YEGIL MBAAX NE YEESU ne Lik a bindtuuna 4 - NQAARIIT NE ROOG

Saytaane a foga a Yeesu

¹ Yaa Yeesu a inoorna no xuluɓ ole Yordaan, a gataa, a maya fo Yiif Tedu le. Yiif le a ɓisaan na koƥ-a-ƥor alaa.

² Maaga, o ƈiƴ oxe a fogaan ñaal qarɓeen nahik kaa andoona yee ñaamee tus, too cinj kaaga a xeex’e lool.

³ Maaga, o ƈiƴ oxe a matiidaan ee: «O refangaa o Ƥeenqe Roog, supti gac leeke ta ref mbuuru.»

⁴ Yeesu a doonaan ee: «A binde yee: ‹O kiin ñoowitkee ngaaf soom.› »

⁵ O ƈiƴ oxe a ɓisaan took, ndeer ñaf fo ƭeet a lalaan maat ke ndefna na adna fee fop,

⁶ too a layin ee: «Xam ci’ong sañ-sañ keene fop fo kalal ke no maat ke na adna fee, yaam kaam ci’el a den. Waagaam o ci a den oxaa felaxama.

⁷ O faɗooxangaam, xan o jeg keene fop.»

⁸ Yeesu a doonaan ee: «A binde yee: ‹O Yaal oxe Roog of soom waro faɗoox too dagooxan.› »

⁹ O ƈiƴ oxe a ɓisaan Yeerusaleem itam. A sipaan took Mbind Roog naa, soo a layin ee: «O refangaa o Ƥeenqe Roog, foolti mene, sipoox a lanq,

¹⁰ yaam a binde yee: ‹Xan a heblanong malaaka ke ten ndax da saytooxang›,

¹¹ fo itam ee: ‹Xan a meeɓong, yaam ndik o kamas ɓil.› »

¹² Yeesu a doonaan ee: «A laye kam a Pind a Tedu ke itam ee: ‹Ɗeetlooxkiro o Yaal oxe Roog of muk›!»

¹³ Yaa o ƈiƴ oxe a foguuna no hep oluu refna, a riƈatooxa a Yeesu koƭu, a waasafulin.

Yeesu a fera o jangnit Galile

¹⁴ Maaga, Yeesu a gatooga kam Galile, too a maya fa doole fee no Yiif Tedu le. Gon um a joot’a no jegel olaaga fop.

¹⁵ Kaa jangnoogu kam pind a qeƭ kaa den, too wiin we fop a ƥoxotoogaan tedaanga.

Yeesu kam teeru faa Nasaret

¹⁶ Yeesu a fadiida na teeru faa Nasaret maa ta yarooxna. Na bes fee na ñootnax ale, a roka kam mbind a qeƭ naa ne ta mer’ina o fi’aa. Maaga, a inooxa ndax ta jang a maak.

¹⁷ A cooxe safe le no tuleer Esayi. Yaa ta wetuuna, a soƥa teen me ta bindeena yee:

¹⁸ «Yiif le no Yaal oxe xe took es. Kaa ɗuumaam ndax um yegnik rool we Yegil mbaax ne, a lulaam ndax um yegin faɗ we a bat ale, yegin we mbuulna o ga ole, soo wokit we toroxandeena,

¹⁹ yegnitaa o Hiid o mbelakinax ole no Yaal oxe.»

²⁰ Cinj kaaga, Yeesu a afna safe le, a daknin o aa-adax oxaa, soo a moof. We ndeeƭna kam mbind a qeƭ ne fop a naangaan jak a kid, a ƭeetan.

²¹ Maaga, a fera o lay a den ee: «Xaye fa lay feene na Pind ake nu nanna a fadnooxa.»

²² Fop kaa seede’anoogun, too fa lay fa nqoolu fee sutoorit’ina no don um a bet’a a den. Yaqanee koy da laamtiraa yee: «Ndax kaa refee o ƥiy Yoseef?»

²³ Yeesu a laya a den ee: «A woora yee nu naxooritkoogaxam o feƭit olene: ‹O baawaadin, wodandi a xoox of.› Xan nu layaam itam ee: ‹I nana ke fi’oona Kapernawum fop, fi’i leng kut ke boog mene refna mbaafaap of.› »

²⁴ Cinj kaaga, a ɓaata teen ee: «No ndigil, mexe yegnan a nuun ee: O tuleer naagee o jaɓeel no mbaafaap um.

²⁵ No ndigil, mexe layahinan a nuun ee: A jeg’a ñaaw mayu Isra’el na jamaane Eliya, yaa a teƥ a jeg’eerna boo xa kiid xa tadaq fa genwal, too biim maak a jega no saax laaga fop.

²⁶ Na waxtu faaga koy, Eliya lul’aand maa no leng no rew waaga, ndaa no tew oxaa ñaawooxoogna Sarepta no saax laa Sidoŋ.

²⁷ A jeg’a mayu waa a tik-a-maak ale a damna kam Isra’el koy na jamaane no tuleer Eliise, too na waxtu faaga o leng na den xooland’aand, ndaa Naaman o Siisiri xe soom xooland’e.»

²⁸ We ndeeƭna kam mbind a qeƭ naa fop kaa mbuux’u yaa da nanna a ƭelem akaaga.

²⁹ A ndalfooxa o inoox, a adnin boo laqa teeru faa took o jul olaa no joong olaa saate faa a max’eena, ndax da ndiñtiidin maaga.

³⁰ Kaa koy, Yeesu a xaaña a ndeer den, a ret.

Yeesu a wodanda oxaa jini a damna

³¹ Yeesu a reta na teeru faa Kapernawum no jegel olaa Galile, a ref no jangnaa na bes fee na ñootnax ale.

³² Wiin we kaa njaaxiɗ’u no ne ta jangnitoogna, yaam ne fa lay um a jegna sañ-sañ.

³³ Kam mbind a qeƭ naa koy, a jeg’a o koor oxaa jini a dam’ina, too a wuuqa a maak ee:

³⁴ «Heey Yeesu o Naanasaret oxe, xar i nqetu? Ndax kaa o saŋkiid a in? Andaam oxe refoona: Wo refu o Tedu xe hatna na Roog.»

³⁵ Yeesu a ŋala jini fee, a layin ee: «Naagi muut! Sutooxi no kiin oxene!» Maaga, jini fee a deɓa o koor oxaa kam wiin waa, a sutoox no ten, too fi’iran kaa ɗomuuna.

³⁶ We ndeeƭna maaga fop a njaaxiɗ’a, too kaa layroogu a ndeer den ee: «Kene fa lay xar oo? Kaa heblaa cini ke fa sañ-sañ fa katil, da sutoox.»

³⁷ Gon le Yeesu a joota na saax akaa matna maaga fop.

Yeesu a wodanda wiin mayu

³⁸ Ye Yeesu a sutooxna mbind a qeƭ ne, a reta no mbind Simoŋ, a jopir o seemir o tew Simoŋ a jir. Cer um kaa sum’u lool, too a ndimle’nooxoogaan, ndax ta wodandin.

³⁹ A yoorooxaan, a rax a sumaan ale, too o tew oxe a salda. A dalfooxa o inoox, soo a genar a den.

⁴⁰ No yaar olaa yaa njeeƈ ne a mudna, Yeesu a ɓisiide wiin mayu waa xa ƭomel xa pogreer a ndamna. A doona took no xuu refna o ɓay, too a wodand a den, den fop.

⁴¹ Cini mayu itam a sutoora no wiin waa, a mbuuqaa yee: «Wo refu o Ƥeenqe Roog!» Kaa koy, Yeesu a ŋala a den, too ci’’atee a den o ñootand, yaam a and’a yee ten refu Kiristaa fee o Muumucil oxe regteena.

Yeesu a waare’ooga

⁴² No feet olaa, Yeesu a sutooxa, a ret o mbiñ o mbootu. Wiin mayu a mbaaƭoogaan, too yaa da mbadiidna maa ten, a ndeeraan ndax riƈatooxkatee a den.

⁴³ Kaa koy, Yeesu a laya a den ee: «Kaam war o yegnitik no teeru lakas ke itam Yegil mbaax ne no Maat ne Roog, yaam keene taxu um luliidel.»

⁴⁴ Maaga, Yeesu a reefana pind a qeƭ ke kam o jegel olaa Yudee, a waare’aa.