Mace 19 - NQAARIIT NE ROOG

Yeesu a dakooxa o jangin kaa farna na tas a tolax

¹ Yaa Yeesu a ƴutna waare faaga, a inoorta Galile, soo a ret no jegel olaa Yudee, kaltaa o xuluɓ ole Yordaan.

² Wiin mayu a ndeefanaan, too maaga a wodanda jiru waa.

³ Farisiya waa a matiidaan ndax da ƭeetlooxin. A laamtaan ee: «Ndax o kiin a waaga o waas o teem yaam kuu ta waagna waag o ref?»

⁴ A doona a den ee: «Ndax kaa nu njangee kam a Pind a Tedu ke yee o Saasak oxe, o koor fo o tew a sak’u no mberaand naa?

⁵ Cinj kaaga, Roog a laya yee: ‹Ten taxu o koor a xaƴaa a faap um fa ya um, a hiɓoor fo o teem, soo den ɗik xan a ndefat njer leng kut.›

⁶ Naaga, ndefkatee ɗik, ndaa o leng kut a ndefatu. Yaaga boog, baa o kiin a xaaj ke Roog a fokatna.»

⁷ Farisiya waa a laamtaan ee: «Xar taxu boog Moyiis a lay ee o kiin a waaga o cooxit o moon baasin olaa lalitna yee a waasa o teem?»

⁸ Yeesu a doona a den ee: «A qeeñ a saƭku ke nuun taxu Moyiis a ci a nuun, nu mbaag o mbaas rew nuun, ndaa no mberaand naa refit’ee naaga.

⁹ Mexe layaa a nuun ee: Oxuu waasna o teem, too refee yee yaam o tew oxeene kaa seeqaa, soo a gilig o lakas, a seeqa.»

¹⁰ Daalbe we a layaan ee: «A refangaa yee neene a saxtu a ndeer o koor fo o tew, ñak o gilig sax moƴu.»

¹¹ Yeesu a doona a den ee: «Fop andee ke fa lay feene a tekitna, we ta cooxeena soom andun.

¹² Yaam kaa jeg mayu kaa andoona yee ten na yaqanaa goor leng we da ngilig. Leng we kaa ndimteel o ñak o waag. A jega itam lakas waa wiin we a yaqna boo mbaagatee, soo yoq we koy a mbañaa ndolnirel yaam Maat ne na asamaan. Fat oxuu waaguuna o jaɓ, a jaɓin.»

Yeesu a barke’a xa teɓandoong

¹³ Yeesu a ɓisiide xa teɓandoong xa tutuuñ, ndax ta doon a den xa ƥay, a xeɗan a den, ndaa daalbe waa a nqasana waa ƥisiid’ina a den.

¹⁴ Yeesu a laya a den ee: «Nqaƴyo xa teɓandoong axe! Ba nu mbañit a den da ngar me mi, yaam we nandna fa den njegu Maat ne na asamaan.»

¹⁵ A doona a den xa ƥay. Cinj kaaga, a inooxa maaga.

O koor o cegu halal oxe

¹⁶ O koor a matiida, a laamit a Yeesu yee: «O Caajangin oxe, paax kum helum o fi ndax um jeg o ñoow o fagkeer ole?»

¹⁷ Yeesu a doonaan ee: «Xar taxu o laamtaxam no ke faaxna? O leng soom faaxu. O bugangaa rok no ñoow ole, gayi kebil ke.»

¹⁸ A laamtaan ee: «Kebil kum?» Yeesu a doonaan ee: «Warkiro o kiin! Seeqkiro! Guuɗkiro! Seede’ankiro o kend of na xa maaƥ!

¹⁹ Niwi a faap of fa ya of! Fat o fex o kend of nen a xoox of sax sax!»

²⁰ O fes olaaga a layaan ee: «Reefaam keene fop, xar yoqɗatum koy?»

²¹ Yeesu a layaan ee: «O bugangaa o ñak sik, reti jikoox kaa jegoona fop, lasin rool we, too yaaga xan o jeg halal na asamaan. Cinj kaaga, o gar reefanaam.»

²² Yaa o fes olaa a nanna fa lay faaga, a naaga col a ret, a gooy bo, yaam kaa may’u halal.

²³ Maaga, Yeesu a laya daalbe um ee: «No ndigil, mexe layaa a nuun ee: Xan o yaal halal a ɗom o rok no Maat ne na asamaan.

²⁴ Mexe layahinaa a nuun ee: Ngeeleemb a ñoom no yul o fiic moƴu o yooɓ ee o yaal halal a rok no Maat ne Roog.»

²⁵ Yaa daalbe waa a nanuuna, a njaaxɗa lool, too a lay ee: «Yaaga boog, an waagu o muc?»

²⁶ Yeesu a ɗeeta a den, too a lay a den ee: «Wiin we mbaagiran, ndaa Roog o mat, dara xoxiran.»

²⁷ Maaga, Piyeer a layaan ee: «In de, i nqaƴa fop soo ndeefanong, xar i njegkaa koy?»

²⁸ Yeesu a laya a den ee: «No ndigil, mexe layaa a nuun ee: Boo adna fee a sakatineena, soo o Ƥeenqe no kiin oxe a moof kam o ndam onqe no maat ne ten, nuun we ndeefanaxama, xan nu njeg a kamb xarɓaxay fo a kamb a ƭak, too xan nu ngate a carind xarɓaxay fo a carind a ƭak ake Isra’el.

²⁹ Oxuu xaƴna mbind um mbaat maag um mbaat xa teɓ um mbaat a faap um mbaat a ya um mbaat xa ƥeem mbaat xa qol um yaam gon es, xan a daawin a caf teemeed, too xan a lam o ñoow o fagkeer ole.

³⁰ Mayu no we adooxna ndiiki xan a ndef we mbalakna, too mayu no we mbalakna ndiiki xan a ndef we adooxna.»