YEGIL MBAAX NE YEESU ne Lik a bindtuuna 6 - NQAARIIT NE ROOG

Yeesu na bes fee na ñootnax ale

¹ Na pe akaaga, a jopir bes fee na ñootnax ale, Yeesu a xaaña kam xa qol bele. Daalbe we ten a ƥola teen, a ndef no ƈaxaa a den.

² Leng-leng no Farisiya waa a laya yee: «Xar taxu nu mbi’aa ke a ƭat ale in a xañtaa na bes fee na ñootnax ale?»

³ Took kaaga, Yeesu a doona a den ee: «Ndax kaa nu njangee kam a Pind a Tedu ke ke Dawid fo yoon um a mbi’’ina, a soƥ da nqeexel?

⁴ Ndax kaa nu njangee ne ta rokit’ina no Mbind Roog naa, soo a jang xa kaf puuru xaa ƥoxot’eena a Roog, a ñaam teen, a coox yoon um itam? Yaag oo toox de, saasadax we soom kebil ke a ci’’u da ñaam puuru keene.»

⁵ Cinj kaaga, a laya a den ee: «O Ƥeenqe no kiin oxe refu oxe hame’na bes fee na ñootnax ale.»

O yaal o ɓay o xaru le

⁶ Na bes a ñootnax a lakas, Yeesu a roka kam mbind a qeƭ naa, a jangnaa. A soƥa maaga o koor oxaa o ɓay um o ñamaak a xarna.

⁷ Jaajangin we no kebil ke Moyiis fo Farisiya we a mbug’a o njamb a Yeesu. Kaa ngorooxoogun a paax ndax xan a wodand o kiin na bes fee na ñootnax ale.

⁸ Kaa koy, Yeesu a anda ke refna a qalaat den, too a laya o koor oxaa o ɓay um a xar’ina yee: «Inooxi, geenoox a ndeer den.» Naaga, a inooxa, a geenoox a ndeer den.

⁹ Yeesu a laya a den ee: «Kaam laamtaa a nuun: Xar a ƭat ale in a simtu? O fi paax na bes fee na ñootnax ale ndi o fi paaxeer? O mucil o kiin ndi o saŋkin?»

¹⁰ Yeesu a ɗeeta a den fop, too a lay o koor oxaa yee: «Letni o ɓay of!» A letnaan, too o ɓay um a woda boo ceŋ.

¹¹ Den fop a mbuuxa, too a njeetaaya a ndeer den, ndax da ƭeet ne da mbi’kaa a Yeesu.

Yeesu a jila apootar xarɓaxay fo apootar ɗik we

¹² Na pe akaaga, Yeesu a reta took o joong olaa ndax ta xeɗ. A fe’a no xeɗaa a Roog boo neen a feedu.

¹³ Yaa mbeet naa a xoolna, Yeesu a xoya daalbe we ten, too a jil teen xarɓaxay fo ɗik waa ta ne’na apootar, den ndefu weeke:

¹⁴ Simoŋ fee Yeesu a feran’ina Piyeer fa Andare fee o ndeɓ um fa Saak fa Saŋ fa Filip fa Bartelemi fa

¹⁵ Mace fa Tomaa fa Saak fee o ƥiy Alfe, Simoŋ oxe na xoxtaa saax um

¹⁶ fa Yudaa o ƥiy Saak fa Yudaa o Iskariyot oxe na retkaa a ɓoxot a Yeesu.

Yeesu a wodandooga wiin we

¹⁷ Maaga, Yeesu a fudoortiida no joong olaa, a gar no joor fee, a yoon fo apootar we ten. Daalbe mayu fo wiin lakas mayu a inooriid’a muu refna na Yudee fo na Yeerusaleem boo no teeru maak kaa Tiir fa Sidoŋ a ndabiid a Yeesu.

¹⁸ Kaa ngaroogu ndax da nan-giloox fa lay um, too a mbodandel na cir ake den. We cini a ndam’ina fop itam, Yeesu a wodanda a den.

¹⁹ Wiin mayu a mbaaƭooga maa da nduqtuuna, yaam doole fee sutoortoogna no ten, too a wodandaa a den fop.

O ɗaay o ndigil

²⁰ Maaga, Yeesu a faambra fo daalbe we ten, too a jangin a den ee: «Nuun we ñakna halal, nu ƭaaya, yaam Maat ne Roog nuun a refanu!

²¹ Nuun we nqeexeena ndiiki, nu ƭaaya, yaam xan nu ngiñ! Nuun we naqadilooxna ndiiki, nu ƭaaya, yaam xan nu sawar!

²² Boo andoona yee nu sibe mbaat nu ndaxel mbaat nu mbenel mbaat nu mberanel paaxeer kuu refna yaam o Ƥeenqe no kiin oxe, nu ƭaaya.

²³ Mbelakinooxyo na pe akaaga, too ndef no ɗaay, yaam ndabid nuun xan a magin na asamaan. Neene daan we no we na mbi’kaa a nuun keene a ñagadilit’u duleer we adooxna a nuun.

²⁴ Ndaw sabab took nuun, nuun yaal kalal ke, yaam nu yaale boo ƈut!

²⁵ Ndaw sabab took nuun, nuun we ñaamna ndiiki boo ngiñ, yaam xan nu nqeexel! Ndaw sabab took nuun, nuun we na njalooxaa ndiiki, yaam xan nu ndef no ƭomatax maak fo xa lool!

²⁶ Ndaw sabab took nuun, yaa wiin we a layanna a nuun paax ƥor, yaam neene o mat daan den a mbi’anoogu duleer maamaaɓ we.»

Kaa farna no mbeq o pañ

²⁷ «Kaa koy, mexe layan a nuun, nuun we na nan-gilooxaxam: Mbexyo fañ nuun, we sibna a nuun, nu mbi’anaa a den paax.

²⁸ Naangyo o mbarke’aa we na salooxaa a nuun, too nqeɗanaa we na mbenaa a nuun.

²⁹ O kiin a faɗangaang no ɗek, cooxeen o lakas ole itam. O kiin a bugangaa o jang o forok of, doonaneen sabadoor of sax.

³⁰ Ci’i oxe na xeɗang, too ba o ser oxe na xoxaa fo tig of.

³¹ Kuu nu mbugna wiin we a mbi’an a nuun, mbi’aneenoo a den.

³² «Nu mbexangaa we mbexna a nuun, xar nu moƴantu lakas we? Mee ndax baabakaad we sax kaa mbi’an?

³³ Nu naangangaa o mbi’anaa paax we na mbi’anaa a nuun paax, xar nu moƴantu lakas we? Mee ndax baabakaad we sax kaa mbi’an?

³⁴ A soƥangaa koy ee we nu yaakaarna da ndakin a nuun nu ƥandaa, xar nu moƴantu lakas we? Baabakaad we itam kaa ƥandaa baabakaad we, ndax da ndakin a den tig leng ke.

³⁵ Kaa koy, mbexyo fañ nuun, mbi’anaa a den paax, ƥandtaa, too mbañ o yaakaar teen tig. Yaaga, xan ndabid nuun a magin, nu ndef xa ƥiy no xe refna Took-ee-took, yaam a faaxa no gore’aƭaru we fo soxodu we.

³⁶ Saqyo yirmande ne Faap nuun a saqitna yirmande.»

Ba nu ƥanj o leng

³⁷ «Ba nu ngate’aa wiin we mbaat Roog ñakkee o hate’aa a nuun. Ba nu ƥanjaa o leng mbaat Roog ñakkee o ɓanjaa a nuun. Naangyo mbaasantaa, too yaaga xan Roog a waasanaa a nuun.

³⁸ Ci’ityo, too yaaga xan Roog a ci a nuun. Xan nu yiƥadooxanel eedir kaa soqeena, a yo’nel, soo a may boo a ɓaxooxaa. Xan nu eedantel eedir ke nu eedtaa.»

³⁹ Yeesu a naxooxahina a den ee: «Ndax o puul a waaga o ɗox o puul o kend um? Ndax den ɗik fop njimbooxkee na kamb?

⁴⁰ O taalbe moskee o hup o caajangin um. Kaa koy, o taalbe xuu a cang um a fadnooxna, xan a fod fo o caajangin um.

⁴¹ Xar taxu o ga’aa njaambul ne refna na ngid no kend of, too waagiro o ƴook a toodook ale refna kam a ngid of?

⁴² Mbaat nam waago o layit o kend of ee: ‹O pog es, xaƴi um watnanong njulmbax ne refna na ngid ale wo›, wo fee waageerna o ga a toodook ale refna kam a ngid of? Wo soo ref o yememaar! Pañtu o eet o watin a toodook ale refna na ngid of, soo sogkaa waag o ga a paax ne o watnitkaa njulmbax ne refna kam a ngid no kend of?»

Ndaxar na xa tim axe a andditeel

⁴³ «Ndaxar mbaax rimkee xa tim xa paaxeer, too ndaxar mbaaxeer rimkee xa tim xa paax.

⁴⁴ Ndaxar nuu refna, na xa tim axaa a andditeel. O leng ɗatitkee xa tun took ngol mbaat xa tim ndaxar biiñ took nooƥ.

⁴⁵ O kiin o paax, no xeeñ um faax a xottaa paax, o kiin o paaxeer a xottaa paaxeer no xeeñ um faaxeer. Yaam ke o kiin a layaa fo o don um fop, no ndap xeeñ um a xottan.»

Sinjyo no ɓil!

⁴⁶ «Xar taxu nu nqoyaxam ee o Yaal oxe, o Yaal oxe, too nu naangee o mbi’aa ke simtuuma?

⁴⁷ O kiin oxe na nan-gilooxaa fa lay es too a reefan, xam lal a nuun oxe ta nanditna.

⁴⁸ Oxeene kiin kaa nand fo o koor oxaa waqna boo ta xooɗ, ta sinj mbind um took ɓil. Ye ndiig ne a garna, a qaandiind ake fo a und ake a ngoma mbind ne, ndaa yenee, yaam no ɓil a sinje.

⁴⁹ Oxe na nanaa fa lay es koy too reefiran, kaa nand fo o koor oxaa sinjna mbind um kam mbuuƴ ne, too adnaniran a ƥil. Ye ndiig ne a garna, a qaandiind ake fo a und ake a ngoma mbind ne ta yen, too njom ne a magna lool.»