Mace 13 - NQAARIIT NE ROOG

A naxax ale no tuuduuf oxe

¹ Na bes faaga, Yeesu a sutoora no mbind naa ta reeƭna, soo a ret a moof na ƥeeraamb alaa no Maag olaa Galile.

² Yaa wiin mayu a mbokatoorna paam um, a roka no suk, a moof. Wiin waa fop na ƥeeraamb alaa a ngeenoox’u.

³ A naxooxa a den tig mayu too a lay ee: «O tuuduuf sutoox’u a duufik.

⁴ Ye ta sulaa, a seek a leng no ax ke a sama kam a ƭat ale, soo tiiƭ ke a ngar a ñaamin.

⁵ A seek a lakas a yena maa fi’na ƭeŋkeleer too mayee mbuuƴ. A looƴ’a no ñofu, yaam ne mbuuƴ ne a mayeerna.

⁶ Yaa njeeƈ naa a sumna, a leeƥa too a weera, yaam jeg’ee a paƴ.

⁷ A seek a lakas a sama maa jegna kiƈ. Kiƈ ke a maaka too a ngoñaan.

⁸ A seek a palakaand ale a sama no lanq paax ke. A sulta, too mbep leng a rima pep teemeed, mbep lakas a rim pep qarɓeen ɓetuu fa leng, soo lakas a rim pep qarɓeen tadik.

⁹ Oxuu jegna nof fat a nan-giloox!»

Ke taxna Yeesu a laytaa a naxax

¹⁰ Cinj kaaga, daalbe waa a matiida a Yeesu, a laamtin ee: «Xar taxu o laytaa fa den a naxax?»

¹¹ Yeesu a doona a den ee: «Kaa nu ci’el o and kunpa ke no Maat ne na asamaan, ndaa den o mat ci’aand o ten.

¹² Oxe jegna xan a ci’el, too xan a mayiƭ. Oxe jegeerna o mat, onqe ta jegna sax xan a jaɓel.

¹³ Kaam laytaa fa den a naxax, yaam kaa ƭeetaa, too yaaga fop oo nga’ee, a nanaa itam, too yaaga fop oo nanee too andee.

¹⁴ Na den, fa lay feeke na Esayi a fadnooru: ‹Nu mbug oo nanit nof nuun, ndaa nu andkee tus, ƭeetit a kid nuun, ndaa nu nga’kee dara.

¹⁵ A qeeñ ake na xeet feeke kaa ndir. Kaa sux nof den, a mup a kid den, yaam ndik da nga’it a kid den mbaat da nanit nof den mbaat da andit a qeeñ den, soo a saktoox me mi, um wodand a den.›

¹⁶ Nuun koy, nu ƭaaya, yaam a kid nuun owe nga’aa, nof nuun a nanaa.

¹⁷ No ndigil, mexe layaa a nuun ee: Duleer Roog fo wiin jofu mayu a mbug’a o nga ke nu nga’aa too nga’iran, a mbug o nan ke nu nanaa too naniran.»

Yeesu a tekta a naxax ale no tuuduuf oxe

¹⁸ «Nuun boog, nan-gilooxyo ke a naxax ale no tuuduuf oxe a tekitna.

¹⁹ O kiin a nanangaa fa lay fee no Maat ne, too andee ke ta tekitna, o paaxeer oxe kaa garaa soo a watin ke duufeena kam xeeñ um. O kiin oxeene nandu fo ax ke yenna kam a ƭat ale.

²⁰ Ax ke samna no ƭeŋkeleer ne tektu o kiin oxe andoona yee kaa nan fa lay fee, a jaɓin ndak fo ndak fo o ɗaay.

²¹ Kaa koy, jegee a paƴ no ten sax sax, too jegee ndamlooxand itam. Neene, boo andoona yee o njaaxɗataan mbaat ñagadil a ngara yaam fa lay fee Roog, a naagaan o dalfooxaa o fes a cinj.

²² Ax ke nduufeena kam kiƈ ke ndefu oxe na nanaa fa lay fee Roog. Kaa koy, a qalaat ake na jamaane fee fo ne halal adna a ƴiƴtaa a den a naanga o ngoñaa fa lay fee Roog boo waagkee o rim.

²³ Ax ke nduufeena kam lanq paax ke tektu oxe na nanaa fa lay fee Roog, too a andin. A naanga o sultaa xa yaƥ, too mbep leng xan a rim teemeed, lakas qarɓeen ɓetuu fa leng, soo lakas a rim qarɓeen tadik.»

A naxax ale no puulaand ke

²⁴ Yeesu a dakooxa o coox a den a naxax a lakas too a lay a den ee: «Maat ne na asamaan kaa nand fo o kiin oxaa duufna ax paax kam o qol um,

²⁵ soo ye wiin we a mbondooxna, o pañ um a gar, a duuf puulaand kam a yang alaa soo a ret.

²⁶ Yaa ɓasi faa a saxna boo a sulit, puulaand kaa a mbeeña itam.

²⁷ Surga kaa a ngara paam o yaal mbind naa, a lay ee: ‹Yaal mbind, ndax refee yee ax paax duufo kam a yang alaa wo? Mam puulaand kaa a sutooru boog?›

²⁸ A doona a den ee: ‹O pañ fi’un.› Surga kaa a ndoonaan ee: ‹Pañtu i ndet ƈasik a den?›

²⁹ A doona a den ee: ‹Ha’aa, yaam ndik nu naangangaa o ƈasaa a den, nu ƈas ƥasi paax ke itam.

³⁰ Nqaƴyo a den a ndeer ƥasi paax ke boo na saxad alaa. A koom, xam lay saasaxad waa yee: Eetyo ƈas puulaand ke too ngum a den toq ndax da ndoxel. Nu ƈutangaa koy, nu sog o ngeeranaam ɓasi fee.› »

A naxax ale no xonq seneew ole

³¹ Yeesu a dakooxa o coox a den a naxax a lakas, a lay a den ee: «Maat ne na asamaan kaa nand fo o xonq seneew, too o kiin a jangin, a duufin kam o qol um.

³² O xonq seneew moƴu neew no tuufe-duufe ke fop, ndaa boo ta saxna, a naaga o hupaa a den. Kaa retaa boo a fi ndaxar, soo tiiƭ ke na asamaan a ndutaa kam a naaq um.»

A naxax ale no poɗaxnir ke

³³ Yeesu a dakooxa o lay a den a naxax a lakas alene: «Maat ne na asamaan kaa nand fo poɗaxnir kaa o tew a jangna, a jaxasin fo a saxal a tadak mbiɗel. Naaga, fop a dalfooxa o foɗax.»

Xar taxu Yeesu a laytaa a naxax?

³⁴ Yeesu a laya wiin waa keene fop na naxax, too laytoogee fa den lakas a refangeerna a naxax.

³⁵ Naaga, ke lay’eena a reefandel no tuleer oxe a fadnoortu: «Xam lay na naxax, too xam lambin ke ɗasneena yaa adna a godeena ɓaax boo xaye.»

Yeesu a tekta a naxax ale no puulaand ke

³⁶ Cinj kaaga, Yeesu a nomta wiin waa, soo a rok no mbind. Daalbe um a matiidaan too a layin ee: «Tektani a in a naxax ale no puulaand ke na yang ale.»

³⁷ Maaga a doona a den ee: «Oxe duufna ax paax ke refu o Ƥeenqe no kiin oxe.

³⁸ A yang ale refu adna fee, ax paax ke a ndef xa ƥiy axe no Maat ne, soo puulaand ke a ndef xa ƥiy no paaxeer oxe.

³⁹ O pañ oxe duufuuna refu o ƈiƴ oxe, a saxad ale refu paangandoong adna. Saasaxad we koy ndefu malaaka ke.

⁴⁰ Ne puulaand ke a ƈasitkeel, a ndeɓel kam fiɗel, naaga a refitkaa no paangandoong naa itam.

⁴¹ O Ƥeenqe no kiin oxe xan a luliid malaaka um, ndax da ƈas kam Maat um we na tolofnooraa wiin we fo we na mbi’aa cofaƭaru.

⁴² Xan malaaka ke a ndeɓ a den kam fiɗel fa saasu, maa xa lool fo ƈaxrand a ñiiñ a ndefkaa.

⁴³ A koom kam Maat naa Roog Faap den, xan jofu we a meleƈit nen njeeƈ ne. Oxuu jegna nof, fat a nan-giloox!»

A naxax ale na halal fa ƭasne fee

⁴⁴ «Maat ne na asamaan a nandahina fa halal faa ɗasneena kam o qol. A jega o kiin oxaa ga’uuna, soo a ɗasnatindin. Ten taxu a jeg’a o ɗaay o maak boo a ret a jikoox ke ta jegna fop, soo a nomtooxiid, a jik o qol olaaga.»

A naxax ale no feme le

⁴⁵ «Maat ne na asamaan a nandahina itam fo o feme mosu laa o ciijikax a waaƭaa.

⁴⁶ A ga’a o feme leng kut olaa maginna njigand lool. Ten taxu, a reta a jikoox ke ta jegna fop, soo a gar a jikin.»

A naxax ale no mbaal ne

⁴⁷ «Maat ne na asamaan a waagahine o nandandit mbaal naa deɓeena kam o maag, soo a dam liƥ pogreer mayu.

⁴⁸ Yaa ta mayna, faafaal waa a qicaan na ƥeeraamb alaa. A moofa a njil paax ke, a ƥek a den na ƭamba, paaxeer ke, da ndeɓ a den.

⁴⁹ Naaga a refitkaa itam no paangandoong adna. Xan malaaka ke a ngar, a nqaaj soxodu we a ndeer jofu we.

⁵⁰ Xan a ndeɓ soxodu we kam fiɗel fa saasu, maa xa lool fo ƈaxrand a ñiiñ a ndefkaa.»

Qas fo kiid

⁵¹ «Ndax nu nana keene a paax?» A ndoonaan ee: «Ii.»

⁵² A dakooxa o lay a den ee: «Ten taxu boog, o caajangin no kebil ke Moyiis, a refangaa o taalbe no Maat ne na asamaan, kaa nand fo o yaal mbind oxaa na suttaa no ngeekand um qas fo kiid.»

Yeesu kam teeru faa Nasaret

⁵³ Yaa Yeesu a ƴutna a naxax akeene, a inooxa maaga.

⁵⁴ Yaa ta garna no mbaafaap um, a jangnooga kam pind a qeƭ kaa den boo waa nanuuna fop a njaaxiɗ, a laamtataa yee: «Ndi mam a daawtu o and oleene fo a pi katil akeene?

⁵⁵ Ndax kaa refee o ƥeenqe no taadaaƴ oxe? Andum refee o ƥeenqe Mari, too Saak fa Yoseef fa Simoŋ fa Yudaa a ndef xa teɓ um?

⁵⁶ Mee ndax sax jigeen um fop fa in a ngenaa? Nam a waagtu kene fop boog?»

⁵⁷ Kaaga a yaqan’a a den da ngim no ten. Yeesu a laya a den itam ee: «O tuleer fañaand sen a refangeerna no mbaafaap um fo no mbind um.»

⁵⁸ Fi’ee maaga a pi katil a mayu yaam ngimaƭar naa den.