YEGIL MBAAX NE YEESU ne Lik a bindtuuna 9 - NQAARIIT NE ROOG

Yeesu a lula xarɓaxay fo ɗik we

¹ Yaa Yeesu a xoyna daalbe xarɓaxay fo daalbe ɗik waa ten, a cooxa a den katil fa sañ-sañ took cini ke, a coox a den da mbodandaa a cir ake.

² A lula a den da mbaare’ik fa lay fee no Maat ne Roog, too a mbodand we njirna.

³ Maaga, Yeesu a maƭooxa a den ee: «Ba nu ƥisloox dara yaa nu ndetaa, o loq mbaat o fof mbaat ñaamel mbaat xaaliis. Ba nu ƥisloox sabadoor ƭik itam.

⁴ Muu nu mbadna, moofyo no mbind naa nu nqurkeel. Ba nu supit mbind boo yaa nu inooxkaa maaga.

⁵ Wiin waa a ngenarangee a nuun, fat nu sutoox teeru faaga, yirif fo ut a caf nuun, ndax ta ref seede took den.»

⁶ A ndalfooxa o ndet, a ñaaƴaa ndeer saate fa saate, a yegnitaa Yegil mbaax ne, soo a mbodandaa jiru we muu refna.

Herood a jaaxɗa

⁷ Yaa Herood fee maadooxoogna no jegel olaa Galile a nanna wiin we a laytaa ke xew’ina fop, a jaaxiɗ’a, yaam a jega waa layoogna yee: «Saŋ o Paabatiise xe xontooxu.»

⁸ Lakas we a layaa yee: «O tuleer Eliya feeñu.» Weeke yee: «O leng no duleer we yaaga xontooxu.»

⁹ Kaa koy, Herood a doona yee: «Ɗegnooraam xoox le Saŋ. Yaaga boog, an refu o kiin oxe nanuuma ta fi’aa keene?» Maaga, a waaƭooga maa ta ga’itna a Yeesu.

Yeesu a mayƭanda puuru

¹⁰ Yaa apootar waa a nomtooxiidna, a mbetandooxa a Yeesu ke da mbi’’ina fop. A ɓisa a den no mbiñ o mbootu farna fa teeru faa ne’eena Betsayda.

¹¹ Yaa wiin waa a nanna kaaga, a ndeefanaan. Yaa Yeesu a ga’na a den, a jaɓ’a o moof fa den. A waare’ooga a den Maat ne Roog, a wodandaa we soxla’na o mbodandel.

¹² Yaa da moofna boo njeeƈ naa a yaarkaa, xarɓaxay fo ɗik waa a matiidaan, too a layin ee: «Nomti caambuur ke, da ndet kam caate ke matna mene, ndax da mbaaƭik maa da mbe’na fo kaa da ñaamna, yaam o mbiñ onqene i ndefna kaa woot.»

¹³ Took kaaga, Yeesu a laya a den ee: «Cooxyo a den da ñaam, nuun fa qoox nuun!» Kaa koy, daalbe we a ndoonaan ee: «I saqee mene tus a refangeerna puuru ƥetik fo liƥ ƭik. Andum i njikik kaa giñna wiin fod nene.»

¹⁴ Goor waa ndeeƭna maaga koy a mbad’a ngap cuni ƥetik. Yeesu a laya daalbe waa ten ee: «Moofinyo a den a qaaj a qaaj, a qaaj aluu refna wiin qarɓeen ƥetik.»

¹⁵ A mbi’a naaga, too a moofna a den, den fop.

¹⁶ Yeesu a janga puuru ƥetik kaa fo liƥ ƭik kaa, a daxaaƴoox na asamaan, a gidim a Roog. Yaa ta xeɗna boo a ƴut, a xusta puuru kaa, a cooxin daalbe waa, ndax da lasin wiin waa.

¹⁷ Fop a ñaama boo a ngiñ, too daalbe we a nqaadta a ƭamba xarɓaxay fo a ƭamba ƭak akaa mayna muut fo xa ƭeg puuru.

Piyeer a laya yee Yeesu refu Kiristaa fee

¹⁸ Bes, a jopir Yeesu a xeɗaa ten doŋ, too daalbe we ten a ndef maaga, a laamta a den ee: «An wiin we a layaa yee o ten refum?»

¹⁹ A ndoonaan ee: «Leng we kaa layaa yee Saŋ o Paabatiise xe, lakas we a layaa yee Eliya. A jega itam lakas waa na layaa yee o leng no duleer we yaaga xontooxu.»

²⁰ Yeesu a laamta a den ee: «Nuun o mat, an nu layu yee o ten refum?» Maaga, Piyeer a doonaan ee: «Wo refu Kiristaa fee, o Muumucil oxe Roog a regitna.»

²¹ Yeesu a maƭooxa a den ee baa layin o leng.

Yeesu a yegnita fa nqon um fo a qontax um

²² Yeesu a doona taaga yee: «O Ƥeenqe no kiin oxe a wara o ñagadilel. Xan maak waa fo saasadax maak waa fo jaajangin waa no kebil kaa Moyiis a mbañin. Xan a warel, ndaa no ñaal ndadkandeer naa xan a xontoox.»

²³ Maaga, a laya a den, den fop ee: «Oxuu bugaxama o reefan, fat a wuus o ñis um, a gadooxaa a kurwaa um bes fuu refna, soo a reefanaam.

²⁴ Oxe na bugkaa o mucil o ñis um xan a ñakin, ndaa oxe na ñakkan yaam mi, xan a muclin.

²⁵ Xar a jiriiñkaa o kiin ta jeg adna fee fop, yaa ta saŋkooxna mbaat ta mo?

²⁶ Oxuu sedaxama, a sed fa lay es, xan o Ƥeenqe no kiin oxe a sedin yaa ta garkaa kam o ndam um fo no ndam onqe na Faap fee fo no nqe no malaaka tedu ke.

²⁷ No ndigil, mexe layaa a nuun ee: Leng-leng no we ndefna meeke nqonkee, too nga’ee Maat ne Roog.»

Yeesu a suptooxa

²⁸ A cinj ngap ñaal ɓetuu tadik yaa ta layna fa lay faaga, Yeesu a ɓislooxa a Piyeer fa Saŋ fa Saak, soo a ŋaay took o joong olaa ndax ta xeɗ.

²⁹ Yaa ta maadna o xeɗaa, a tagid um a suptooxa, too toki ke ten a ndan-ga boo taw.

³⁰ Maaga, wiin ɗik a layooga fo ten, da ndef Moyiis fa Eliya.

³¹ A mbeeñooxa fo o ndam, a layaa fa Yeesu kaa jofna na fa nqon um na fadnoorkaa Yeerusaleem.

³² Piyeer fo yoon um kaa ƭaanoogu, ndaa a naanga beret a yokoox, too a nga’a o ndam onqe Yeesu fo wiin ɗik waa ndeeƭna fo ten.

³³ Yaa wiin ɗik waaga a inooraa maa Yeesu rek, Piyeer a laya a Yeesu yee: «O Caajangin oxe, a tef ale in mene a fela lool. Fat i sip mene ƭiif tadik: Leng of, leng Moyiis fo leng Eliya.» Piyeer koy, and’ee ke ta helna o lay.

³⁴ Yaa ta maadna o layaa, eel a feeña, a muur a den, too daalbe we a ndiida diid maak, yaa da ndokna no eel laa.

³⁵ A jega o ñuxur olaa nannoorna kam eel laa, too a lay ee: «Oxene refu o Ƥees onqe jiluuma. Nan-gilooxeenoo!»

³⁶ Cinj yaa o ñuxur olaa a nannooxna, Yeesu soom daalbe we a nga’’atu. Daalbe waa a naanga tek, too layee o leng tus na jamaane faaga da nga’’ina tigaa.

Yeesu a wodanda o njaaƈ onqaa jini a damna

³⁷ No feet olaa, yaa da mbudoortiidaa no joong olaa, faan maak a fadiida paam Yeesu.

³⁸ Maaga, ndeer no wiin mayu waa o koor a falalooxa a Yeesu, too a layin ee: «O Caajangin oxe, ɗeetanangaam o ƥees, yaam ten soom jegum.

³⁹ Jini na yo’nan, too ndak fo ndak a naaga o wuuqaa. Kaa yo’nan boo yaa ta naagkaa dal a yen, a puur a sutooraa no don ole, too naagiran o ñofaa waas, a cinj yaa ta maafuuna.

⁴⁰ Dimle’noox’aam daalbe we wo ndax da ndaxin, ndaa mbaag’iran.»

⁴¹ Yeesu a doonaan ee: «Xeet fa ƥoowu, too a ngimaƭar! Kaam refkaa fa nuun boo a mban? Kaam ee kaam gadooxkaa a nuun boo a mban? Ɓisiidaam meeke o ƥeenqe!»

⁴² Yaa ta matiidaa, jini faa a yo’naan, too a naagaan dal a maafin. Kaa koy, Yeesu a ŋala jini fee, a wodand o ndeɓandoong onqe, too a nomtaan a faap um.

⁴³ Fop kaa njaaxiɗ’u yaam o magnel ole Roog. Maaga, fop a njaaxiɗ’a no ke Yeesu a fi’oogna, ndaa Yeesu a laya daalbe we ten ee:

Yeesu a dakooxa o yegnit fa nqon um fo a qontax um

⁴⁴ «Fat xa ƭelem axene a ndok no nof nuun a paax: O Ƥeenqe no kiin oxe a wara o ɓoxotel a ndeer xa ƥay axe no wiin we.»

⁴⁵ Kaa koy, daalbe we and’ee ke fa lay feene a tekitna. Kaa mo’u a den ndax andkiran, too a saɗar’a o laamit a Yeesu kaa farna teen.

Oxe hupna no Maat ne Roog

⁴⁶ Maaga, daalbe we Yeesu a ñimatirooga ndax da and oxe hupna na den.

⁴⁷ Yaa Yeesu a andna ke da nqalaataa, a xota o ndeɓandoong o ndutuuñ, a geennin a ndeer den,

⁴⁸ a lay a den ee: «Oxuu genarna o ndeɓandoong o ndutuuñ o mbodu nene yaam mi, mi a genaru, too oxuu genaraxama, a genara oxe luliidaxama. Oxe moƴna o neew a ndeer nuun koy, refu oxe moƴna o magin.»

Oxuu fañeerna a nuun, fa nuun a faru

⁴⁹ Cinj kaaga, Saŋ a doona yee: «O Caajangin oxe, i nga’a o koor oxaa na raxaa cini ke no gon of, too i mbug’aan o mbañit o ten, yaam yoonee fa in.»

⁵⁰ Kaa koy, Yeesu a doonaan ee: «Ba nu mbañtin o ten, yaam oxuu fañeerna a nuun, fa nuun a faru.»

Saasamari we a mbaña o ndalin a Yeesu

⁵¹ Yaa jamaane faa Yeesu a war’ina o inoor na adna fee, a ret na asamaan a matiidna, Yeesu a hebooxa o ret Yeerusaleem.

⁵² Yeesu a lula wiin da adookin. Yaa da ndetna, a ndoka na saate fa leng no Saasamari waa, a mbaaƭan a Yeesu maa ta dalna.

⁵³ Kaa koy, waa ngen’ina na saate faaga njaɓ’iran o ngenar, yaam ne ta heboox’ina o ret Yeerusaleem.

⁵⁴ Yaa daalbe we ndefna Saak fa Saŋ a nga’na kaaga, a laya yee: «O Yaal oxe, ndax bugaa i ngebil fiɗel ta fudoortiid na asamaan, a saŋik a den?»

⁵⁵ Yeesu a geleerooxa, a faambir fa den, a xasan a den.

⁵⁶ Cinj kaaga, a ndeta na saate fa lakas.

Ne Yeesu a wareena o reefanit

⁵⁷ Yaa da ndefna na ƭat, o kiin a laya a Yeesu yee: «Muu o jofaa xam reefanong.»

⁵⁸ Yeesu a doonaan ee: «Xa ƥox-a-koƥ axe a njega qanq, tiiƭ ke na asamaan a njeg tut, ndaa o Ƥeenqe no kiin oxe jegee maa ta hakandooxna.»

⁵⁹ Yeesu a laya o lakas oxaa yee: «Reefanaam!» Oxaaga itam a doonaan ee: «Ci’aam boo um waag o uup a faap es boo ƴut.»

⁶⁰ Kaa koy, Yeesu a layaan ee: «Xaƴi xon we a uup xon den, too wo o mat, o ret yegnitik Maat ne Roog.»

⁶¹ O lakas a layahina yee: «O Yaal oxe xam reefanong, ndaa ci’aam boo um eet o asook wiin mbind in.»

⁶² Yeesu a doonaan ee: «Oxuu damna no masiin nqooxir soo a wiƈaqiloox, Maat ne Roog a jombaan.»