YEGIL MBAAX NE YEESU ne Lik a bindtuuna 22 - NQAARIIT NE ROOG

Maak we a mbokatoorana a Yeesu

¹ Xew faa no Puuru canja’e ke, too a xoyoogel Xew fee na colandax ale a matiida.

² Saasadax maak we fo jaajangin maak we no kebil ke Moyiis kaa mbaaƭoogu maa da mbaritna a Yeesu, ndaa kaa saɗar’u xeet faa.

Yudaa a hoda a Yeesu

³ Maaga, Saytaane a roka na Yudaa fee xoyoogeena o Iskariyot oxe reeƭna o leng no xarɓaxay fo ɗik waa.

⁴ A reta, a jeetaay fo saasadax maak waa fo we adooxan’ina alkaati kaa no Mbind Roog naa, ne ta ɓoxotitkaa a den a Yeesu.

⁵ A sawar’a lool, too a njaɓ’aan o ndabid xaaliis.

⁶ Yaa Yudaa a jaɓna, a waaƭoogata maa ta ɓoxotitna a den a Yeesu, too o leng no wiin we yegkiran.

A cu’ax ale na bes fee na Colandax ale

⁷ Na bes faa na Xew faa no puuru canja’e ke maa mbaal ne a war’eena o sadaxit,

⁸ Yeesu a lula a Piyeer fa Saŋ, too a lay a den ee: «Ndetyo njawanik a in a cu’ax ale na bes fee na Colandax ale, ndax i ñaam!»

⁹ A laamta a Yeesu yee: «Mam bugo i njawantong o ten?»

¹⁰ Yeesu a doona a den ee: «Boo nu ndokkaa na teeru faa, xan nu nqetit o koor oxaa roxondooxna nqaw foofi. Ndeefaneenoo boo kam mbind naa ta rokkaa,

¹¹ too fat nu lay o yaal mbind naaga yee: ‹O Caajangin oxe kaa tee: Taa a ndok ale waruuma o ñaamit a cu’ax ale na bes fee na Colandax ale, mi fo daalbe es?›

¹² Maaga, xan a lal a nuun took taax-took naa a ndok a maak fo moofir ke mbarna. Maaga nu njawitkaa a cu’ax ale.»

¹³ A ndeta, too a soƥa fop ne Yeesu a layit’uuna a den, too a ndalfooxa o njaw a cu’ax alaa.

A cu’ax ale no Yaal oxe

¹⁴ Yaa waxtu faa a fadiidna, Yeesu a reera fo apootar waa ten.

¹⁵ A laya a den ee: «Bug’aam lool o ñaam fa nuun a cu’ax ale na Colandax ale boo um helko fo xijleel.

¹⁶ Yaam mexe layaa a nuun ee: Ñaamkatinum a refangee kaa fadnoox kam Maat ne Roog.»

¹⁷ Yeesu a janga o kaas biiñ, a gidim a Roog, too a lay ee: «Njangyo, too nqaajrin!

¹⁸ Yaam mexe layaa a nuun ee: Yerkatiim kaa inoorna no ndaxar biiñ, a refangeerna Maat ne Roog kaa fadiid.»

¹⁹ Cinj kaaga, Yeesu a janga mbuuru, soo a gidim a Roog. A xustaan, a cooxin a den, soo a lay ee: «Kene refu cer ke mi cooxteena yaam nuun. Mbetandooraamoo keene.»

²⁰ Yaa da nju’ooxna boo a ƈut, a janga o kaas biiñ itam, soo a lay ee: «O kaas biiñ oleeke refu ngiɓoor nqas ne sinjeena took fo’oy le mi ɓaxeena yaam nuun.

²¹ Ndiiki koy, nan-gilooxyo: Oxe na ɓoxotkaxam refu oxe fogna fa mi o roon.

²² O Ƥeenqe no kiin oxe xan a xon, ne Roog a yuuɓit’uuna. Kaa koy, ndaw sabab took no xe na ɓoxotkan.»

²³ Maaga, a ndalfooxa o laamtiraa a ndeer den oxe warna o fi kaaga.

Oxe hupna

²⁴ Daalbe waa a ñimatirooga a ndeer den ndax da and oxe hupna.

²⁵ Yeesu a laya a den ee: «Maad we kaa ngeblaa a saax den fa doole, soo aa-adax den a mbex o nqoyeel we na mbi’aa a pi a paax.

²⁶ Fat nu and koy ee refitkee naaga a ndeer nuun. Kaa koy, o maak oxe na nuun fat a ref oxe moƴna o neew, too oxuu bugna o adooxan a nuun a ref nen o paɗ nuun.

²⁷ Ndi an moƴu o magin boog, oxe reerna fa nuun ndi oxe na dagooxaa? Ndax refee oxe reerna fa nuun? Ndiiki koy mexey a ndeer nuun nen o tag nuun.

²⁸ Nuun ndefu we ndeefan’axama kam ƭeetlax ke mi fop.

²⁹ Ten taxu mexe jagandankaa a nuun ne Faap es a jagandantaxama maat um,

³⁰ ndax nu ñaam yer fa mi kam mbind Faap es, moof na kamb, ngate a carind xarɓaxay fo a carind a ƭak ake Isra’el.»

Yeesu a yegnita yee xan Piyeer a xañatiloox

³¹ O Yaal oxe a laya a Piyeer ee: «Simoŋ, Simoŋ, Saytaane kaa waaƭaa maa ta maafitna a nuun ndax ta fees a nuun nen bele.

³² Kaa koy, xeɗanaaxoong, ndax o ngim of ñufkee. Boo nomtooxiidoona, fat o saƭkand xa teɓ of.»

³³ Piyeer a layaan ee: «O Yaal oxe, xam jaɓ o ɓekel kaso yaam wo, jaɓ o warel yaam wo itam.»

³⁴ Yeesu a doonaan ee: «Piyeer, mexe layang ee: A siik laykee xaye, too layiro boo a caf a tadak ee andiraamo.»

Yeesu a lula daalbe um

³⁵ Yeesu a layahina a den itam ee: «Ndax nu ñaka tig ye luluuma a nuun, too nu ƥisee nafa mbaat o fof mbaat xa ñaaƭ?» A ndoonaan ee: «Ha’aa. I ñak’ee tus!»

³⁶ Maaga, a laya a den ee: «Ndiiki koy, oxuu jegna nafa um fat a jangin, oxe jegna o fof um a jangin itam, oxe jegeerna laƥ fat a jikoox ndoki um, a jik laƥ.

³⁷ Yaam mexe layaa a nuun ee: Fa lay feeke bindeena a wara o fadnoor na mi: ‹A ɗeet’e nen saasaay kaa.› Ke warna na mi xan a fadnoox.»

³⁸ Daalbe waa a layaan ee: «O Yaal oxe, laƥ ƭik key!» A doona a den ee: «A deya.»

Yeesu a xeɗta Getsemane

³⁹ Yeesu a sutooxa, soo a ret farna fo Joong olaa no taxar oliiw kaa, maa ta mer’ina o retaa. Maaga, daalbe we ten a ndeefanaan.

⁴⁰ Yaa ta fadiidna o mbiñ onqaaga, a laya a den ee: «Nqeɗyo, ndax nu yenkee no mbog!»

⁴¹ Maaga, a reta koƭu ngap maa ɗak laa deɓeena a waagna o day, a gooknoox, a xeɗ a Roog,

⁴² too a lay ee: «Faap, o bugangaan, riƈatanaam o kaas coono lene! Kaa koy, baa jegit ne bugtanuuma, ndaa ne bugtanoona.» [

⁴³ Maaga, malaaka no Yaal oxe a feeñooxaan na asamaan, ndax ta saƭakinin.

⁴⁴ Ne ta naqadiloox’ina, a dakooxa o xeɗ fo daalbe waa ten, too onj le ten kaa fi’’u nen toq fo’oy kaa na yenaa a lanq.]

⁴⁵ Yaa ta xeɗna boo a ƴut, a inooxa, a gar me no daalbe we, a soƥ da ƭaanaa. A kid den kaa nqaaɗ’u yaam ne da naqadiloox’ina.

⁴⁶ Yeesu a laya a den ee: «Xar taxu nu ƭaanaa? Inooxyo too nqeɗ, ndax nu yenkee no mbog.»

Yeesu a dame

⁴⁷ Yaa Yeesu a maadna o layaa, faan maak a fadiida, too oxaa ne’eena Yudaa, a reeƭu o leng no xarɓaxay fo ɗik waa a yoona fa den, a adooxan a den. A matiida a Yeesu ndax ta foonin.

⁴⁸ Maaga, Yeesu a layaan ee: «Yudaa, ndax mboon o ɓoxotitkaa o Ƥeenqe no kiin oxe?»

⁴⁹ Yaa waa ndeeƭna fa Yeesu a nga’na ke na xewkaa a laya yee: «O Yaal oxe, ndax i mbaaga o mbadit laƥ?»

⁵⁰ O leng na den a woosa laƥ um, a facin o tag oxe no saasadax o maak oxaa boo nof ñamaak naa a ɗeg.

⁵¹ Kaa koy, Yeesu a doona yee: «Bara, ngeenooxyo!» Maaga, a doona o ɓay um no nof naa no kiin oxaa soo a wodandin.

⁵² Yeesu a dakooxa o lay saasadax maak waa fo waa yetooxoogna Mbind Roog naa fo maak waa ngaran’uuna yee: «Kaa nu ngaraa, mbi nen waa na mbelaa o kuuɗ, saq laƥ fo xa ƭong.

⁵³ Mee ndax bes fuu refna fa nuun refoogum kam Mbind Roog ne, too nu ndoonee xa ƥay nuun took es. Kaa koy, keene refu waxtu nuun fa fee na katil fee no niɓaan ole.»

Piyeer a laya yee andee a Yeesu

⁵⁴ Yaa da ndamna a Yeesu, a ƥisaan no mbind naa no saasadax o maak oxaa. Piyeer a reefana a Yeesu, a danganin o ndik.

⁵⁵ A ngeƥanda fiɗel ndeer o maax olaa, soo a ndeerin. Piyeer itam a moofa a ndeer den.

⁵⁶ Yaa o mbindaand onqaa a ga’uuna ta moof paam fiɗel le a raƭooxaa, a naagaan jak a kid, a lay ee: «O koor oxene itam fo ten a reeƭu.»

⁵⁷ Kaa koy, Piyeer a xaña yee: «Tew oxe, andinum de.»

⁵⁸ Yaa ta ɓaatinna, o lakas a ga’aan, a lay ee: «No we ndeefanooguuna fogo.» Maaga, Piyeer a laya yee: «Koor oxe, fogiim na den de.»

⁵⁹ Yaa da ƥaatinna boo a cinj waxtu, o lakas a jooniida, a layin ee: «A woora yee o koor oxene fo ten a reeƭu, yaam o Kaagalile yoo.»

⁶⁰ Piyeer a doonaan ee: «Koor oxe, andiim ke o layaa.» Ndak-fo ndak, yaa ta maadna o xañaa, a siik a laya.

⁶¹ Maaga, o Yaal oxe a wiƈaqilooxa, a ɗeet a Piyeer. Piyeer a dalfooxa o wetandoox ke o Yaal oxe a lay’uuna yee: «A siik laykee xaye, too layiro boo a caf a tadak ee andiraamo.»

⁶² A inooxa maaga, a naag ciic a lool.

Yeesu a wene, a fadel

⁶³ Goor waa yetooxoogna a Yeesu a nqaadnooxoogaan, soo a mbadan.

⁶⁴ Kaa ngum’un o mbuul-ee-mbuul, a laamtan ee: «Kaa o fi’ooxaa o tuleer! Gapi oxe fadoonga!»

⁶⁵ Maaga, a layanoogaan a nox a mayu.

Yeesu a ɓise mbaambir no saasadax o maak oxaa

⁶⁶ Yaa mbeet naa a xoolna, maak waa na xeet faa fo saasadax maak waa fo jaajangin waa no kebil kaa a mbokatoora, a ƥis a Yeesu mbaambir Mal maak ne den,

⁶⁷ too a laamtin ee: «Layi a in a qool qac, ndax wo refu Kiristaa fee o Muumucil oxe regteena.» Yeesu a doona a den ee: «Um layangaan a nuun nu ngimkiran,

⁶⁸ too um laamtangaa a nuun nu njaaɓkiraam.

⁶⁹ Kaa koy, no ke xotitna ndiiki, o Ƥeenqe no kiin oxe xan a moofik na ñamaak Roog o Yaal katil.»

⁷⁰ Maaga, fop a laya yee: «Wo refu o Ƥeenqe Roog boog?» Yeesu a doona a den ee: «Nuun na laykataa oxe refuuma.»

⁷¹ Yaa da nanuuna, a laya yee: «Seede fum i soxla’atu? In fa qoox in sax nantun no don um.»