Mace 10 - NQAARIIT NE ROOG

Yeesu a jila apootar xarɓaxay fo apootar ɗik

¹ Yeesu a xoyna daalbe xarɓaxay fo daalbe ɗik waa ten, a ci a den sañ-sañ faa da mbaagna o ndaxit cini, a mbodandaa jir fo o ƭomel oluu refna.

² A kon ake no apootar xarɓaxay fo apootar ɗik we ndefu: Oxe eetna refu Simoŋ fee na lastiteel Piyeer, soo Andare fee o ndeɓ um a doonoox, cinj kaaga, Saak o ƥiy Sebede fa Saŋ fee o ndeɓ um.

³ A jega itam a Filip fa Bartelemi fa Tomaa fa Mace fee rabdinooxoogna juuti, fa Saak fee o ƥiy Alfe fa Tade fa

⁴ Simoŋ oxe na xoxtaa saax um, fa Yudaa o Iskariyot oxe na retkaa a ɓoxot a Yeesu.

Yeesu a lula xarɓaxay fo ɗik we

⁵ Weene ndefu xarɓaxay fo ɗik we Yeesu a lulna, too a as a den ee: «Ba nu nqot farna fo we ndefeerna Yaawuur, too ba nu ndok no teeru ke no Saasamari we.

⁶ Kaa koy, nqotyo farna fo paal mo’u ke na xeet fee Isra’el.

⁷ Muu nu ndetna, mbaare’yo yee Maat ne na asamaan a matiida.

⁸ Mbodandyo jiru we, nqontooxnoor xon we, nqooland we njegna a tik-a-maak, ndax cini ke. Kaa nu ci’el, ci’ityo boog!

⁹ Ba nu ƥisloox wurus mbaat xaaliis mbaat xa monjong kam ciba nuun

¹⁰ mbaat o fof mbaat sabadoor ƭik mbaat xa ñaaƭ mbaat o loq, yaam oxe na jalaa a wara o ñaamaa.

¹¹ Na teeru mbaat na saate fuu nu ndokna, laamityo ndax a jega oxaa jombeerna o genar a nuun. A jegangaa, fat nu ndal maa ten boo yaa a tet nuun a fadna.

¹² Boo nu ndokaa no mbind naa, fat nu salanin jam.

¹³ A sal nuun a jombangee mbind naaga, fat jam nuun a fudoox took um, ndaa a jombangaan, fat jam nuun a nomtooxiid na nuun.

¹⁴ A ngenarangee a nuun, nan-gilooxee fa lay nuun, fat nu sutoox mbind naaga mbaat teeru faaga. Yirifyo fo ut a caf nuun, ta ref seede took den.

¹⁵ No ndigil, mexe layaa a nuun ee: Na bes faa no nqel naa Roog, saax laa Sodoom fa Gomoor na moƴkaa o yooɓiɗ hate saax laaga.»

Ñagadil ke na ngaraa

¹⁶ «Mexe lulaa a nuun nen paal kam xa moon. Fat nu ƈiƴit nen pangool, too ƥuuɓit nen a nuukuur.

¹⁷ Mbootooxyo, yaam xan wiin we a ƥis a nuun mbind no maad, a nqaw a nuun xa cap kam pind a qeƭ kaa den.

¹⁸ Xan nu ƥisel mbaambir no gofornoor ke fo maad we yaam mi, ndax nu ndef seede na den fo no gimaƭaru we.

¹⁹ Kaa koy, boo nu ƥiseena no maad, ba nu nqalam ne nu layitkaa. Xan nu cooxel ke nu mbarna o lay na waxtu faaga sax sax.

²⁰ Refee yee nuun na laykaa, ndaa Yiif le Faap nuun fee refna na asamaan na laykaa na nuun.

²¹ Xan o kiin a warnoor o pog um ŋaƈit, faap a warnoor o ƥeem, xa ƥiy axe a inooxan we ndimna a den, a mbarnoor a den.

²² Xan fop a sib a nuun yaam gon es, ndaa oxuu saƭikna boo no muukandoong naa xan a muc.

²³ Boo nu ñagadileena na teeru, ƈufyo na fa lakas. No ndigil, mexe layaa a nuun ee: Nu nqetandkee teeru ke Isra’el fop, too o Ƥeenqe no kiin oxe garee.

²⁴ O taalbe hupee oxe na jangnan, too o paɗ hupee o yaal um.

²⁵ Yaaga koy, o taalbe xe a nandangaa fo o caajangin um, soo o paɗ oxe a nand fo o yaal um rek a deya. O yaal mbind oxe a xoyange Belsebul, nam ƥasil um a nqoykeel?»

Oxe wareena o fit

²⁶ «Ba nu mbit a den, yaam ke singeena fop xan a singtel soo ke ɗasneena fop a ñuqtel.

²⁷ Ke um layaa a nuun no niɓaan, layeenoo njoloor. Ke nu nde’eena, yegniteenoo no qel ke!

²⁸ Ba nu mbit we mbaagna o mbar cer, too mbaagee o mbar o laaw. Oxe jarna o fitel refu Roog fee waagna o saŋik cer fo o laaw kam fiɗel laa ñufkeerna.

²⁹ Ndax o kiin naagee o jikooraa xa ñere-ñere xa ƭaq o derem? Yaaga fop toox de, o leng na den sax waagee o yen a lanq, too felee a Roog Faap nuun.

³⁰ Wiil le na qoox ake nuun sax kaa limel.

³¹ Ba nu saɗarat boog, yaam nuun ngupu giiraand xa ñere-ñere o njiriiñ.»

Xañ mbaat lay ee andaa a Yeesu

³² «Oxuu layna mbaambir no wiin we yee a andaxam, xam lay mbaambir Faap es fee refna na asamaan itam ee andaanum.

³³ Kaa koy, oxuu layna mbaambir no wiin we yee andiraam too a andaam, xam lay mbaambir Faap es fee refna na asamaan itam ee andinum.»

Jam ndi laƥ?

³⁴ «Ba nu mboog ee jam ɓisiidum na adna fee. Ɓisiidiim jam, laƥ ɓisiidum.

³⁵ Kaam xaajiid o ƥiy o ngoor fa faap um, o ƥiy o ndew fa ya um. Kaam xaajiid itam o tew o tolooxiidu xe fo o seemir um o tew.

³⁶ Xan fañ no kiin a ndef wiin mbind um.

³⁷ Oxuu fexna a faap um mbaat a ya um kupu ke ta fexaxama, jombaanum. Oxuu fexna o ƥeem o ngoor mbaat o ƥeem o ndew kupu ke ta fexaxama, jombaanum.

³⁸ Oxuu jangeerna a kurwaa um, a reefanaam, jombaanum.

³⁹ Oxuu bugna gay o ñis um xan a ñakin, ndaa oxe na ñakkaa o ñis um yaam mi xan a daawin.»

Tabid ke

⁴⁰ «Oxuu genarna a nuun, mi a genaru, too genaraxama a genara oxe lulaxama itam.

⁴¹ Oxuu genarna o tuleer yaam ne ta jo’tanaa a Roog, xan a daaw ndabid no tuleer Roog. Oxuu genarna o cofu yaam o cofel um, xan a daaw ndabid no kiin o cofu.

⁴² Oxuu ci’na o leng na xa teɓandoong axene a tokol foofi fo ɓuuɓu yaam ne ta refna o taalbe es, no ndigil, mexe layaa a nuun ee: Ñakkee o daaw ndabid um.»