YEGIL MBAAX NE YEESU ne Lik a bindtuuna 5 - NQAARIIT NE ROOG

Yeesu a xoya daalbe eetaand we

¹ Bes, Yeesu a reeƭa paam o Maag olaa Genesaret, too faan maak a ndeeraan, ndax da nan-giloox fa lay fee Roog.

² A ga’a na ƥeeraamb ale no maag ole suk ƭik, too faafaal we a mbudooxa, a nqendandaa paal den.

³ Yeesu a roka no leng no suk ke, too Simoŋ a jeg’un. A layaan ta ret ndeer o maag ole. Yeesu o mat kaa moof’u kam suk ne, soo a jangnaa faan le.

⁴ Yaa ta ƴutna a cangin, a laya a Simoŋ ee: «Lafyo suk ne boo no qooƭ ke. Ndeɓyo teen, too mbaal.»

⁵ Simoŋ a layin ee: «O Caajangin oxe, no mbaal i mbe’u, too i ndamee tus. Kaa koy, feek layaano, xam deɓ mbaal ne.»

⁶ Yaa da ndeɓuuna, a ndama liƥ mayu, too mbaal ne a dalfooxa o ref no ɗegaa.

⁷ Maaga, a caxa yoon den we ndeeƭna no suk lakas ne, ndax da ndimle a den. A ngara, too a yipa suk ƭik ke liƥ bo da may boo a suuxaa.

⁸ Yaa Simoŋ Piyeer a ga’na kaaga, a naaga giriƥriƥ, a gooknoox paam Yeesu, too a lay ee: «O Yaal oxe, goƭaam yaam o paabakaad refum.»

⁹ Simoŋ kaa jaaxiɗ’u, ten fo we ndeeƭna fo ten, yaam liƥ mayu ke da ndam’ina.

¹⁰ Naaga o mat a refit’u fo yoon we ten, Saak fa Saŋ, we xa ƥiy Sebede. Cinj kaaga, Yeesu a laya a Simoŋ ee: «Ba o saɗar dara! Taa paam, o paafaal no wiin o refkaa.»

¹¹ Yaa da lafna boo a sutoox na tambando faa, a nqaƴa fop ke da mbi’oogna, soo a ndeefanin.

Yeesu a wodanda o yaal a tik-a-maak

¹² Yaa Yeesu a refna na fa leng no teeru kaaga, oxaa a tik-a-maak a damna a ga’aan. Maaga, a gooknooxa mbaambir um, a layin ee: «O Yaal oxe, a felangaang waagaxamo o xooland.»

¹³ Yeesu a letna o ɓay um, a duqin, too a lay ee: «A felaxam, xooli!» Ndak fo ndak, a tik-a-maak alaa ten a wata.

¹⁴ Maaga, Yeesu a maƭooxaan ee: «Wootooxi layin o kiin o lakas. Reti laltinook maa no saasadax oxaa, too sadaxit ke Moyiis a hebilna we nqoolandeena, ndax fop a seede yee xoolaa.»

¹⁵ Gon um a moƴ’a o joot. Wiin we kaa mbi’iidoogu o yuuƥ, a ngaraa maa ten, ndax da nan-gilooxin, too a mbodandel na cir ake den.

¹⁶ Kaa koy, Yeesu a inooxooga, a ret o mbiñ o mbootu, ndax ta xeɗ.

Yeesu a wodanda o ƥoof

¹⁷ Bes, Yeesu a jangnooga. Farisiya we fo jaajangin we no kebil ke Moyiis a moofa paam um, a inoorit no caate kaa Galile fa Yudee boo Yeerusaleem. Doole fee no Yaal oxe a reeƭa fa Yeesu, too a tax’a ta wodandaa jiru we.

¹⁸ Maaga, goor leng-leng a ƥisiida o ƥoof oxaa wondneena no njong. Kaa mbaaƭoogu maa da ndoknituuna na ndok alaa, ndax da lalin a Yeesu.

¹⁹ And’ee koy me da mbaaguuna o ndeefin yaam wiin mayu we ndeeƭna no ndokand ne. Maaga, a ŋaaynaan took bomb laa, a mbombit a tiwil ake, soo a yoorniidin fo njong ne a ndeer no wiin we, mbaambir Yeesu.

²⁰ Yeesu a ga’a o ngim den, too a laya o ƥoof oxe yee: «O koor oxe, pakaad of a mbaasane.»

²¹ Yaa jaajangin we no kebil ke Moyiis fo Farisiya we a nanna fa lay faaga, a laya na yiif den ee: «An oo xene na wenaa a Roog? An waagu o waasanit pakaad a refangee Roog?»

²² Kaa koy, Yeesu a anda a qalaat den, too a laya a den ee: «Xar taxu nu njeg a qalaat akeene na yiif nuun?

²³ Xar moƴu yooɓ o layel: ‹Pakaad of a mbaasane›, ndi lay ee: ‹Inooxi ñaaƴ›?

²⁴ Kaa koy, kaam bug nu and ee o Ƥeenqe no kiin oxe a jega sañ-sañ faa ta waasantaa pakaad na adna fee.» A geleerooxa, a lay o ƥoof oxe yee: «Mexe layang o ten, inooxi jang njong of, too xaad!»

²⁵ Ndak fo ndak, o ƥoof oxe a inooxa, a geenoox mbaambir den. A janga njong um ne ta wondooxoogna, a xaad, soo a simataa a Roog.

²⁶ Wiin waa fop kaa njaaxiɗ’u, a simataa a Roog, too a ndiid. Kaa layoogu yee: «I nga’a xaye kaa a kid in a moseerna o ndoonoox!»

Yeesu a xoya a Lewi

²⁷ Cinj kaaga, Yeesu a sutooxa, too a ga’a oxaa fog’ina no waa ndabdinooxoogna juuti, too a ne’el Lewi, a moof maa wiin waa a ndabditoogna juuti. Yeesu a layaan ee: «Reefanaam!»

²⁸ A xaƴa fop, a inoox, a reefanin.

²⁹ Maaga, Lewi a xura a Yeesu a put no mbind um, too wiin mayu no waa ndabdinooxoogna juuti fo wiin lakas a ndeera fa den, a ñaamaa.

³⁰ Farisiya we fo jaajangin we no kebil ke Moyiis mbog’ina na den a nqaadoox’a, too a layaa daalbe we Yeesu yee: «Xar taxu nu ñaamaa yeraa fo we na ndabdinooxaa juuti fo baabakaad we?»

³¹ Yeesu a doona a den ee: «Refee yee we mbodna soxla’u o baawaadin, ndaa jiru we.

³² Xoyiidiim wiin jofu we, ndaa baabakaad we, ndax da mbes pakaad den a cinj.»

Yeesu a laamte kaa farna no koor ne

³³ Wiin we a laya a Yeesu yee: «Daalbe we Saŋ o Paabatiise xe fo we no Farisiya we a mera o ngooraa, a nqeɗaa, too daalbe we wo o mat a ñaamaa, a yeraa.»

³⁴ Yeesu a doona a den ee: «Ndax nu mbaaga o ngoornoor we na ngulookaa, yaa o kor-no-kulook oxe a refna fa den?

³⁵ Ñaal ke o kor-no-kulook oxe a refkateerna fa den owe ngaraa, too no ñaal kaaga, xan a ngoor.»

³⁶ Yeesu a naxooxahina a den ee: «O leng xuuyitkee no ndoki nqas o seegiit, ndax ta daafin no ndoki ngiid. A fi’angaan, xan a xuuy ndoki nqas ne, too o seegiit ole ta xuuyitna teen waagkee o yoon fo ndoki ngiid ne.

³⁷ O leng ñolandkee biiñ fa nqas kam poxos kiid mbaat xan biiñ fee a gef poxos ke, biiñ fee a ɓaxoox, soo poxos ke a ñakel.

³⁸ Biiñ fa nqas kam poxos qas a ñolandteel.

³⁹ O leng yerkee biiñ fa ngiid, soo a lay ee biiñ fa nqas bugum, yaam fa ngiid fee na moƴaa o fel.»