YEGIL MBAAX NE YEESU ne Lik a bindtuuna 21 - NQAARIIT NE ROOG

O tew o ñaaw oxe sadaxitna ke ta jegna

¹ Yeesu a wiƈaqilooxa, a ga yaal kalal ke a yipaa ci’it den kam o geekand ole no Mbind Roog ne.

² A ga’a itam o ñaaw o ndool onqaa yip’ina xa piftin xa ƭaq.

³ Maaga, Yeesu a laya yee: «No ndigil, o ñaaw o ndool onqene moƴu o yip wiin lakas we fop.

⁴ Yaam lakas we, xaaliis fee da soxla’eerna a sadaxtu, ndaa o ten o mat, kam o ñak um a cooxta fop ke ta jeg’ina, reeƭna ñoowir um.»

Yeesu a yegnita njom ne no Mbind Roog ne

⁵ Leng-leng no wiin waa kaa laytoogu a muul a mosu ke fo ci’it ke mosandoogna Mbind Roog ne, ndaa Yeesu a laya yee:

⁶ «No ke nu nga’aa ndiiki, xan a jeg a pe, yoqkee muul leng took muul gend um laa yenkeerna.»

Ke warna o xew no muukandoong adna

⁷ Daalbe waa a laamtaan ee: «O Caajangin oxe, a mban muukandoong ne a fadiidkaa? Ndi o anddiloor olum na lalitkaa waxtu fee keene fop a jegkaa?»

⁸ Yeesu a doona a den ee: «Mbootooxyo o naxel, yaam xan wiin mayu a ngar, a ne’ooxaa gon es, too xan a lay ee: ‹Mi refun›, too ‹Waxtu fee xe matiidaa!› Kaa koy, ba nu ndeef a den.

⁹ Boo nu nanna coow xire mbaat yo’nax, ba nu ndiid, yaam keene a wara o eet o fadiid, too sax refkafulee muukandoong ne ndak fo ndak.»

¹⁰ Maaga a laya a den ee: «Xan saax a inooxan saax, maat a inooxan maat,

¹¹ too xan a jeg yo’nax maak no lanq ke fo qeex fo piste na saax a mayu. Xan a jeg tig saɗarnooxu fo xa anddiloor xa maak na asamaan.

¹² Kaa koy, boo keene fop a helko fo fadaa, xan wiin we a ndoon xa ƥay den took nuun, too xan nu ñagadilel. Xan nu ngate’el kam pind a qeƭ ke, soo ƥekel kaso. Xan nu ƥisel mbaambir no maad we fo gofornoor ke yaam gon es.

¹³ Xan keene fop a dal a nuun, ndax nu mbaagaam o seede’an.

¹⁴ Ƥekyo na yiif nuun ee nu mbaree nqalaat ne nu nqoxtitkaa a qoox nuun,

¹⁵ yaam xam coox a nuun ke nu mbarna o lay fo o and olaa taxna fañ we nuun mbaagkee o maaf a nuun mbaat da ƥur a nuun.

¹⁶ Xan we ndimna a nuun fo xa teɓ nuun fo fog nuun fo qaariit nuun a ngod a nuun, too xan a mbarnoor leng-leng na nuun.

¹⁷ Xan fop a sib a nuun yaam gon es.

¹⁸ Kaa koy, o biil o leng no xoox nuun sax samkee.

¹⁹ Na pexey o saƭkel nuun nu muclitkaa xa laaw nuun.»

Yaq fa maak fee

²⁰ «Ten taxu boo nu nga’na xiixire we a mbid a Yeerusaleem o kurul-keƥ, maaga andyo yee miñkatee too ruudee.

²¹ A koom, waa na ndefkaa no jegel olaa Yudee a mbara o ƈufan xa coong axe, we na ndefkaa Yeerusaleem a sutoox, soo we na ndefkaa kam a koƥ ale a mbañ o ndokiid teen.

²² Yaam xan a ndef ñaal kaa Roog a rabdinooxkaa, ndax ke bind’eena fop a fadnoox.

²³ Ndaw naqad no rew we na ndefkaa fo fud fo no we na mbugko numnaa a koom! Yaam xan a jeg mbiraam maak took lanq ke fo fuux le Roog took xeet feene.

²⁴ Xan a mbartel laƥ, a ƥisel no mbaƭ ndeer qeet ke fop. Xan qeet ke ndefeerna Yaawuur a nduutaa a Yeerusaleem boo yaa waxtu den a fadkaa.»

A kar ale no Ƥeenqe no kiin oxe

²⁵ «Xan a jeg xa anddiloor no njeeƈ ne, na qoor ale fo na xa qoor axe. Xan a jeg naqadilax maak ndeer qeet ke, too xan a njaaxiɗ yaam ŋur-ŋur fee no maag ole fo a yag-ee-yag ake.

²⁶ Xan wiin we a nqon yaam diid maak yaa da nqalaataa ke na xewkaa na adna fee fop, yaam xan katil ke na asamaan a yo’noox.

²⁷ Maaga, xan a nga o Ƥeenqe no kiin oxe a garaa took eel, a yoon fa katil fo o ndam o maak.

²⁸ Nu nga’angaa keene fop a xewiidaa, njofdandooxyo ndaxaaƴoox, too and ee a bat ale nuun oxe matiidaa.»

A naxax ale no ndun ne

²⁹ Yeesu a naxooxahina a den ee: «Ƭeetyo ndun ne fo taxar lakas ke fop:

³⁰ Boo nu nga’na taxar ke a saqtaa, nu anda yee ndiig ne a matiida.

³¹ Neene itam, boo nu nga’na keene fop a xew, andyo yee Maat ne Roog a matiida.

³² No ndigil, mexe layaa a nuun ee: Wiin we na jamaane fene mbaafkee, too keene fop xewee.

³³ Xan asamaan fo lanq a mbaaf, ndaa fa lay es faafkee boo muk.»

O njiriiñ a yetax

³⁴ «Mbootooxyo boog! Ba a yiif nuun a may fo a ñaam a kupu mbaat fo a yer a kupu mbaat fo a qalam ake no ñoow ole, ndik bes feene a bet a nuun

³⁵ nen mbog, yaam xan a sag we ngenna took lanq ke fop.

³⁶ Yetooxyo boog, too nqeɗaa waxtu fuu refna, ndax a koom nu njeg doole faa nu ndaɗitna keene na xewkaa fop, ngeenoox mbaambir no Ƥeenqe no kiin oxe.»

³⁷ Ñaal nuu fad’ina Yeesu a jangnooga kam Mbind Roog naa, soo no yeng ole ta fe’ik no Joong olaa no taxar oliiw kaa.

³⁸ Mbeet nuu refna, wiin we fop a ƥiiɓiidooga no Mbind Roog naa ndax da nan-gilooxin.