Mace 14 - NQAARIIT NE ROOG

Fa nqon fee Saŋ o Paabatiise xe

¹ Na pe akaaga, yaa Herood fee maadooxoogna no jegel olaa Galile a nanna wiin we a laytaa a Yeesu,

² a laya dag um ee: «Saŋ o Paabatiise xe yoo. Kaa xontoox a ndeer no xon we, ten taxu ta fi’aa a pi katil.»

³ Herood fa xoox um kaa damnoor’u a Saŋ o Paabatiise xe, soo a jengin, a ɓekin kaso yaam Herojas, o tew Filip fee o ndeɓ Herood,

⁴ yaam ne Saŋ a layoogna a Herood ee: «Warino o dolin!»

⁵ Herood a bug’a o warnoor a Saŋ, ndaa a saɗar’a wiin mayu we, yaam kaa mbi’’u a Saŋ o tuleer.

⁶ Kaa koy, yaa da ndoofandaa bes faa no rimel olaa Herood, o ƥiy o ndew onqe Herojas a feca ndeer o lang olaa, too a fel’a a Herood lool.

⁷ A tax’a ta regin fo a taaƥ ee xan a cooxin kuu ta xeɗuuna.

⁸ Took o as ya um a doona a Herood ee: «Ɓisiidaam mene xoox le Saŋ o Paabatiise xe no roon.»

⁹ O maad oxaa a yogorlooxa lool, ndaa yaam a taaƥ ale ta daaɓoox’ina fo genar we, a laya yee ta cooxel o ten.

¹⁰ A lulta na kaso faa ndax xoox laa Saŋ o Paabatiise xe a ɗegel.

¹¹ Xoox laa a ɓisiide no roon, soo a cooxel o toog oxaa. Ten o mat a ɓisaan a ya um.

¹² Daalbe waa Saŋ a ngara a njang o fimb olaa, soo a ngaskin. A ndeta a eegin a Yeesu.

Yeesu a mayƭanda puuru

¹³ Yaa Yeesu a nanuuna, a inoora maaga fo suk, soo a riƈatoox boo no mbiñ o mbootu. Yaa wiin waa a nanuuna, a sutoora no teeru kaa, a ndeefanin fo xa caf den.

¹⁴ Yaa Yeesu a sutooxna suk naa, a ga’a wiin mayu. A yuɗaan, too a wodanda wiin jiru waa fop.

¹⁵ Yaa da moofna boo njeeƈ ne a yaarkaa, daalbe waa ten a matiidaan, a layin ee: «O mbiñ onqene a woota lool, too tige a yaara. Nomti caambuur ke, ndax da mbaag o nqaad kam caate ke, a njikik ñaamel.»

¹⁶ Took kaaga, Yeesu a doona a den ee: «Ndeyee o nqaad. Cooxyo a den da ñaam nuun fa qoox nuun!»

¹⁷ Daalbe waa a ndoonaan ee: «I njegee mene tus a refangeerna puuru ƥetik fo liƥ ƭik.»

¹⁸ Yeesu a laya a den ee: «Ƥisiidaamoo a den!»

¹⁹ Yeesu a hebla wiin waa fop da moof no suuƴin le. A janga puuru ƥetik kaa fo liƥ ƭik kaa, a daxaaƴoox na asamaan, a gidim a Roog. Yaa ta xeɗna boo a ƴut, a xusta puuru kaa, a cooxin daalbe waa, ndax da lasin wiin waa.

²⁰ Fop a ñaama boo a ngiñ, too daalbe we a nqaadta a ƭamba xarɓaxay fo a ƭamba ƭak akaa mayna muut fo xa ƭeg puuru.

²¹ We ñaam’ina fop a ndeeƭa cuni ƥetik, too rew we fo xa teɓandoong axe limtaand.

Yeesu a ñaaƴa took foofi

²² Cinj kaaga, Yeesu a hebla daalbe waa da ndok no suk, a adookin kaltaa o maag olaa boo ta helko fo nomtaa wiin waa.

²³ Yaa ta nomitna wiin waa, a ŋaaya no joong olaa ten doŋ ndax ta xeɗ. Yaa ta yaarna, a woot’a maaga.

²⁴ Suk naa a fadik’a ndeer o maag olaa, too waag’atee o ƴuf a paax, yaam kaa faambir’u fo a yag-ee-yag ake fo nqeñ ne.

²⁵ Farna fo a siik-a-peraand, Yeesu a daaba a den, a ñaaƴaa took foofi laa no maag ole.

²⁶ Yaa daalbe waa a nga’uuna, a ndiid’a lool, too a lay ee: «O qon-o-paaf oo!» Kam diid laa den itam, a mbaɗooxa.

²⁷ Ndak fo ndak, Yeesu a laya a den ee: «Saƭakinooxyo! Ba nu ndiid! Mi yoo!»

²⁸ Maaga, Piyeer a doonaan ee: «O Yaal oxe, a refangaa yee wo yoo, xoyaam um xetiid fa wo took foofi le!»

²⁹ Yeesu a layin ee: «Gari!» Piyeer a sutooxa suk naa, soo a ret a xetik fo ten took foofi laa.

³⁰ Kaa koy, yaa ta ga’na yee nqeñ ne a jega doole, a diida. Yaa foofi laa a buguuna o muur, a wuuqa too a lay ee: «O Yaal oxe, muclaam!»

³¹ Ndak fo ndak, Yeesu a letna o ɓay um, a damin, too a layin ee: «Wo soo neew o ngim! Xar taxu o gimaƭar?»

³² Yaa da ndokna no suk naa, nqeñ naa a dalfooxa o riim.

³³ Waa ndeeƭna kam suk naa a ngara, a ngooknoox mbaambir Yeesu, a layin ee: «O Ƥeenqe Roog refo ndigil!»

Yeesu a wodanda jiru mayu

³⁴ Yaa da nqaañna o maag olaa boo a sutoox, a ndokiida no saax laa Genesaret.

³⁵ Yaa wiin waa maaga a andidna a Yeesu, a lulta no caate kaa matna maaga fop, ndax ta ɓisiidel waa njirna.

³⁶ A nqeɗoogaan ndax da mbaag o nduq o noflax ndoki um soom. We nduqooguuna fop a mbodooga.