sañ-sañ den.

²⁶ Fat nu and koy ee refitkee naaga a ndeer nuun. Kaa koy, oxuu bugna o ref o maak a ndeer nuun, fat a ref o tag nuun.

²⁷ Oxuu bugna o adooxan a nuun, fat a ref o paɗ nuun.

²⁸ Neene o Ƥeenqe no kiin oxe a gartu, refee yee ndax ta dagooxel, ndaa ndax ta dagoox, soo a cooxit o ñis um nen a su’nit no wiin mayu.»

Yeesu a wodanda fuul ɗik

²⁹ Yaa da sutooxna teeru faa Yeriko, wiin mayu a ndeefan’a a Yeesu.

³⁰ Maaga, a jeg’a fuul ɗik waa moofna paam a ƭat ale. A nana yee Yeesu na jooniidaa, too a laya a maak ee: «Wo o Ndaan Dawid! Ngela yirmi a in!»

³¹ Wiin mayu waa a nqasanooga a den ndax da tiim, ndaa kaa moƴ’u o mbuuqaa yee: «Wo o Yaal oxe, o Ndaan Dawid! Ngela yirmi a in!»

³² Yeesu a geenooxa, a xoy a den, too a lay ee: «Xar nu mbugu um fi’an a nuun?»

³³ A layaan ee: «O Yaal oxe, fi’i a kid in a mbetoox!»

³⁴ A yuɗ’a a Yeesu, ta duq a kid den, too ndak fo ndak a mbaagata a ka, soo a ndeefanin.