YEGIL MBAAX NE YEESU ne Lik a bindtuuna 8 - NQAARIIT NE ROOG

Rew leng-leng a ndeefanooga a Yeesu

¹ Cinj kaaga, Yeesu a retooga ndeer saate fa saate a waare’aa, too a yegnitaa Yegil mbaax ne no Maat ne Roog. Xarɓaxay fo ɗik waa a ndeefanaan.

² A jeg’a itam rew leng-leng waa mbodand’eena, too cini fo xa ƭomel xa lakas a ndam’u a den yaaga. Mari-Magdala fee cini ɓetaa ƭaq a sutoor’ina no ten

³ fa Yowana fee o tew Kusa jawdiin Herood fa Susaan fo rew lakas mayu waa ndimle’oogna a den fo o jeg ole den, fop maaga a ndeeƭu.

A naxax ale no tuuduuf oxe

⁴ Wiin we kaa inoortiidoogu no teeru mayu, a ngaraa maa Yeesu. Yaa wiin mayu waa a mbokatoorna, Yeesu a naxooxa a den ee:

⁵ «O tuuduuf sutoox’u a duufik ax um. Ye ta sulaa, a seek a leng no ax ke a sama kam a ƭat ale, wiin we a ndakan, soo tiiƭ ke na asamaan a ngar a ñaamin.

⁶ A seek a lakas a yena maa fi’na ƭeŋkeleer. A looƴ’a no ñofu, ndaa a weera, yaam lanq ke nquƥ’ee.

⁷ A seek a lakas a sama maa jegna kiƈ. Kiƈ ke a saxandoora fo ten, soo a ngoñin.

⁸ A seek a palakaand ale a sama no lanq paax ke. Ye ta maakna, mbep leng a rima pep teemeed.» Yaa Yeesu a layna kaaga, a laya a maak ee: «Oxuu jegna nof nanir, fat a nan-giloox!»

Ke taxna Yeesu a laytaa a naxax

⁹ Daalbe we Yeesu a matiidaan, a laamtin ke a naxax aleene a tekitna.

¹⁰ Yeesu a doona a den ee: «Kaa nu ci’el o and kunpa ke no Maat ne Roog, ndaa no lakas we o mat, kaa war o fi’tel a naxax. ‹Neene, a naangangaa o ƭeetaa, nga’kee, too a naangangaa o nanaa, andkee.› »

Yeesu a tekta a naxax ale no tuuduuf oxe

¹¹ «Keeke refu ke a naxax ale no tuuduuf oxe a tekitna: Ax ke ndefu fa Lay fee Roog.

¹² Ke samna na ƭat ale koy, refu wiin we na nanaa fa lay fee, soo o ƈiƴ oxe a gar a watin fa lay fee duufeena na qeeñ den, yaam ndik da ngim, a muc.

¹³ Ax ke samna no ƭeŋkeleer ne tektu wiin we andoona yee kaa nan fa lay fee, a njaɓin ndak fo ndak fo o ɗaay, ndaa koy njegee a paƴ na den sax sax. A pe a leng-leng soom a ngimaa, ndaa ƭeetlax ke a ngarangaa, kaa ndalfooxaa o mbes o ngim onqe a cinj.

¹⁴ Ax ke samna kam kiƈ ke ndefu we na nanaa fa lay fee Roog. Kaa koy, a qalaat ake fo kalal ke fo a yuxum ake no ñoow ole kaa ngoñaa a den boo mboorkee.

¹⁵ Ax ke nduufeena kam lanq paax ke tektu we na nanaa fa lay fee Roog, a njaɓin fo xeeñ letu fo o woor, a ndamin, soo a ndimaa.»

Nuun ndefu a qoolaand adna

¹⁶ «O leng heƥandkee o lampa boo a ƴut, soo a sagin a saxal mbaat ta ɓekin yoora njong. Kaa ɗagan, ndax we na ndokiidkaa na ndok ale a mbaag o nga a qoolaand ale.

¹⁷ Yaam jegee dara kaa ɗasna, too ñuqitkaand. Jegee itam kunpa fa leng faa ɗasna, too weejilkaand, soo a andel.

¹⁸ «Mbootooxyo boog ne nu nan-gilooraa, yaam oxe jegna xan a ci’el, ndaa oxe jegeerna koy, o ndik onqe ta foogna yee ten a jegu, xan a jaɓel.»

Ya Yeesu fo xa teɓ axe Yeesu

¹⁹ Maaga, ya Yeesu fo xa teɓ axe Yeesu a soƥiidaan, ndaa mbaag’iran o nga, yaam wiin mayu waa ndeeƭna maaga.

²⁰ O leng no wiin waa a laya a Yeesu yee: «Reti jaaɓik! Ya of fo xa teɓ of owe cungang tafil, too kaa mbug o nga’ir fa wo.»

²¹ Kaa koy, Yeesu a doonaan ee: «Ya es fo xa teɓ es ndefu we na nan-gilooxaa fa lay fee Roog, too a ndeefan.»

Yeesu a riimanda a und

²² A jeg’a bes, Yeesu a rok no suk, ten fo daalbe we. A laya a den ee: «Fat i laqtook kaltaa o maag olaa.» Maaga, a ndeta,

²³ too yaa da lafaa, Yeesu a ɗaana. Ndak fo ndak, a und a maak a yoɗooxa took o maag ole boo foofi le a muuraa suk ne.

²⁴ Maaga, daalbe waa a matiida a Yeesu, a yokin, too a layin ee: «E! E! E! O Caajangin oxe, in we saŋkooxaa kat!» Yeesu a inooxa, a ŋal nqeñ ne fo a yag-ee-yag ake no foofi le, too fop a naag’ata yereŋ.

²⁵ Yeesu a laya daalbe we ten ee: «Taa o ngim nuun?» Kaa koy, kaa ndiid’u, a njaaxiɗ lool, too a layaa yee: «An oo kiin oxene na ŋalaa nqeñ ne fo foofi le sax boo da nananan?»

Yeesu a wodanda o koor oxaa cini a ndamna

²⁶ Yaa Yeesu fo daalbe waa ten a mbadna kaltaa o maag olaa no saax laa no Geegerasin waa mbaambrand Galile,

²⁷ a jopir Yeesu a fudooxiidaa, o koor oxaa cini a ndamna, too a gen na teeru faaga a xetiida fo ten. A miñ’a fo ñak o rokoox ndoki lool, too gen’ee no mbind, no poy kaa a gen’u.

²⁸ Yaa ta ga’na a Yeesu, a wuuqa, soo a dig a gooknoox paam a caf um, too a lay a maak ee: «Yeesu wo fee refna o Ƥeenqe Roog fee Took-ee-took! Xar bugaxamo o fi? Waay waay, ba o xijlaam!»

²⁹ Maaga, Yeesu a hebla jini faa ta sutoox no koor oxeene ta dam’ina yaaga boo ndiik. O koor oxaa kaa yetooxoogel, a humeel ceen na xa ƥay fo celem na caf ake. Kaa koy, kuu ta humit’eena humit a ɗegin, soo jini fee a ɓakandin farna fo a koƥ-a-ƥor alaa.

³⁰ Yeesu a laamtaan ee: «Nam ne’ee?» A doonaan ee: «Suungaan ne’eem», yaam cini mayu ndam’un.

³¹ Cini kaa a nqeɗooxa a Yeesu, too a layin ee: «Ko ndeeg ba o ɓis a in na ngas fiɗel alaa.»

³² A jeg’a maaga paam o joong olaa o siir o maak a tuul olaa suufoogna. Maaga, cini kaa a nqeɗooxa a Yeesu ndax ta ci a den da ndok kam a tuul akeene. A ci’aan a den.

³³ Naaga, cini kaa a sutooxa no koor oxaa, soo a ndok kam a tuul akaa, o siir olaa a dalfoox o eetatir a pudnand alaa, kam o maag ole, soo a saŋkook.

³⁴ Yaa waa ngayoogna a den a nga’na ke xew’ina, a ƈufa a mbetandookin kam teeru faa fo kam a saax akaa matna maaga.

³⁵ Wiin waa a ndalfooxa o ndet a ƭeetik ke xew’ina. A mbadiida me Yeesu, a soƥ o koor oxe cini a ndam’ina a moof na caf Yeesu, a rokoox tikoorik um, too a dakoox’a na sagu um. Maaga, wiin we a ndiid’a lool.

³⁶ We nga’’ina ke xewna fop a mbetandooxa lakas we ne oxe cini ke a ndam’ina a wodit’ina.

³⁷ Yaa waa no saax laa no Geegerasin we a nanuuna, a nqetooxiida a Yeesu, soo a nqeɗooxin ndax ta sutoox saax den, yaam kaa ndiid’u lool. Cinj kaaga, Yeesu a roka no suk, ndax ta nomtoox.

³⁸ O koor oxaa cini kaa a sutoorit’ina kaa xeɗooxoogu, ndax ta yoon fa Yeesu, ndaa Yeesu a heblaan ee:

³⁹ «Reti xaad, yegnitik ke Roog a fi’anoonga fop.» A reta a yegnik waa na teeru faa ke Yeesu a fi’an’uuna fop.

Yeesu a wodanda o tew, a xontooxnoor o ƥiy Yayrus

⁴⁰ Yaa Yeesu a nomtoortiidna maaga, wiin mayu a nqetooxiidaan, yaam fop kaa cungoogun.

⁴¹ Maaga, o koor oxaa ne’eena Yayrus, too a ref kelfa no mbind a qeƭ naa a fadiida, a gooknoox paam Yeesu, too a layin ta ret no mbind um,

⁴² yaam o ƥeem o ndew onqaa jeg’ina xa kiid xarɓaxay fo xa kiid xa ƭaq kaa meeñoogu. Yaa Yeesu a inooxna a retaa, wiin mayu a ƥiikloogaan.

⁴³ A jeg’a maaga koy o tew oxaa jir’ina. Kaa ga’oogu tap, too ɗegroogee boo xa kiid xarɓaxay fo xa kiid xa ƭaq. A su’nit’a ke ta jeg’ina fop no waawaadin we. O leng koy waag’iran o wodand.

⁴⁴ A garta a Yeesu a cinj, a matiidin, a duq o noflax ole no ndoki ne ten, too ndak fo ndak o tew oxe a woda.

⁴⁵ Maaga, Yeesu a laamta yee: «An duqaxam?» Fop a nqaña, too Piyeer a laya yee: «O Caajangin oxe, wiin we o mat ndeerong, a ƥiiklang.»

⁴⁶ Kaa koy, Yeesu a doona yee: «O kiin a duqaxam kañ, yaam yegaam ee doole a sutoora na mi.»

⁴⁷ Yaa o tew oxaa a ga’na yee waagee o ɗas, a gara a sendaa, soo a gooknoox me Yeesu. A laya mbaambir no wiin waa fop ke tax’ina ta duq a Yeesu fo ne ta wodit’ina na waxtu faaga.

⁴⁸ Yeesu a layaan ee: «O ƥees, o ngim of a muclaang. Reti na jam!»

⁴⁹ Yaa ta maadna o layaa fa den kaaga, o koor a inoortiida no mbind kelfa faa no mbind a qeƭ naa, too a lay ee: «O ƥeef o ndew a ñaka ndiiki. Jaratee o inaa o Caajangin oxe.»

⁵⁰ Yaa Yeesu a nanna kaaga, a doonaan ee: «Ba o diid, gimi rek, too xan a wod.»

⁵¹ Yaa Yeesu a fadiidna no mbind naa na kelfa faa, a laya waa ndeefan’uuna yee ba da ndokiid bo ta yoqaa a Piyeer fa Saŋ fa Saak fa faap fee fa ya fee no ndoog onqe.

⁵² Wiin we fop kaa looloogu, a mbaɗooxaa yaam o ƥiy o ndoog onqe. Maaga, Yeesu a laya a den ee: «Ba nu loolat, yaam xonee, kaa ɗaanaa soom.»

⁵³ Maaga, wiin mayu waa kaa nqaad-nooxoogu a Yeesu, yaam a and’a yee o ndoog onqe a xona.

⁵⁴ Kaa koy, Yeesu a damaan no ɓay, too a lay a maak ee: «O ƥees, inooxi!»

⁵⁵ Maaga, a jokooxa, too a inooxa ndak fo ndak. Yeesu a laya a den da cooxin ta ñaam.

⁵⁶ Yaa waa ndimna o ndoog onqe a nga’na kaaga, a njaaxiɗ’a lool, too Yeesu a maƭooxa a den ee ba da layit ke xew’ina.