Mace 17 - NQAARIIT NE ROOG

Yeesu a suptooxa

¹ A cinj ñaal ɓetuu fa leng, Yeesu a ɓislooxa a Piyeer fa Saak fa Saŋ fee o ndeɓ um, soo a ŋaay fa den no joong o goƭu took maa da ndeeƭna den soom.

² Yeesu a suptooxa mbaambir den. A tagid um a meleƈa boo nen njeeƈ ne, soo toki um a ndanig boo taw.

³ Maaga, Moyiis fa Eliya a mbeeñooxa a den, a layaa fa Yeesu.

⁴ Piyeer a laya a Yeesu yee: «O Yaal oxe, a tef ale in mene a fela lool. O jaɓangaa xam sip mene ƭiif tadik: Leng of, leng Moyiis fo leng Eliya.»

⁵ Yaa ta maadna o layaa, eel xoolu a muura a den. A jega o ñuxur olaa nannoorna kam eel laa, too a lay ee: «Oxene refu o Ƥees onqe fexuuma fex, too no ten felakinoortum. Nan-gilooxeenoo!»

⁶ Yaa daalbe waa a nanna o ñuxur olaaga, a yena ƭaasin, too diid maak a dama a den.

⁷ Maaga, Yeesu a matiida, a duq a den, too a lay ee: «Inooxyo, ba nu ndiid!»

⁸ A ndaxaaƴooxa, ndaa nga’ee o lakas a refangeerna Yeesu soom.

⁹ Yaa da mbudoortaa no joong olaa, Yeesu a maƭooxa a den ee: «Ba nu lay o leng ke nu nga’na boo yaa o Ƥeenqe no kiin oxe a xontooxkaa a ndeer no xon we.»

¹⁰ Daalbe waa a laamtaan ee: «Xar taxu boog jaajangin we no kebil ke Moyiis a layaa yee Eliya a wara o eet o gar?»

¹¹ A doona a den ee: «Ndigil oo de. Eliya a wara o gar, ndax ta jagandatin fop.

¹² Kaa koy mexe layaa nuun ee Eliya a gara boo a ƴut. Wiin we anddiran, soo a mbi’in naa felna a den. Neene a ñagadilitkaa o Ƥeenqe no kiin oxe itam.»

¹³ Maaga, daalbe we a and’ata yee Saŋ o Paabatiise xe a ne’oogu.

Yeesu a wodanda o njaaƈ onqaa jini a damna

¹⁴ Yaa Yeesu fo daalbe daduk waa a mbadiidna paam faan maak laa, o koor a gara, a gooknoox mbaambir Yeesu, a layin ee:

¹⁵ «O Yaal oxe, yirmi o ƥees onqe o mbeƭfeƭin a damna, too ta ɗomeel lool. Leek-leek, kaa yenaa kam fiɗel mbaat kam foofi.

¹⁶ Ɓisiid’aanum daalbe we wo, ndaa mbaag’iran o mbaadin.»

¹⁷ Yeesu a doonaan ee: «Xeet fa ƥoowu too a gimaƭar! Kaam refkaa fa nuun boo a mban? Kaam ee kaam gadooxkaa a nuun boo a mban? Ƥisiidaamoo o ten meeke!»

¹⁸ Yeesu a dalfooxa o ŋal jini faa, boo ta sutoox. Na waxtu faaga sax sax o ndeɓandoong onqaa a wodu.

¹⁹ Maaga, daalbe waa a matiida a Yeesu, soo a layin ee: «Xar taxu i mbaag’ee o ndax jini feene?»

²⁰ Yeesu a laya a den ee: «Ne nu ñakna o ngim taxu. No ndigil, mexe layaa a nuun ee: Nu njegangaa o ngim onqaa fodna nen o xonq seneew, xan nu lay o joong olene yee: ‹Inooxi mene›, too xan a inoox meen. Tus xoxkee a nuun. [

²¹ Kaa koy, jini fa nandu neene a qeƭ fo koor soom mbaagu tax ta sutoox.]»

Yeesu a dakooxa o yegnit fa nqon um fo a qontax um

²² Yaa daalbe we a mbokatoorna Galile, Yeesu a laya a den ee: «O Ƥeenqe no kiin oxe a wara o ɓoxotel a ndeer xa ƥay axe no wiin we.

²³ Xan a mbarin, ndaa no ñaal ndadkandeer naa xan a xontoox.» Yaa daalbe waa a nanna kaaga, a naqadilooxa lool.

Yeesu a rabda a bateer ale no Mbind Roog ne

²⁴ Yaa da mbadiidna Kapernawum, we ndabdinooxoogna a bateer ale no Mbind Roog ne a ngara, a nqoy a Piyeer, too a laamtin ee: «Ndax kaa o caajangin nuun watooxkee?»

²⁵ Piyeer a doonaan ee: «Aha kañ!» Yaa ta xaadaa mbind naa, Yeesu a xetooxaan, soo a layin ee: «Ndi Simoŋ, nam tige a nandong? Ndax maad we na adna fee, xa ƥiy den a laacaa a bateer, ndi lakas we soom a laacan?»

²⁶ Piyeer a doonaan ee: «Lakas we.» Maaga, Yeesu a layaan ee: «Yaaga boog xa ƥiy den mbogee.

²⁷ Kaa koy ndax njegkee kaa da layaa, reti no maag olaa. Deɓi o jaar, too sut liƥ ne o eetkaa o dam. Yaƥatneen, too xan o ga o xanjar. Jangeen cooxin a den, ta ref ndabid in, mi fa wo.»