Mace 15 - NQAARIIT NE ROOG

Farisiya we fo o mbaax onqe

¹ Farisiya waa fo jaajangin waa no kebil kaa Moyiis a inoortiida Yeerusaleem, a ngar maa Yeesu too a layin ee:

² «Xar taxu daalbe of naangee o mbi’aa ke o mbaax onqe no maak we a layna, yaam njapkee yaa da mbugna o ñaam?»

³ Yeesu a doona a den ee: «Nuun itam, xar taxu nu naangee o mbi’aa ke kebil ke Roog a layna yaam o mbaax onqe nuun?

⁴ Roog kaa lay ee: ‹Niwi a faap of fa ya of›, a lay itam ee: ‹Oxuu salooxna a faap um mbaat a ya um, kaa warel o war.›

⁵ Nuun o mat, kaa nu layaa yee: ‹Boo o kiin a layna a faap um mbaat a ya um ee: Ke war’oonga o dimle’it, sadaxaanum a Roog,

⁶ yaaga soxla’katee o niw a faap um mbaat a ya um.› Neene nu ñuftaa fa lay fee Roog yaam o mbaax onqe nuun.

⁷ Nuun soo ndef yememaar! Esayi a lay’a ndigil ye ta jo’tanna a Roog no kaa farna na nuun ee:

⁸ ‹Xeet fene xa ton den soom a niwtaxam, ndaa a qeeñ den kaa ngoƭaam.

⁹ Ne da ndeeftaxam jegee o njiriiñ, yaam kaa njangnaa kebil kaa ngatna no wiin we.› »

Ke na roɗgandaa o kiin

¹⁰ Yeesu a xoya wiin waa, a lay a den ee: «Nan-gilooxaamoo, too and kene!

¹¹ Refee yee ke na rokaa no don na roɗgandaa o kiin, ndaa ke na sutooraa teen na roɗgandan.»

¹² Maaga, daalbe we ten a matiidaan, too a layin ee: «Ndax andaa yee ke layoona a panq oo no Farisiya we?»

¹³ A doona a den ee: «Ndaxar nuu Faap es fee na asamaan a jimbeerna, xan a fuurel.

¹⁴ Nqaƴyo a den, fuul waa na ƭoxaa fuul gend den a ndefu. O puul a ɗoxangaa o puul o kend um koy, den ɗik fop xan a njimboox kam a kamb.»

¹⁵ Piyeer a doona taaga yee: «Tektani a in a naxax aleene!»

¹⁶ Yeesu a doonaan ee: «Nuun itam, ndax kaa nu ndefkahinaa no ñak-o-and?

¹⁷ Ndax kaa nu andee yee ke na rokaa no don fop, kam o fud ole a suuraa, too xan a sutooxel?

¹⁸ Ke na sutooraa no don koy, no xeeñ a inooraa, too keene na roɗgandaa o kiin.

¹⁹ Yaam a qalaat a paaxeer ake fo barir ke fo ceeq ke fo pesanir ke fo kuuƭ ke fo seede paaxeer ke fo a ben ake fop, no xeeñ a inooraa.

²⁰ Keene koy refu ke na roɗgandaa o kiin, ndaa ñaam too japiro, kaaga naagee o roɗgandaa o kiin.»

O tew o kenar a gima na Yeesu

²¹ Yeesu a inoorta maaga, soo a ret no lanq kaa Tiir fa Sidoŋ.

²² O tew o Kaakanaan oxaa gen’ina no jegel olaaga a gara me Yeesu, a layin ee: «O Yaal oxe, o Ndaan Dawid, yirmaam! Kaa jeg o ƥees o ndew onqaa jini a xijilna lool.»

²³ Yeesu doon’iran ɗelem leng sax. Daalbe we ten a matiida, a nqeɗooxin ee: «Nomteen, yaam kaa reefan a in, a falalooxaa.»

²⁴ Yeesu a doona yee: «Lakas taxee um luliidel, a refangee paal mo’u ke Isra’el.»

²⁵ O tew oxe a gara, a gooknoox mbaambir Yeesu, a layin ee: «O Yaal oxe, ƴufgaam!»

²⁶ A doonaan ee: «O kiin waree o jang ñaamel ke na xa teɓandoong axe, soo a cooxin xa kurik axe.»

²⁷ O tew oxe a doonaan ee: «O Yaal oxe, ndigil layo, ndaa xa kurik axe kaa ñaamaa ke na samtaa no roon no yaal den.»

²⁸ Maaga, Yeesu a layaan ee: «Tew oxe, o ngim of a magna! Fat o fi’antel o ten ne bugtoona.» Na waxtu faaga sax sax o ƥeem a woda.

Yeesu a wodanda wiin mayu

²⁹ Yeesu a inooxa maaga, soo a joon o Maag olaa Galile. A ŋaaya took o joong olaa, soo a moof.

³⁰ Wiin mayu a ngara paam um, a ƥisiid waa nqarna, waa mbuulna, waa ƥoofna, waa muumna fo jiru lakas mayu. A mbondna a den na caf Yeesu, too a wodanda a den.

³¹ Wiin waa fop a nga’a muum we a layaa, ɓoof we a mbod, fuul we a nga’aa. Keene a bet’a a den, too a simatooga a Roog fee Isra’el.

Yeesu a ñoowdanda wiin cuni nahik

³² Maaga, Yeesu a xoya daalbe um, a lay a den ee: «Wiin wene kaa yuɗaam lool, yaam ñaal tadik key kaa da ndefna paam es, too njegatee tus kaa da ñaamna. Bugiim o nomit a den fo nqeex, yaam ndik da ñak doole na ƭat ale.»

³³ Daalbe waa a ndoonaan ee: «Nam i mbaagu o njegit kam a koƥ-a-ƥor alene puuru kaa ngiñna wiin wene fop?»

³⁴ Yeesu a laamta a den ee: «Puuru podnum nu njegu?» A ndoonaan ee: «I njega puuru ɓetuu ƭik fo fo liƥ fo leng-leng.»

³⁵ Maaga, Yeesu a hebla wiin waa fop da moof a lanq.

³⁶ A janga puuru ɓetuu ƭik kaa fo liƥ kaa, soo a gidim a Roog. Cinj kaaga, a xusta a den, soo a cooxin daalbe we ndax da lasin wiin waa.

³⁷ Fop a ñaama boo a ngiñ, too yoq kaa da nqaaditna a reeƭa a cenjel ɓetaa ƭaq a mayu muut.

³⁸ We ñaam’ina fop a ndeeƭa wiin cuni nahik, too rew we fo xa teɓandoong axe limtaand.

³⁹ Yaa Yeesu a nomitna wiin waa, a roka no suk, soo a ret no jegel olaa Magadaan.