Mace 12 - NQAARIIT NE ROOG

Yeesu na bes fee na ñootnax ale

¹ Na pe akaaga, Yeesu a xaaña kam xa qol bele, a jopir bes fee na ñootnax ale. Daalbe we ten a nqeex’e, too a ƥola teen kaa da ƈaxna.

² Yaa Farisiya waa a nga’na kaaga, a laya yee: «Daalbe of owe mbi’aa ke a ƭat ale in a xañtaa na bes fee na ñootnax ale.»

³ Took kaaga, Yeesu a doona a den ee: «Ndax kaa nu njangee kam a Pind a Tedu ke ke Dawid fo yoon um a mbi’’ina a soƥ da nqeexel?

⁴ Ndax kaa nu njangee ne ta rokit’ina no Mbind Roog naa, soo a ñaam na xa kaf puuru xaa ƥoxot’eena a Roog, too war’iran o ñaam, ten oo yoon um oo? Yaag oo toox de, saasadax we soom kebil ke a ci’’u da ñaam xa kaf puuru xeene.

⁵ Ndi boog, kaa nu njangee kam kebil ke Moyiis ee na bes fee na ñootnax ale, saasadax we a naanga o mbi’aa kam Mbind Roog ne kaa xañteena na bes fee na ñootnax ale, too refee tooñ na den?

⁶ Mexe layaa nuun koy ee oxe refna mene hupu Mbind Roog ne.

⁷ Boo nu and’ina ke fa lay fene a tekitna: ‹Yirmande moƴanaxam sadax›, yaaga nu mbugkoogee o ƥanjaa we tooñeerna.

⁸ O Ƥeenqe no kiin oxe refu oxe hame’na bes fee na ñootnax ale.»

O yaal o ɓay o xaru le

⁹ Yaa Yeesu a inoorna maaga, a roka kam mbind a qeƭ naa den,

¹⁰ too o koor oxaa o ɓay um a xarna a reeƭa maaga. Wiin waa a laamta a Yeesu yee: «Ndax a ƭat ale in a ci’ta o kiin a wodandaa na bes fee na ñootnax ale?» Kaa laamit’un kaaga, ndax da mbaagin o njamb.

¹¹ Yeesu a doona a den ee: «An o kiin na nuun oxe na jegkaa mbaal leng naa yenna no gamb, soo ta fañin o sut ee yaam bes fee na ñootnax ale?

¹² O kiin hupu mbaal fuuf toox de! Ten taxu a ƭat ale in a ci’ta o kiin a fi paax na bes fee na ñootnax ale.»

¹³ Cinj kaaga, Yeesu a laya o koor oxaa yee: «Letni o ɓay of!» A letnaan, too o ɓay ole a woda boo ceŋ nen o lakas olaa.

¹⁴ Farisiya waa a sutooxa a ngukrik ndax da mbaagin o saŋik.

O tag oxe Roog a jilna

¹⁵ Yaa Yeesu a andna ke da mbexeyaa, a riƈatooxa maaga. Wiin mayu a ndeefanaan too a wodanda jiru waa fop.

¹⁶ Yeesu a maƭooxa a den a paax ndax yegnitkiran.

¹⁷ Kaaga a war’a o xew, ndax ke Roog a lay’ina a reefandin no tuleer oxaa ne’eena Esayi a fadnoox:

¹⁸ «O tag es oxe jiluuma oxey! O ten fexum, too no ten o laaw es a felakinoortu. Xam ɓek Yiif es no ten, ta yegin qeet ke o cofel.

¹⁹ Xasirkaand, falalooxkee, too o leng nankee o ñuxur um kam ped ke.

²⁰ Patkee o siind ole ɓolooxna, too ñufkee o jam ole na ƥoñaa boo yaa ta dalinkaa o cofel ole Roog.

²¹ Qeet ke fop xan a ndoon yaakaar den no gon um.»

Yeesu fa Belsebul

²² Maaga, Yeesu a ɓisiide o puul oxaa muumna, too cini a ndamin. A wodandaan boo o muum oxe a layaa, a ga’aa.

²³ Wiin waa fop a njaaxɗa, too a lay ee: «Ndax oxene refee o Ndaan Dawid?»

²⁴ Yaa Farisiya waa a nanna kaaga, a layra yee: «Na pexey Belsebul fee refna o maad oxe no cini ke a raxtaa cini ke.»

²⁵ Yeesu a anda a qalaat den, too a lay a den ee: «Boo we mbogna maat a nqaajoorna a ndeer den, maat naaga waagee o miñ. Boo we mbogna teeru mbaat mbind a nqaajoorna a ndeer den, xan a ngef tuƈ, yaam mbaagkee o ngeenoox.

²⁶ Yaaga boog, boo Saytaane a raxaa a xoox um, nam maat um a waagu miñit?

²⁷ Mi koy, um naagangaa o raxaa cini ke na pexey Belsebul, yaaga xa ƥiy nuun na pexey an a ndaxtan? Ten taxu den fa qoox den na ndefkaa haahate nuun.

²⁸ Kaa koy, a refangaa yee na pexey Yiif le Roog um raxtaa cini ke, yaaga Maat ne Roog a fadiida me nuun.

²⁹ Nam o kiin a waagu o rokit no mbind no kiin o cegu doole, soo a jaɓ halal um, too humiran boo a ƴut? Naaga soom a waagu o gefit mbind um.

³⁰ Oxuu fareerna fa mi kaa fañaam, too oxuu fokateerna fa mi kaa pictaa.

³¹ Ten taxu mexe layaa a nuun ee: Bakaad mbaat wen luu refna a waaga o waasanel o kiin, ndaa oxuu wenna Yiif le Roog waagaand o waasan o ten.

³² Oxuu wenna o Ƥeenqe no kiin oxe a waage o waasan. Kaa koy, oxuu wenna Yiif Tedu le, waasankaand o ten na adna boo na alaaxira.»

Ndaxar no rim ole a andditeel

³³ «Nu mbugangaa o njeg xa tim xa paax, nduufyo ndaxar mbaax! Nu njegangaa ndaxar mbaaxeer, xan nu njeg xa tim xa paaxeer. Ndaxar no rim ole a andditeel.

³⁴ Nuun soo ndef fo nqisiil! Nam nu mbaagu o layit tig paax too soxod boo ƈaxooxaa? O don ke refna no xeeñ soom a layaa.

³⁵ O kiin o paax, tig paax a suttaa no ngeekand um mbaax. O kiin o paaxeer koy, tig paaxeer a suttaa no ngeekand um mbaaxeer.

³⁶ Mexe layaa a nuun ee: Na bes faa no nqel maak naa, xan wiin we a njangtoox a Roog fa lay fa njegee xoox fuu da mosna o lay.

³⁷ Oxuu refna, fa lay um a jofanditkeel mbaat ta xawtel o ten.»

O anddiloor ole Yoona

³⁸ Maaga, leng-leng no jaajangin waa no kebil kaa Moyiis fo Farisiya waa a layaan ee: «O Caajangin oxe, kaa i mbug o fi’an a in o anddiloor.»

³⁹ Yeesu a doona a den ee: «Xeet fa soxodu fa ngore’aƭaru fene fesna a Roog a cinj, oxe xeɗaa o anddiloor. Kaa koy, Roog ci’kee a den o anddiloor o lakas olaa refeerna ole no tuleer oxaa ne’eena Yoona.

⁴⁰ Ne Yoona a refit’ina no fud liƥ maak boo a jeg ñaal tadik fo xa yeng den, neene o Ƥeenqe no kiin oxe a refitkaa kam lanq ke boo a jeg ñaal tadik fo xa yeng den.

⁴¹ Na bes faa no nqel naa Roog, xan Niininiif we a inoox mbaambir no xeet fene, a soq a den, yaam a mbes’a pakaad den a cinj ye Yoona a waare’na a den. Oxe na layaa fa nuun koy hupu a Yoona.

⁴² Xan o maad o tew oxaa inoor’ina no ɓemb-roog o ñamaak a inoox na bes faa no nqel naa Roog, a soq xeet fene, yaam a inoor’a no cat adna ndax ta nan-gilook o and o maak olaa Salomo. Oxe na layaa fa nuun koy hupu a Salomo.»

A kat ale na jini fee

⁴³ «Boo jini a xaƴna o kiin, a naaga o retaa na koƥ a beeru, a waaƭaa maa ta ñootnooxna. A ga’angee,

⁴⁴ xan a lay ee: ‹Xam nomtoox no mbind es naa sutooruuma.› A fadiidangaa koy, a soƥ o leng refee teen, a leelel boo a xool, soo a mosandel,

⁴⁵ a naaga o retaa, a xot cini ɓetuu ƭik kaa moƴuuna o soxod, da ndet a ndal kam mbind naa. Palakaand ke ndalatna o kiin oxeene a naanga o moƴaa o faaxaƭar ke eet’uuna o dal. Neene a refitkaa itam no wiin soxodu weene.»

Ya Yeesu fo xa teɓ axe Yeesu

⁴⁶ Ye Yeesu a maadna o layaa fo wiin waa, ya um fo xa teɓ um a ngara, a ngeenoox tafil faa ee yaam kaa mbug’u nga’ir fo ten.

⁴⁷ O kiin a laya a Yeesu yee: «Reti jaaɓik! Ya of fo xa teɓ of owe cungang tafil, too kaa mbug o lay fa wo.»

⁴⁸ Kaa koy, Yeesu a doona oxaaga yee: «An refu ya es? Aniin ndefu xa teɓ es?»

⁴⁹ A jooxa daalbe we ten, too a lay ee: «Wene ndefu ya es fo xa teɓ es.

⁵⁰ Yaam oxuu na fi’aa ke Faap es fee na asamaan a bugna, o ndeɓ es o ngoor oo, o ndeɓ es o ndew oo, ya es oo.»